ភ្នំពេញ ៖ លោក ហ៊ុន ម៉ាណែត អនាគតបេក្ខជន នាយករដ្ឋមន្រ្តីកម្ពុជា បានបើកបង្ហាញពីអាំងស៊ីញ ចំនួន៣ ពាក់លើឯកសណ្ធានរបស់លោក កាលពីអំឡុងឆ្នាំ៩០ជាង គឺប្រគល់ពីសាលាល្បីៗឈ្មោះ នៅសហរដ្ឋអាមេរិក ដល់សិស្សពូកែ ។
តាមរយៈហ្វេសប៊ុកនាថ្ងៃ៦ កក្កដា នេះ លោក ហ៊ុន ម៉ាណែត បានលើកឡើងថា អង្គុយមើលរូបចាស់ៗកាលពីនៅរៀន បានឃើញរូបមួយសន្លឹក ដែលបានថតកាលពីរៀននៅឆ្នាំទី៤ នៅសាលា West Point។
ចំពោះរូបភាពនេះ លោកថា មានគេសួរថា អាំងស៊ីញដែលពាក់នៅលើឯកសណ្ឋាននោះមានន័យអ្វីខ្លះ? លោកតបថា នៅលើហោប៉ៅអាវខាងឆ្វេងមាន៖ ១) អាំងស៊ីញរូបឧទ្ធម្ភាគចក្រ (Air Assault) ដែលខ្ញុំបានទទួលនៅឆ្នាំ១៩៩៧ ក្រោយបញ្ចប់ការហ្វឹកហ្វឺននៅសាលាវាយលុកតាមឧទ្ធម្ភាគចក្រ នៅ Camp Smith មានទីតាំងនៅក្នុងរដ្ឋ New York ។ ទី២) អាំងស៊ីញរូបឆ័ត្រយោង (Airborne) ដែលបានទទួលនៅឆ្នាំ១៩៩៨ ក្រោយបញ្ចប់ការហ្វឹកហ្វឺននៅសាលាឆ័ត្រយោងកងទ័ពអាមេរិកនៅ Fort Benning ស្ថិតក្នុងរដ្ឋ Georgia សហរដ្ឋអាមេរិក។
ចំពោះនៅលើហោប៉ៅអាវស្តាំ (លើស្លាកឈ្មោះ) មានអាំងស៊ីញផ្កាយប្រាក់ ដែលទទួលបានពីសាលា West Point។ អាំងស៊ីញផ្កាយប្រាក់នេះ គឺសាលាប្រគល់ជូននិស្សិតនាយទាហានដែលជាប់និទ្ទេសជានិស្សិតពូកែ (Dean’s List) ដោយគិតទាំងចំណេះដឹងទូទៅ(Academics) យោធា(Military) និង កីឡា(Physical)៕
