ភ្នំពេញ ៖ ក្រសួងធនធានទឹក និងឧតុនិយម បានអំពាវនាវឲ្យពលរដ្ឋ បន្តប្រុងប្រយ័ត្ន ដោយសារកម្ពុជា រងឥទ្ធិពលខ្សោយពីជ្រលងសម្ភាធទាប ពីចិន នឹងធ្វើឲ្យបណ្តាខេត្តមួយចំនួន មានភ្លៀងធ្លាក់ពីតិចទៅបង្គួរលាយឡំ នឹងបាតុភូតផ្គរ រន្ទះ ខ្យល់កន្ត្រាក់ចាប់ពីថ្ងៃ១២ កក្កដា ស្អែកតទៅ។
យោងតាមសេចក្តីជូនដំណឹង របស់ក្រសួង ធនធានទឹក ចាប់ពីថ្ងៃ១២-១៨ កក្កដា បានឲ្យដឹងថា ពី១២-១៤ កក្កដា កម្ពុជាបន្តទទួល នូវឥទ្ធិពលខ្សោយពីជ្រលង សម្ពាធទាប (ចិន) ។ បន្ទាប់ពីនោះ ចាប់ពីថ្ងៃ១៥ កក្កដា នឹងអាចទទួលនូវឥទ្ធិពលពីជ្រលង សម្ពាធទាបថ្មីដែលកើតឡើងក្នុង មហាសមុទ្រប៉ាស៊ីហ្វិក (ខាងកើតហ្វីលីពីន), សមុទ្រចិនខាងត្បូង និងកំណើន នៃខ្យល់មូសុងនិរតី ។
ក្រសួងបានលើកឡើងថា លក្ខណៈទាំងនេះនឹងធ្វើឲ្យតំបន់ទំនាបកណ្ដាល មានសីតុណ្ហភាពអប្បបរមា មានពី ២៣-២៥អង្សាសេនិងសីតុណ្ហភាពអតិបរមា មានពី ៣៣-៣៥អង្សាសេ ។ ពីថ្ងៃទី១២-១៤ ខែកក្កដា អាចមានភ្លៀង ក្នុងកម្រិតពីតិចទៅមធ្យម។ ពីថ្ងៃទី១៥-១៨ ខែកក្កដា អាចមានភ្លៀងក្នុងកម្រិត ពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់ ។
ចំណែក តំបន់ខ្ពង់រាបមានសីតុណ្ហភាពអប្បបរមា មានពី ២២-២៤អង្សាសេនិងសីតុណ្ហភាពអតិបរមា មានពី ៣២-៣៤អង្សាសេ។ ពីថ្ងៃទី១២-១៤ ខែកក្កដា អាចមានភ្លៀងក្នុងកម្រិតពីតិចទៅមធ្យម។ពីថ្ងៃទី១៥-១៨ ខែកក្កដា អាចមានភ្លៀងក្នុងកម្រិតពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់ ។
ដោយឡែក តំបន់មាត់សមុទ្រ មានសីតុណ្ហភាពអប្បបរមា មានពី ២៥-២៧អង្សាសេនិងសីតុណ្ហភាពអតិបរមា មានពី ៣២-៣៤ អង្សាសេ។ ពីថ្ងៃទី១២-១៤ ខែកក្កដា អាចមានភ្លៀងក្នុងកម្រិតពីខ្សោយទៅតិច ។
ពីថ្ងៃទី១៦-១៨ ខែកក្កដា អាចមានភ្លៀង ក្នុងកម្រិតពីមធ្យមទៅបង្គរ លាយឡំដោយផ្គរ រន្ទះ និងខ្យល់ កន្ត្រាក់ ។ នៅលើផ្ទៃសមុទ្រ ខ្យល់បកំបោកខ្លាំង និងរលកសមុទ្រមានកម្ពស់ខ្ពស់ ៕
