ស្វាយរៀង ៖ មានករណីគ្រោះថ្នាក់ ចរាចរណ៍ គួរឲ្យរន្ធត់បណ្ដាល ឲ្យបុរសពីរនាក់ស្លាប់ និងពីរនាក់ទៀត រងរបួសធ្ងន់ រវាងម៉ូតូ២គ្រឿង បុកបញ្រ្ចាស់គ្នា ពេញទំហឹងបង្ក ការភ្ញាក់ផ្អើលដល់អ្នកភូមិ និងអ្នកធ្វើដំណើទាំងថ្ងៃត្រង់ ។
ហេតុការណ៍នេះ បានកើតឡើងកាលពីវេលាម៉ោង១០និង៥៨នាទី ថ្ងៃទី ១១ ខែ កក្កដា ឆ្នាំ ២០២៣ លើផ្លូវជាតិលេខ១ ចន្លោះគីឡូម៉ែត្រលេខ ១៤៦-១៤៧ ស្ថិតក្នុងភូមិជ្រៃធំ សង្កាត់ព្រៃអង្គុញក្រុងបាវិត ខេត្តស្វាយរៀង ។
សមត្ថកិច្ចនគរបាលបានឲ្យដឹងថា មុនកើតហេតុមាន ម៉ូតូមួយគ្រឿង ម៉ាក HONDA C125 ព៌ណខ្មៅ ពាក់ស្លាកលេខ ស្វាយរៀង 1R-7756 បើកបរ (ស្លាប់) មានឈ្មោះ វ័ន សុធា ភេទ ប្រុស អាយុ ២១ ឆ្នាំ ជនជាតិខ្មែរ មុខរបរកម្មកររោងចក្រ អ្នករួមដំណើរ (រងរបួសធ្ងន់(ឈ្មោះ ចូវ ឆៃយ៉ា ភេទ ប្រុស អាយុ ១៧ ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅក្នុង ភូមិព្រៃរបឺស ឃុំត្នោត ស្រុកកំពង់រោទិ៍ ខេត្តស្វាយរៀង ធ្វើដំណើរពីកើតទៅលិច លើកំណាត់ផ្លូវជាតិលេខ១ ហើយបាន វ៉ាជែង ស្ថិតក្នុងស្ថានភាពគ្រោះថ្នាក់ ក៏បុកជាមួយម៉ូតូមួយគ្រឿង ម៉ាក BEAT ព៌ណសលាយខ្មៅ ពាក់ស្លាកលេខ ស្វាយរៀង 1T-6643 បើកបរ (ស្លាប់)មានឈ្មោះ អេង សំបូរ ភេទ ប្រុស អាយុ ២២ ឆ្នាំ ជនជាតិខ្មែរ មុខរបរបើកបរឡាន មានទីលំនៅក្នុងភូមិទួលសាលា ឃុំ្រជុងពពេល ស្រុករំដួល ខេត្តស្វាយរៀង និងរួមដំណើរ (រងរបួសធ្ងន់) ឈ្មោះ ភិន សុភា ភេទ ប្រុស អាយុ ២៤ ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅក្នុងភូមិនាងច័ន្ទ ឃុំជ្រុងពពេល ស្រុករំដួល ខេត្តស្វាយរៀង យ៉ាងពេញទំហឹង លាន់សូរដូចរន្ទះបាញ់បង្កការ ភ្ញាក់ផ្អើលដល់អ្នកភូមិនិង អ្នកធ្វើដំណើទាំងថ្ងៃត្រង់ ។
សមត្ថកិច្ចបានបន្តថា ក្រោយមកអ្នករបួសធ្ងន់ ទាំង២នាក់ត្រូវបានដឹកមក សង្គ្រោះនៅមន្ទីរពេទ្យខេត្តស្វាយរៀង ចំណែកមធ្យោបាយ ធ្វើដំណើរត្រូវបានសមត្ថកិច្ច វាស់វែងនិងអូស យកមករក្សាទុកនៅប៉ុស្តិ៍ នគរបាលរដ្ឋបាលព្រៃអង្គុញ ដើម្បីចាត់ការបន្តតាមច្បាប់ ៕
