ប៉េកាំង៖ ប្រធានាធិបតីចិនលោក ស៊ី ជីនពីង និងសមភាគីរុស្ស៊ីលោក វ្លាឌីមៀ ពូទីន បានអះអាងថា ការរួបរួមរបស់ពួកគេប្រឆាំងនឹង “ការគំរាមកំហែងទូទៅ” ដូចដែលពួកគេបានជួបនៅទីក្រុងប៉េកាំង ដោយមេដឹកនាំទាំងពីរក៏ពិភាក្សាអំពី សង្គ្រាមរបស់រុស្ស៊ីលើបញ្ហាអ៊ុយក្រែន និងមជ្ឈិមបូព៌ាផងដែរ។
លោក ពូទីន បានប្រាប់អ្នកយកព័ត៌មានថា ការគំរាមកំហែងបែបនេះ “ធ្វើឱ្យទំនាក់ទំនងរុស្ស៊ី-ចិន កាន់តែរឹងមាំ” នៅក្នុងឯកសារយោងជាក់ស្តែងមួយ ចំពោះសម្ពាធពីជំរុំលោកខាងលិច ដែលដឹកនាំដោយសហរដ្ឋអាមេរិក ជុំវិញសង្រ្គាមអ៊ុយក្រែន បន្ទាប់ពីកិច្ចពិភាក្សារយៈពេល បីម៉ោងរបស់គាត់ជាមួយលោក ស៊ី នៅរដ្ឋធានីចិន នៅខាងក្រៅវេទិកាហេដ្ឋារចនាសម្ព័ន្ធ។
ក្រសួងការបរទេសចិនបានឲ្យដឹងថា លោក ស៊ី និងលោក ពូទីន មាន “ការផ្លាស់ប្តូរទស្សនៈស៊ីជម្រៅ” ស្តីពីការប្រយុទ្ធគ្នាដ៏ខ្លាំងក្លារវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីនហាម៉ាស ប៉ុន្តែមិនបានបញ្ជាក់លម្អិតនោះទេ។
ដំណើរទស្សនកិច្ចនេះជាលើកដំបូងរបស់លោក ពូទីន ទៅកាន់ប្រទេសចិន ចាប់តាំងពីការចាប់ផ្តើមការឈ្លានពានរបស់រុស្ស៊ី លើអ៊ុយក្រែនក្នុងខែកុម្ភៈឆ្នាំមុន។ ចិន ដែលបាននិងកំពុងពង្រឹងទំនាក់ទំនងសេដ្ឋកិច្ចជាមួយរុស្ស៊ី ប្រឆាំងនឹងទណ្ឌកម្មរបស់លោកខាងលិច លើក្រុងម៉ូស្គូជុំវិញសង្រ្គាមអ៊ុយក្រែន។
លោក ស៊ី បានសម្តែងការគាំទ្រ ចំពោះប្រជាជនរុស្ស៊ី ក្នុងជម្រើសរបស់ពួកគេ ដើម្បីការពារ “អធិបតេយ្យភាព សន្តិសុខ និងផលប្រយោជន៍អភិវឌ្ឍន៍” របស់ប្រទេស ខណៈដែលលោក ពូទីន បានលើកឡើងថា ទីក្រុងម៉ូស្គូ ប្រកាន់ខ្ជាប់នូវគោលការណ៍ចិនតែមួយ និងការខិតខំប្រឹងប្រែងរបស់ទីក្រុងប៉េកាំង ក្នុងការធានាបូរណភាពទឹកដី ដោយចាត់ទុកតៃវ៉ាន់ជា “ផ្នែកដែលមិនអាចកាត់ផ្តាច់បាននៃទឹកដីចិន”។
មេដឹកនាំចិនបានឲ្យដឹងថា ការអភិវឌ្ឍន៍ភាពជាដៃគូទ្វេភាគី “ជាមួយនឹងភាពជាអ្នកជិតខាងល្អយូរអង្វែង និងកិច្ចសហប្រតិបត្តិការដែល មានផលប្រយោជន៍ទៅវិញទៅមក” គឺជាការប្តេជ្ញាចិត្តយូរអង្វែង របស់ប្រទេសរបស់គាត់។
ក្រសួងបានឲ្យដឹងផងដែរថា គាត់ក៏បានបង្ហាញពីការត្រៀមខ្លួនរបស់ប្រទេសចិន ក្នុងការធ្វើការជាមួយប្រទេសរុស្ស៊ី ក្នុងការធានាសន្តិសុខស្បៀង សន្តិសុខថាមពល និងស្ថិរភាពឧស្សាហកម្ម និងខ្សែសង្វាក់ផ្គត់ផ្គង់ពិភពលោក ៕
ប្រែសម្រួល ឈូក បូរ៉ា
