ភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីកម្ពុជា បានថ្លែងថា រាជរដ្ឋាភិបាលកម្ពុជាមិនចាត់ទុកវិស័យឯកជន ឬអាជីវករ ជាសត្រូវឡើយ តែផ្ទុយទៅវិញ គឺជាដៃគូសហការមិនអាចខ្វះបាន ហើយក៏ជាគោលដៅត្រូវជួយដូចគ្នា។
នាឱកាសអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការ «មន្ទីរពេទ្យជាតិ តេជោសន្តិភាព»នាព្រឹកថ្ងៃ២៤ តុលា សម្ដេចធិបតី ហ៊ុន ម៉ាណែត មានប្រសាសន៍ថា ជាការពិត ការអនុវត្តវិធានការតឹងរឹង ដើម្បីសុខភាពប្រជាពលរដ្ឋ គឺជាការចាំបាច់ ប៉ុន្ដែក៏ត្រូវមានការបត់បែន ត្រូវមានភាពសហការគ្នាផងដែរ។
សម្ដេចធិបតីបន្ដថា រដ្ឋគឺជាអ្នកគាំទ្រ និងលើកទឹកចិត្តដល់វិស័យឯកជន ដើម្បីឲ្យប្រជាពលរដ្ឋ អាជីវករ និងអ្នកប្រកបរបរលក់លក់ចំណីអាហារ លក់ថ្នាំ អាចប្រកបរបរដោយជោគជ័យ និងមានប្រសិទ្ធិភាពក្នុងការផ្ដល់ចំណីអាហារ ឬថ្នាំដល់ប្រជាពលរដ្ឋដោយមិនមានបញ្ហាអ្វីឡើយ។
នាយករដ្ឋមន្ដ្រីគូសបញ្ជាក់ថា «ខ្ញុំ សូមអំពាវនាវដល់បងប្អូនទាំងអស់ រាជរដ្ឋាភិបាល មិនចាត់ទុកបងប្អូនជាសត្រូវទេ ផ្ទុយទៅវិញ រាជរដ្ឋាភិបាល ចាត់ទុកបងប្អូនអាជីវករ ចាត់ទុកបងប្អូនអ្នកលក់ ទាំងអនឡាញ ទាំងផ្ទាល់ទាំងអស់ ទាំងចំណីអាហារ ទាំងថ្នាំ គឺដៃគូដែលមិនអាចខ្វះបាន ហើយជាគោលដៅដែលរដ្ឋ ត្រូវបានជួយដូចគ្នា»។
លើសពីនេះ សម្តេចធិបតី ក៏បានអំពាវនាវដល់វិស័យឯកជន អាជីវករលក់ថ្នាំ និងចំណីអាហារ ចូលរួមជាមួយរាជរដ្ឋាភិបាល លើកកម្ពស់គុណភាពផលិតផល និងចំណីអាហាររបស់ខ្លួន៕
