ភ្នំពេញ៖លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល នៅថ្ងៃទី១៦ ខែវិច្ឆិកា ឆ្នាំ២០២៣ បានបន្តអញ្ជើញចុះពិនិត្យការផ្តល់សេវាសុខាភិបាល ព្រមទាំងជួបសំណេះសំណាល និងថ្លែងអំណរគុណ មន្រ្តីរាជការ និងក្រុមគ្រូពេទ្យនៃមនី្ទរពេទ្យកុមារជាតិ ដែល បានខិតខំបំពេញការងារដោយស្មារតីទទួលខុសត្រូវ និងក្រមសីលធម៌វិជ្ជាជីវៈខ្ពស់។
ក្នុងឱកាសនោះ សាស្រ្តាចារ្យរដ្ឋមន្រ្តី បានវាយតម្លៃខ្ពស់ពីភាពរីកចម្រើនរបស់មន្ទីរពេទ្យ ទាំងការរៀបចំរហដ្ឋារចនាសម្ព័ន្ធ រួមទាំងសម្ភារបរិក្ខារវេជ្ជសាស្រ្ត និងធនធានមនុស្សមានជំនាញច្បាស់លាស់ ក្នុងការផ្តល់សេវាជូនប្រជាពលរដ្ឋ ជាពិសេសលើកុមារ ប្រកបដោយគុណភាព សុវត្ថិភាព ប្រសិទ្ធភាព និងសមធម៌។
គួរបញ្ជាក់ថាបច្ចុប្បន្ន មនី្ទរពេទ្យកុមារជាតិមានសេវាធំៗចំនួន ២ គឺផ្នែកកុមារ និងផ្នែកសម្ភព ទន្ទឹមនឹងការរីកចម្រើននេះ សាស្រ្តាចារ្យរដ្ឋមន្រ្តី ក៏បានផ្តល់អនុសាសន៍បន្ថែមទៀត ក្នុងការបន្តសកម្មភាពតទៅមុខទៀត ដូចជាត្រូវប្រែក្លាយមន្ទីរពេទ្យ ទៅជាមន្ទីរពេទ្យឯកទេសលើឯកទេស ប្រកបដោយនវានុវត្តន៍ និងឌីជីថល ព្រមទាំងមានការទទួលស្គាល់គុណភាព។ ជំរុញការអនុវត្តកម្រោងសាងសង់អគារថ្មីក្រោមជំនួយឥតសំណងរបស់ KOICA ឱ្យបានលឿន ។ ពង្រឹងកិច្ចសហប្រតិបត្តិការជាមួយដៃគូដែលមានស្រាប់ និងពង្រីកជាមួយដៃគូថ្មីៗថែមទៀត ។ បន្តអនុវត្តសកម្មភាពដែលមានស្រាប់ ដោយធានាឆ្លើយតបនឹងអាទិភាព ដែលបានដាក់ចេញក្នុងយុទ្ធសាស្រ្តបញ្ចកោណ ដំណាក់កាលទី១ ក៏ដូចជាអាទិភាពរបស់ក្រសួងសុខាភិបាល ។
សាស្រ្តាចារ្យរដ្ឋមន្រ្តី ក៏បានគូសរំលេចនូវការដាក់ចេញនូវយុទ្ធសាស្រ្តបញ្ចកោណ របស់រាជរដ្ឋាភិបាល អាណត្តិទី៧ ដែលក្នុងនោះវិស័យសុខាភិបាលជាវិស័យអាទិភាពមួយ ក្នុងការលើកកម្ពស់សុខភាព និងសុខុមាលភាពប្រជាជន។ ដើម្បីសម្រេចបានការគ្របដណ្តប់សុខភាពជាសកល ត្រូវចូលរួមអនុវត្តយុទ្ធសាស្រ្តគន្លឹះ ទាំង៩ ចំណុចគឺបង្កើនសកម្មភាពអប់រំសុខភាពជូនប្រជាជន ដើម្បីលើកកម្ពស់សុខភាពជូនប្រជាជនឱ្យកាន់តែប្រសើរឡើង ។ ប្រយុទ្ធប្រឆាំងនឹងជំងឺងឺឆ្លង ។ ទប់ស្កាត់នឹងការរីករាលដាលជំងឺឆ្លងសកលដែលកើតមាន ។ ប្រយុទ្ធនឹងជំងឺមិនឆ្លង ដូចជាជំងឺទឹកនោមផ្អែម លើសសម្ពាធឈាម ជំងឺមហារីក ជំងឺបេះដូង ។ ប្រយុទ្ធនឹងផលប៉ះពាល់ដល់សុខភាពបណ្តាលមកពីការប្រែប្រួលអាកាសធាតុ ធ្វើឲ្យកាន់តែប្រសើរឡើង ការពិនិត្យព្យាបាលទូលំទូលាយនៅក្នុងសហគមន៍ ក៏ដូចជាធ្វើឲ្យកាន់តែប្រសើរឡើង កម្មវិធីគាំពារសង្គម ដូចជាប.ស.ស មូលនិធិសមធម៌ ។ លើកកម្ពស់គុណភាពសេវាថែទាំសុខភាព ទាំងសេវាសាធារណៈ និងការធ្វើនិយ័តកម្មសេវាឯកជន ដើម្បីឲ្យក្លាយជាដៃគូរបស់សេវាសាធារណៈ ។ អភិវឌ្ឍន៍ធនធានមនុស្សសុខាភិបាលទូទាំងប្រទេស ដើម្បីបញ្ជូនអ្នកជំនាញឱ្យដល់មូលដ្ឋាន ពោលគឺបង្ខិតសេវាឲ្យកាន់តែគៀកប្រជាពលរដ្ឋ និងអភិវឌ្ឍន៍សុខាភិបាលឌីជីថល។
សាស្រ្តាចារ្យរដ្ឋមន្រ្តី ក៏បានស្នើសុំមន្រ្តីរាជការ និងបុគ្គលិកសុខាភិបាលទាំងអស់ ត្រូវចេះជួយគ្នា សហការគ្នា សាមគ្គីភាពគ្នា និងត្រូវខិតខំប្រឹងព្យាយាមបន្ថែមទៀត ក្នុងការអភិវឌ្ឍមន្ទីរពេទ្យ និងវិស័យសុខាភិបាលឲ្យកាន់តែល្អប្រសើរថែមទៀត ដើម្បីឈានទៅរកការសម្រេចបាននូវការគ្របដណ្តប់សុខភាពជាសកល៕
![](https://dap-news.com/wp-content/uploads/2023/11/photo_2023-11-16_20-42-01-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-03-1024x735.jpg)
![](https://dap-news.com/wp-content/uploads/2023/11/photo_2023-11-16_20-42-04-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-06-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-07-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-09-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-10-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-15-1024x690.jpg)
![](https://dap-news.com/wp-content/uploads/2023/11/photo_2023-11-16_20-42-17-1024x682.jpg)
![](https://dap-news.com/wp-content/uploads/2023/11/photo_2023-11-16_20-42-18-1024x682.jpg)
![](https://dap-news.com/wp-content/uploads/2020/08/1-1.png)