ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្តល់អនុសាសន៍ ដល់កម្មករ កម្មការិនីទាំងអស់ ត្រូវរួមគ្នាចាប់យកឱកាសការងារ ដែលរាជរដ្ឋាភិបាល បានខិតខំគៀងគរមកឲ្យនៅក្នុងសុខសន្តិភាព ស្ថេរភាព ដែលមិនចាំបាច់ រត់កាត់គ្រាប់ផ្លោង ដូចជំនាន់មុន ។
ប្រសាសន៍របស់សម្តេចធិបតី ណែនាំខាងលើនេះ ធ្វើឡើងក្នុងឱកាសជួបសំណេះសំណាល ជាមួយកម្មករ នៅខណ្ឌកំបូល នាថ្ងៃ២១ វិច្ឆិកា ។
សម្តេចធិបតី លើកឡើងថា “រាជរដ្ឋាភិបាលបានខិតខំប្រឹងប្រែង នឹងបន្តខិតខំប្រឹងប្រែង ដើម្បីបង្កើនបរិស្ថាន ការងារ ប្រកាន់ជំហរ គោលនយោបាយ ទីផ្សារសេរី បើកវិស័យឯកជន លើកទឹកចិត្តវិនិយោគក្នុងប្រទេស និងក្រៅប្រទេស លើកទឹកចិត្តឲ្យបងប្អូន អាចប្រកបអាជីវកម្មខ្លួនឯងបាន ទៅធ្វើអ្វីខ្លួនឯងបាន ដើម្បីឲ្យសិទ្ធិសេរីភាព ខំប្រឹងបើកវគ្គបណ្តុះបណ្តាល ហើយឲ្យរៀនសូត្រ តាំងពីមត្តេយ្យ រហូតដល់មធ្យម ដល់ឧត្តមទៀត បង្កើនសមត្ថភាពឲ្យខំទៅ ទាក់ទាញវិនិយោគ មកបង្កើតការងារឲ្យ រៀបចំគោលនយោបាយ ដើម្បីឲ្យអភិវឌ្ឍន៍ ដូច ប.ស.ស. កាន់តែល្អ ប្រាក់សោធនយើងមាន យើងដើរហើយ រោងចក្រសហគ្រាស បានមកហើយ” ។
សម្តេចនាយករដ្ឋមន្ត្រីបញ្ជាក់ថា “អ្វីដែលសំខាន់ គឺបងប្អូនផ្ទាល់តែម្តងដែលត្រូវផ្តល់មកវិញ គឺរួមគ្នាចាប់យកឱកាសដែលផ្តល់ឲ្យនេះ នៅក្នុងសុខសន្តិភាព ស្ថេរភាព ដែលយើងមិនចាំបាច់រត់កាត់គ្រាប់ផ្លោង ដូចជំនាន់ឪពុកម្តាយយើង មានឱកាសធ្វើការងារនៅទីនេះ ហើយមានឱកាសកាន់តែប្រសើរ ។ សូមចាប់យកឱកាសទាំងអស់នេះ ដើម្បីពង្រឹងខ្លួនឯង ហើយដើម្បីចូលរួមនៅក្នុងការជំរុញ អភិវឌ្ឍន៍ សេដ្ឋកិច្ចប្រទេសជាតិយើង ដូចបងប្អូនបានធ្វើមក ដល់ម៉ោងនេះ” ។
សម្តេចធិបតីបន្តថា “ប្រទេសយើងមិនអាចដើរមកដល់ម៉ោងនេះ បើគ្មានបងប្អូនខិតខំប្រឹងប្រែងនោះទេ បើបងប្អូនមិនខំប្រឹងប្រែងធ្វើការ រហូតទៅដល់ថែមម៉ោងថែមទៀត ដើម្បីជំរុញផលិតភាពរបស់យើង ពិតណាស់បងប្អូនបានចំណូលបន្ថែម” ៕
