ភ្នំពេញ ៖ រដ្ឋមន្ត្រីការពារជាតិ ហ្គាណា(Ghana) បានបង្ហាញពីបំណង ចង់ឲ្យមានការផ្លាស់ប្តូរ សិក្ខាកាមយោធា រវាងប្រទេសទាំងពីរ កម្ពុជា-ហ្គាណា ក្នុងហ្វឹកហ្វឺនបណ្តុះបណ្តាលវិស័យកងទ័ព ។
ការបង្ហាញបំណងរបស់រដ្ឋមន្ត្រីការពារជាតិហ្គាណាបែបនេះ ធ្វើឡើងក្នុងជំនួបជាមួយ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កាលពីថ្ងៃ៦ ធ្នូ ក្នុងឱកាសប្រមុខ ការពារជាតិកម្ពុជា ដឹកនាំប្រតិភូចូលរួម កិច្ចប្រជុំថ្នាក់រដ្ឋមន្ត្រី ស្តីពីការរក្សាសន្តិភាពក្នុងក្របខណ្ឌអង្គការ សហប្រជាជាតិលើកទី ៧ នៅទីក្រុងអាក្រា(ACCRA) សាធារណរដ្ឋហ្គាណា (Ghana) ។
ក្នុងជំនួបនោះ រដ្ឋមន្ត្រីការពារជាតិ ហ្គាណា ក៏បានលើកឡើងផងដែរ អំពីការផ្លាស់ ប្តូរបទពិសោធន៍ លើជំនាញកំទេច គ្រាប់មិនទាន់ផ្ទុះដែលកម្ពុជា បានកំពុងអនុវត្តមុខជំនាញនេះ ក្នុងបេសកកម្មថែរក្សាសន្តិភាព ក្រោមឆត្រអង្គការ សហប្រជាជាតិ នាពេលបច្ចុប្បន្ន ។
នាយឧត្តមសេនីយ៍ ទៀ សីហា បញ្ជាក់ថា ឆ្នាំ២០២៣ នេះគឺជាខួបទី៣១ ដែលប្រទេស Ghana បានបញ្ជូនកម្លាំងចូលរួម បេសកកម្ម អ៊ុនតាក់ (UNTAC) និងមានសមាជិក ២នាក់ បានពលីក្នុងបេសកកម្ម ថែរក្សាសន្តិភាពនៅកម្ពុជា។
នាយឧត្តមសេនីយ៍ ទៀ សីហា ក៏បានស្នើអតីត កងកម្លាំងអ៊ុនតាក់ ដែលធ្លាប់ បានបំពេញបេសកកម្ម ថែរក្សាសន្តិភាព នៅកម្ពុជា ទៅបំពេញទស្សនកិច្ចនៅកម្ពុជា ដើម្បីពិនិត្យមើល ការអភិវឌ្ឍ រីកចម្រើននៅកម្ពុជា ក្រោយពីកម្ពុជា បានទទួលសុខសន្តិភាព ក្នុងរយៈពេលជាង ២០ឆ្នាំកន្លងមកនេះ ៕
