សម្តេចធិបតី អញ្ជើញសម្ពោធស្ពាន “សម្តេចតេជោ ហ៊ុន សែន​ កោះយ៉” និងជួបសំណេះសំណាល កម្មករជាង១ម៉ឺននាក់ នៅខេត្តកោះកុង

កោះកុង៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅថ្ងៃទី៨ ខែមករា ឆ្នាំ២០២៤នេះ បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ “ស្ពានសម្តេចតេជោ ហ៊ុន សែន​ កោះយ៉” និងជួបសំណេះសំណាលជាមួយ “បងប្អូនកម្មករ និយោជិតចំនួន ១១ ០០០នាក់ នៅស្រុកមណ្ឌលសីមា ខេត្តកោះកុង”​ ។

សូមរំលឹកថា នេះគឺជាលើកទី១១ និងជាជំនួបលើកដំបូងក្នុងឆ្នាំ២០២៤ ដែលសម្តេចធិបតី នាយករដ្ឋមន្ត្រី អញ្ជើញចុះជួបសំណេះសំណាល ជាមួយនឹងបងប្អូនកម្មករនិយោជិត តាមបណ្តារោងចក្រ សហគ្រាសនានា ក្នុងឋានៈជានាយករដ្ឋមន្ត្រី នៃព្រះរាជាណាចក្រកម្ពុជា ។

សម្រាប់ កម្មករ-និយោជិត ចំនួន ១១ ០០០នាក់នេះ មកពីបណ្តារោងចក្រ សហគ្រាស ចំនួន ៥ រួមមាន៖ ប្រភេទរោង​ចក្រកាត់ដេរសម្លៀកបំពាក់១ រោងចក្របង្គុំខ្សែភ្លើង ១ រោងចក្របរិក្ខារអេឡិចត្រូនិក ១ រោងចក្រប៉ាក់លើសម្លៀកបំពាក់ ១ និងរោងចក្រដំឡើងរថយន្ត និងបង្គុំខ្សែភ្លើង​ ១​​៕