នារសៀលថ្ងៃអង្គារ ១៣រោច ខែមិគសិរ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី៩ ខែមករា ឆ្នាំ២០២៤ ក្នុងឱកាសចុះពិនិត្យស្ថានភាព និងដោះស្រាយបញ្ហាទឹកនៅខេត្តភាគពាយ័ព្យ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានបន្តចុះពិនិត្យជាក់ស្តែងស្ថានភាពទឹកនៅទំនប់អាងទឹកលេខ៥ ស្ថិតក្នុងភូមិវាលវង់ ឃុំរកាត ស្រុកភ្នំក្រវាញ ខេត្តពោធិ៍សាត់។
អញ្ជើញអមដំណើរ លោក រដ្ឋមន្ត្រី ចុះពិនិត្យទំនប់អាងទឹកលេខ៥ ដែលស្ថិតនៅចម្ងាយ ៤៨គីឡូម៉ែត្រ ភាគខាងត្បូង ក្រុងពោធិ៍សាត់ នាពេលនេះរួមមាន ឯកឧត្តមរដ្ឋលេខាធិការប្រចាំការលោក រដ្ឋលេខាធិការ ថ្នាក់ដឹកនាំ មន្ត្រីបច្ចេកទេសក្រសួង និងលោកប្រធានមន្ទីរធនធានទឹក និងឧតុនិយមខេត្តពោធិ៍សាត់។
លោក រដ្ឋមន្ត្រីមានប្រសាសន៍ថា ប្រតិបត្តិការបើកទំនប់អាងទឹកលេខ៥ ក្នុងរយៈពេលប៉ុន្មានថ្ងៃនេះ ដើម្បីផ្តល់ទឹកជួយស្រោចស្រពស្រូវប្រាំងរបស់បងប្អូនប្រជាកសិករ ដែលបានបន្តធ្វើការងារបង្កបង្កើនផលលើសពីផែនការកំណត់ដែលអាចស្រោចស្រព បានបង្ហាញឱ្យឃើញពីការយកទុកដាក់របស់រាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជួយដល់បងប្អូនប្រជាកសិករដែលកំពុងជួបការខ្វះខាតទឹក។
សូមបញ្ជាក់ថា ទំនប់អាងទឹកលេខ៥ បានចាប់ផ្តើមសាងសង់នៅឆ្នាំ២០១០ និងបញ្ចប់នៅឆ្នាំ២០១៣ មានប្រវែង ៤៧៧ម៉ែត្រ មានកម្ពស់ ២៥ម៉ែត្រ និងស្តុកទឹកបាន ២៤,៥លានម៉ែត្រគូប។ ទំនប់នេះ បានជួយដល់ការស្រោចស្រព បន្ថែមពីលើប្រព័ន្ធស្រោចស្រពដំណាក់អំពិល និងចារឹក ស្ថិតក្នុងស្រុកបាកាន និងស្រុកកណ្តៀង ខេត្តពោធិ៍សាត់៕
