ភ្នំពេញ៖ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជិវៈ បានជំរុញឱ្យនាយកសាលាសណ្ឋាគារ សាលាបាយ (Sala Bai Hotel School) ដែលជាសាលាអង្គការ ទទួលជំនួយពីប្រទេសបារាំង បង្កើនការបណ្តុះបណ្តាលជំនាញ បដិសណ្ឋារកិច្ច ដល់ពលរដ្ឋកម្ពុជា។ ការជំរុញនេះ គឺធ្វើឡើងក្នុងជំនួបរវាងលោករដ្ឋមន្ត្រីនិងលោក រឺណូ ហ្វីស្យេ(Renaud Fichet) នាយកសាលាសណ្ឋាគារ សាលាបាយ និងសហការី នៅថ្ងៃទី១៣ ខែកុម្ភៈ ឆ្នាំ២០២៤ នាទីស្តីការក្រសួងការងារ និងបណ្តុះបណ្តាលវិជ្ជាជីវៈ ។
លោករដ្ឋមន្ត្រី បានបញ្ជាក់ថា ជំនាញវិជ្ជាជីវៈក្នុងវិស័យបដិសណ្ឋារកិច្ច មានសារសំខាន់ សម្រាប់ប្រទេសកម្ពុជា ដែលជាគោលដៅនៃភ្ញៀវទេសចរជាតិ និងអន្តរជាតិ ហើយក្នុងពេល ដែលសាលាបាយមានកេរ្តិ៍ឈ្មោះ ក្នុងការបណ្តុះបណ្តាលជំនាញ វិជ្ជាជីវៈផ្នែកបដិសណ្ឋារកិច្ចស្រាប់នៅកម្ពុជា។
បន្ថែមពីនេះ លោករដ្ឋមន្ត្រី បានលើកឡើងពីភាពចាំបាច់ ក្នុងការបណ្តុះបណ្តាល ជំនាញ បច្ចេកទេសវិជ្ជាជីវៈ ក្នុងពេលដែលរាជរដ្ឋាភិបាល បានដាក់ចេញ នូវកម្មវិធីបណ្តុះបណ្តាលបច្ចេកទេស វិជ្ជាជីវៈ ដល់យុវជនមកពីគ្រួសារក្រីក្រ និងងាយរងហានិភ័យ ១.៥លាននាក់ ដើម្បីឱ្យពលរដ្ឋកម្ពុជា មានជំនាញ វិជ្ជាជីវៈច្បាស់លាស់ និងទទួលបានការងារសមរម្យ។ លោករដ្ឋមន្ត្រី បន្ថែមថា កម្មវិធីបណ្តុះបណ្តាលជំនាញបច្ចេកទេសវិជ្ជាជីវៈ មានភាពបត់បែន ដែលអាចផ្តល់ឱកាសដល់សិក្ខាកាម អាចបន្តការសិក្សាទៅតាមបំណង និងចំណង់ចំណូលចិត្ត។
មុននឹងបញ្ចប់ លោករដ្ឋមន្ត្រី បានជំរុញឱ្យ “សាលាបាយ”លើកកម្ពស់កម្មវិធី សិក្សារបស់ខ្លួនឱ្យដល់កម្រិត សញ្ញាបត្រជាន់ខ្ពស់ បច្ចេកទេស(Diploma) ដើម្បីបំពេញតម្រូវការចាំបាច់ នៃការបណ្តុះបណ្តាលជំនាញ ដែលទីផ្សារកំពុងត្រូវការ ៕
