ភ្នំពេញ ៖ អំណោយដ៏ថ្លៃថ្លា របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកស្រី បណ្ឌិត ពេជ ចន្ទមុន្នី ហ៊ុនម៉ាណែត តាមរយៈលោក ឃួង ស្រេង អភិបាលរាជធានីភ្នំពេញ ចំនួន៥លានរៀល បាននាំយកទៅប្រគល់ជូនក្មេងស្រី អាយុ១៣ឆ្នាំម្នាក់ ដែលកំពុងសម្រាកព្យាបាល នៅក្នុងមន្ទីរពេទ្យ ដោយសារធ្លាក់ពីលើផ្ទះ ចូលប្រហោងជញ្ជាំងផ្ទះ ជាប់អស់ជាច្រើនម៉ោង នៅសង្កាត់បឹងកក់១ ខណ្ឌទួលគោក។
អំណោយដ៏ថ្លៃថ្លានេះ ត្រូវបានលោក ឃួង ស្រេង ចាត់ឲ្យតំណាងរបស់លោក នាំយកប្រគល់ជូន នាល្ងាចថ្ងៃទី៧មីនា នៅមន្ទីរពេទ្យគន្ធបុប្ផា ខណ្ឌដូនពេញ រាជធានីភ្នំពេញ។
អាណាព្យាបាលក្មេងស្រីរងគ្រោះ បានថ្លែងនូវការដឹងគុណយ៉ាងជ្រាលជ្រៅបំផុត ចំពោះសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកស្រី បណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែគិតគូរ ពីសុខទុក្ខរបស់ប្រជាពលរដ្ឋ ពិសេសនៅពេល ដែលពលរដ្ឋជួបទុក្ខលំបាក តែងជួយឧបត្ថម្ភជានិច្ច។
គួររំលឹកថា នៅក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ កាលពីវេលាម៉ោង ៦និង៣០ល្ងាចឆ្នាំ២០២៤ មានករណីក្មេងស្រីអាយុ១៣ឆ្នាំម្នាក់ បានធ្លាក់ពីលើផ្ទះ ចូលប្រហោងជញ្ជាំងផ្ទះ ជាប់អស់ជាច្រើនម៉ោង ពោលគឺនៅម៉ោងប្រមាណ១០យប់ ថ្ងៃដដែល ទើបត្រូវបាន ក្រុមសង្គ្រោះគ្រោះ មហន្តរាយ៧១១ របស់កងពលតូចលេខ៧០ ជួយសង្គ្រោះបាន ហើយដឹកបញ្ជូន ទៅកាន់មន្ទីរពេទ្យភ្លាមៗ ដើម្បីសង្គ្រោះជីវិត៕
