សាធារណរដ្ឋកូរ៉េ ៖ ក្នុងអំឡុងពេលបំពេញ ទស្សនកិច្ចនៅសាធារណរដ្ឋកូរ៉េលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឆ្លៀតពេលវេលា ពីជំនួបជាមួយភាគីកូរ៉េ បានចូលថ្វាយបង្គំ ព្រះបញ្ញាសត្ថាចារ្យ ពៅ សុភ័ក្រ្ត ព្រះរាជាគណៈថ្នាក់កិត្តិយស គង់នៅមជ្ឈមណ្ឌល ព្រះពុទ្ធសាសនាវត្តខ្មែរ-គូមី និងព្រះភិក្ខុ រិន សារ៉ូ ជយរក្ខិតោ គង់នៅមជ្ឈមណ្ឌលព្រះពុទ្ធសាសនាខ្មែរ ព្រមទាំងបានប្រគេនបច្ច័យសម្រាប់កសាងវត្ត។
ក្នុងឱកាសនោះ លោករដ្ឋមន្រ្តីបានកោតសរសើរ និងថ្លែងអំណរព្រះគុណ ប្រគេនដល់ព្រះថេរៈទាំង២អង្គ ដែលតែងតែមានចិត្តអាណិតស្រឡាញ់ និងជួយសម្របសម្រួលដល់ពលករកម្ពុជា ជាហេតុធ្វើឱ្យប្រជាពលរដ្ឋខ្មែរ នៅសាធារណរដ្ឋកូរ៉េ ចាត់ទុកមជ្ឈមណ្ឌលព្រះពុទ្ធសាសនាទាំងពីរ មិនត្រឹមតែជាវត្តខ្មែរ សម្រាប់ប្រតិបត្តិធម៌ និង ប្រពៃណីខ្មែរនោះទេ តែក៏ជាកន្លែងជួយសម្រួល ឱ្យពលករដែលប្តូរការងារ ស្នាក់អាស្រ័យបណ្តោះអាសន្នផងដែរ ។
ជាមួយគ្នានេះ ព្រះតេជគុណទាំងពីរអង្គ ក៏មានថេរដីកាថ្លែងអំណរគុណដល់ ឯកឧត្តម ដែលកន្លងមកតែងតែគាំទ្រ និងជួយកៀរគរបច្ច័យ ដើម្បីឱ្យគម្រោងនេះក្លាយជាការពិត។
បន្ទាប់ពីថ្វាយបង្គំព្រះតេជគុណរួច លោក ហេង សួរ ក៏បានជួបសួរសុខទុក្ខពលករកំពុងស្នាក់នៅក្នុងមជ្ឈមណ្ឌលព្រះពុទ្ធសាសនាទាំងពីរ និងណែនាំឱ្យពលករថែរក្សាសុខភាព ខិតខំរៀនបច្ចេកទេស និងជំនាញពីកន្លែងការងារ និងត្រូវចេះសន្សំថវិកាទុកជូនគ្រួសារ និងខ្លួនឯងប្រើប្រាស់នៅពេលអនាគត៕
