ភ្នំពេញ៖ លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បាននផ្ដាំផ្ញើដល់មន្ដ្រីរាជការទាំងអស់ឱ្យបន្ដ រក្សានិរន្តរភាពការងារ ដើម្បីធានាការងារដែលមានស្រាប់ និងបង្កើតកិច្ចខិតខំប្រឹងប្រែងអនុវត្តការងារថ្មីបន្ថែមទៀត ដោយបុរេសកម្ម និងការពង្រឹងគុណភាព ដោយការទទួលខុសត្រូវខ្ពស់។
ការផ្ដាំផ្ញើនេះ ធ្វើឡើងក្នុងឱកាស ដែលលោករដ្ឋមន្រ្តី អញ្ជើញដឹកនាំកិច្ចប្រជុំត្រួតពិនិត្យវឌ្ឍនភាព នៃការងារវិភាគមុខងារ និងធនធានរបស់ក្រសួងអភិវឌ្ឍន៍ជនបទ នៅព្រឹកថ្ងៃទី១៣ ខែឧសភា ឆ្នាំ២០២៤ ដោយអញ្ជើញជាវត្តមាន ដោយផ្ទាល់ពីសំណាក់ ថ្នាក់ដឹកនាំក្រសួង និងមន្ត្រីជំនាញ ព្រមទាំងប្រធានមន្ទីរ និងអនុប្រធាននៃមន្ទីរអភិវឌ្ឍន៍ជនបទទាំង ២៥ រាជធានី-ខេត្ត ចូលរួមតាមប្រព័ន្ធនិម្មិត (Zoom Meeting)។
ជាកិច្ចចាប់ផ្ដើម លោក ឈឹម សៅគី រដ្ឋលេខាធិការប្រចាំការបានធ្វើរបាយការណ៍ ជូនលោករដ្ឋមន្ត្រី ក៏ដូចជាអង្គប្រជុំទាំងមូល បន្ទាប់បទបង្ហាញសង្ខេបស្ដីពី វឌ្ឍនភាពនៃការវិភាគមុខងារ ធនធាន ហិរញ្ញវត្ថុ និងសម្ភារ របស់មន្ត្រីបច្ចេកទេសរបស់ក្រសួងអភិវឌ្ឍន៍ជនបទ។
បន្ទាប់ពីស្ដាប់របាយការណ៍ និងការធ្វើបទបង្ហាញរួចមក លោក ឆាយ ឫទ្ធិសែន បានពាំនាំនូវប្រសាសន៍ផ្ដាំផ្ញើសួរសុខទុក្ខ ប្រកបដោយក្តីនឹករលឹក និងការកោតសរសើរវាយតម្លៃខ្ពស់ពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង លោកជំទាវបណ្ឌិត ជូនចំពោះថ្នាក់ដឹកនាំ និងមន្ដ្រីរាជការគ្រប់លំដាប់ថ្នាក់ ទាំងនៅថ្នាក់ជាតិ និងថ្នាក់ក្រោមជាតិ ក្នុងការចាត់វិធានការ និងកិច្ចអន្តរាគមន៍ ដើម្បីដោះស្រាយលើការខ្វះខាតទឹកប្រើប្រាស់ និងទឹកបរិភោគ ដោយសារកត្តាប្រែប្រួលធាតុអាកាស។
លោករដ្ឋមន្ត្រី បានសម្ដែងនូវការកោតសរសើរ និងវាយតម្លៃខ្ពស់ចំពោះក្រុមការងារ ដែលបានខិតខំប្រឹងប្រែងធ្វើការវិភាគមុខងារថ្មីរបស់ក្រសួង ដោយទទួលបានលទ្ធផលជាវិជ្ជមាន ដើម្បីធានាឱ្យសម្រេចនូវចក្ខុវិស័យរបស់ក្រសួង គឺការលើកកម្ពស់គុណភាព និងគុណតម្លៃនៃជីវិតរស់នៅ របស់ប្រជាជន នៅតំបន់ជនបទប្រកបដោយបរិយាបន្ន ទាំងផ្នែកសេដ្ឋកិច្ច សង្គម និងវប្បធម៌។
លោករដ្ឋមន្ត្រី បានបន្ដថា មុខងារថ្មីរបស់ក្រសួង នឹងធានាបានដល់ការបំពេញតួនាទី ភារកិច្ច ដើម្បីបម្រើផលប្រយោជន៍ ជូនប្រជាពលរដ្ឋឱ្យមានប្រសិទ្ធភាព តាមរយៈការចាត់តាំងមន្ដ្រីឱ្យត្រូវតាមចំណេះដឹង ជំនាញបច្ចេកទេស និងមានចំនួនគ្រប់គ្រាន់ ស្របតាមគោលការណ៍កំណែទម្រង់រដ្ឋបាលសាធារណៈ និងចូលរួមសម្រេចឱ្យបានជោគជ័យ នូវយុទ្ធសាស្ត្របញ្ចកោណដំណាក់កាលទី១ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។
ជាមួយគ្នានេះ លោក ឆាយ ឫទ្ធិសែន បានបញ្ជាក់ថា នៅក្នុងឆ្នាំ២០២៤ នេះ ក្រសួងអភិវឌ្ឍន៍ជនបទ គ្រោងនឹងបញ្ចប់សេចក្ដីព្រាង គោលនយោបាយជាតិអភិវឌ្ឍន៍ជនបទឆ្នាំ២០២៥-២០៣៥ ដើម្បីចូលរួមសម្រេចនូវចក្ខុវិស័យកម្ពុជា មានប្រាក់ចំណូលមធ្យមកម្រិតខ្ពស់ ក្នុងឆ្នាំ២០៣០ និងប្រាក់ចំណូលកម្រិតខ្ពស់ក្នុងឆ្នាំ២០៥០។
លើសពីនេះទៀត លោករដ្ឋមន្ត្រី បានណែនាំដល់ក្រុមការងារ ចំពោះកិច្ចដាក់បញ្ចូលធាតុចូលថ្មីៗបន្ថែមទៀត ដែលទទួលបាននាឱកាសនេះ និងត្រូវរៀបចំឱ្យស្របទៅតាម ទម្រង់ឯកសារណែនាំ របស់ក្រសួងមុខងារសារណៈ៕
