ភ្នំពេញ ៖ សម្តេច ឃួន សុដារី ប្រធានរដ្ឋសភាកម្ពុជា បានវាយតម្លៃខ្ពស់ និងកោតសរសើរយ៉ាងក្រៃលែង អំពីជោគជ័យ នៃបេសកកម្មការទូតរបស់លោក វ៉ាង វិនធាន (Wang Wentian) ឯកអគ្គរដ្ឋទូតចិនប្រចាំកម្ពុជា ដែលជាផ្នែកសំខាន់មួយ ក្នុងការធ្វើ ឲ្យសម្រេចនូវរាល់ស្មារតី ឯកភាពគ្នារវាង ថ្នាក់ដឹកនាំកម្ពុជានិងចិន ដោយជាលទ្ធផលជាក់ស្តែងបម្រើ ដល់ផលប្រយោជន៍ប្រទេស និងប្រជាជនទំាងសងខាង។
សម្តេចបានវាយតម្លៃបែបនេះ ក្នុងឱកាសអនុញ្ញាតលោក លោក វ៉ាង វិនធាន ចូលជួបពិភាក្សាការងារនិងជម្រាបលា នាថ្ងៃ២៨ ឧសភា ។
![](https://dap-news.com/wp-content/uploads/2024/05/photo_2024-05-28_14-54-26-1024x682.jpg)
សម្តេចគូសបញ្ជាក់ថា លោក វ៉ាង វិនធាន ក៏ដូចជាឯកអគ្គរដ្ឋទូតមុនៗ បានរួមចំណែកយ៉ាងសំខាន់ និងមានតម្លៃដល់ការពង្រឹង ពង្រីកទំនាក់ទំនង និងកិច្ចសហប្រតិបត្តិការទ្វេភាគីបានកាន់តែស៊ីជម្រៅ និងទូលំទូលាយ ដោយបាននាំមកនូវផលប្រយោជន៍ដ៏ឧត្តុង្គឧត្តម ជូនប្រជាជននិងប្រទេសទាំងពីរ ហើយបន្តពង្រឹងមិត្តភាពដែកថែបជាប្រវត្តិសាស្រ្ត ក្លាយជាដៃគូយុទ្ធសាស្រ្តគ្រប់ជ្រុងជ្រោយ ក្នុងការកសាងសហគមន៍ជោគវាសនារួម កម្ពុជា-ចិន ក្នុងយុគសម័យថ្មី តាមរយៈកិច្ចសហប្រតិបត្តិត្បូងពេជ្រ និងផែនការសកម្មភាព ២០២៤-២០២៨ ប្រកបដោយគុណភាពខ្ពស់ កម្រិតខ្ពស់ និងស្តង់ដារខ្ពស់។
លោក វ៉ាង វិនធាន បានថ្លែងអំណរគុណដល់ សម្តេចក៏ដូចជារដ្ឋសភាកម្ពុជា ទំាងមូល បានគំាទ្រនិងផ្តល់កិច្ចសហការយ៉ាងល្អ ជាមួយស្ថានទូតចិនប្រចាំ នៅភ្នំពេញ ធ្វើឲ្យបេសកកម្មការទូតរបស់ឯកឧត្តមជិត៦ឆ្នាំមកនេះ ទទួលបានលទ្ធផលយ៉ាងធំធេង។
![](https://dap-news.com/wp-content/uploads/2024/05/photo_2024-05-28_14-54-31-1024x682.jpg)
ក្នុងនាមជាសាក្សីមួយដែលបានស្នាក់នៅ និងបំពេញការងារនៅកម្ពុជា លោកកោតសរសើរចំពោះការរីកចម្រើន និងសមិទ្ធផលសំខាន់ជាច្រើនរបស់កម្ពុជា ក្រោមការដឹកនាំ របស់សម្តេចតេជោ ហ៊ុន សែន អតីតនាយករដ្ឋមមន្រ្តី និងជាប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តីបន្តវេន ក្នុងអាណត្តិទី៧នេះ ជាពិសេសជោគជ័យរបស់កម្ពុជា នៅក្នុងការប្រយុទ្ធប្រឆំាងជំងឺកូវីដ-១៩ ជោគជ័យនៅក្នុងការស្តារសេដ្ឋកិច្ច សង្គមឡើងវិញ ក្រោយពីកូវីដ-១៩ ក៏ដូចជាជោគជ័យនៅក្នុងការធ្វើជាម្ចាស់ផ្ទះកិច្ចប្រជុំ ព្រឹត្តិការណ៍អន្តរជាតិជាច្រើន ដូចជាកិច្ចប្រជុំកំពូលអាស៊ាន (ASEAN Summit) ភាពជាដៃគូសភាអាស៊ី អ៊ឺរ៉ុប (ASEP) និងមហាសន្និបាតអាយប៉ា (AIPA)ដែលធ្វើឲ្យតួនាទីរបស់កម្ពុជា នៅលើឆាកអន្តរជាតិ កាន់តែត្រូវបានលើកកម្ពស់ និងសំខាន់ឡើង ៕
![](https://dap-news.com/wp-content/uploads/2024/05/photo_2024-05-28_14-54-37-1024x682.jpg)
![](https://dap-news.com/wp-content/uploads/2020/08/1-1.png)