ភ្នំពេញ ៖ អាជ្ញាធរ បានបញ្ឈប់ការ ប្រកបអាជីវកម្មទូកកាណូតទេសចរណ៍ឈ្មោះ «បុប្ផាអង្គរ» បន្ទាប់ពីម្ចាស់ទូកទទួលស្គាល់កំហុសថា ខ្លួន «ពិតជាបានបោះចោលសំរាម ចូលក្នុងទន្លេ ពិតប្រាកដមែន»។
ការបញ្ឈប់ប្រកបអាជីវកម្មទូកកាណូតទេសចរណ៍ឈ្មោះ «បុប្ផាអង្គរ» នេះ បន្ទាប់ពីមានហ្វេសប៊ុកឈ្មោះ Buntha Chheang បានសរសេរថា «សូមសមត្ថកិច្ចខណ្ឌដូនពេញ ជួយមើលទូកដឹកភ្ញៀវទេសចរមួយនេះ ដឹកសំរាមទៅបោះចោលក្នុងទន្លេ រួចបើកចូលមកខាងវិញ»។
![](https://dap-news.com/wp-content/uploads/2024/05/photo_2024-05-29_13-08-47-1024x682.jpg)
យោងតាមគេហទំព័រហ្វេសប៊ុក របស់រដ្ឋបាលខណ្ឌដូនពេញ នាថ្ងៃ២៩ ឧសភា បានឲ្យដឹងថា ក្រោយទទួលបានព័ត៌មាន ចែកចាយនៅតាមបណ្តាញសង្គម ពីគណនីហ្វេសបុកឈ្មោះ Buntha Chheang រួចមក នៅថ្ងៃដដែលនេះ រដ្ឋបាលខណ្ឌបានអញ្ជើញម្ចាស់ទូកកាណូតទេសចរណ៍ដែលមានឈ្មោះ បុប្ផាអង្គរ មកសាកសួរ ហើយម្ចាស់ទូកបានអះអាងទទួលស្គាល់ ថា «ពិតជាបានបោះចោលសំរាម ចូលក្នុងទន្លេពិតប្រាកដមែន»។
បន្ទាប់ពីបានធ្វើការសាកសួរ រដ្ឋបាលខណ្ឌ បានសម្រេច អប់រំណែនាំដល់ម្ចាស់ ទូកកាណូតទេសចរណ៍នេះ ឲ្យយល់ច្បាស់ពីច្បាប់ស្តីពីបរិស្ថាន។
ក្នុងនោះក៏មានការផាកពិន័យម្ចាស់ជាទឹកប្រាក់ចំនួន ២០០,០០០រៀល តាមជំពូកទី៧ នៃអនុក្រឹត្យលេខ ១១៣ អនក្រ.បក របស់ក្រសួងបរិស្ថាន និងការបញ្ឈប់អាជីវកម្មទូកកាណូត ជាស្ថាព័រចាប់ពីថ្ងៃនេះតទៅ ៕
![](https://dap-news.com/wp-content/uploads/2024/05/photo_2024-05-29_13-08-51.jpg)
![](https://dap-news.com/wp-content/uploads/2024/05/photo_2024-05-29_13-08-54.jpg)
![](https://dap-news.com/wp-content/uploads/2020/08/1-1.png)