ភ្នំពេញ ៖ នៅរាជធានីភ្នំពេញ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី៣ ខែមិថុនា ឆ្នាំ២០២៤នេះ បានអញ្ជើញបើកសិក្ខា សាលាថ្នាក់ជាតិ ស្តីពីប្រព័ន្ធព័ត៌មាន គ្រប់គ្រង ទិន្នន័យធនធានទឹក និងប្រព័ន្ធគ្រប់គ្រងហេដ្ឋារចនាសម្ព័ន្ធប្រព័ន្ធធារាសាស្ត្រ ដោយមានការអញ្ជើញ ចូលរួមពីថ្នាក់ដឹកនាំ និងមន្ត្រីរាជការក្រសួងធនធានទឹក និងឧតុនិយម លោក លោកស្រីតំណាងក្រសួងស្ថាប័នពាក់ព័ន្ធ តំណាងលោកអភិបាល នៃគណៈអភិបាលរាជធានី-ខេត្ត និងតំណាងដៃគូអភិវឌ្ឍន៍ ជាច្រើននាក់ផងដែរ។
ក្នុងឱកាសនោះ លោករដ្ឋមន្ត្រីបានបញ្ជាក់ថា ដោយអនុវត្តតាមយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពបត់បែន ឈ្លាសវៃ និងប៉ិនប្រសប់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងធនធានទឹក និងឧតុនិយម បានរៀបចំផែនការយុទ្ធសាស្ត្រ ដើម្បីទប់ស្កាត់ កាត់បន្ថយ និងបញ្ចៀសឱ្យបាននូវគ្រោះរាំងស្ងួត គ្រោះទឹកជំនន់ និងការកើនឡើងកម្ដៅ ធ្វើយ៉ាងណាឆ្លើយតប ទៅនឹងបញ្ចកោណទី៤ មុំទី៥ ការអភិវឌ្ឍប្រកបដោយភាពធន់ ចីរភាព និងបរិយាបន្ន ការធានាចីរភាពបរិស្ថាន និងការរៀបចំខ្លួនឆ្លើយតបទៅនឹង ការប្រែប្រួលអាកាសធាតុ ព្រមទាំងការលើកកម្ពស់សេដ្ឋកិច្ចបៃតង។
ជាមួយគ្នានេះ លោករដ្ឋមន្ត្រី បានលើកឡើងថា ក្រសួងមានតម្រូវការ ជាចាំបាច់នូវបរិក្ខារ និងឧបករណ៍បច្ចេកទេសទំនើបចុងក្រោយ ដែលមានសមត្ថភាព គណនា វិភាគ និង បង្ហាញនូវព័ត៌មាន ចំគោលដៅ និងទាន់ហេតុការណ៍ ដើម្បីជួយពង្រឹង ដល់ប្រព័ន្ធប្រកាសអាសន្ន និងការជូនដំណឹង ជាមុនដល់ប្រជាពលរដ្ឋ ងាយរងគ្រោះ ឱ្យត្រៀមលក្ខណៈប្រុងប្រយ័ត្ន ឈានទៅកាត់បន្ថយបាន គ្រោះមហន្តរាយធម្មជាតិនានា និងកាត់បន្ថយបានការខាត បង់ផ្នែកសេដ្ឋកិច្ចធ្ងន់ធ្ងរ ។
លោករដ្ឋមន្ត្រី មានប្រសាសន៍ឱ្យដឹងថា តាមរយៈគម្រោង កែលម្អវិស័យធារាសាស្ត្រកសិកម្ម មជ្ឈមណ្ឌលជាតិគ្រប់គ្រងទិន្នន័យ ធនធានទឹកត្រូវបាន សាងសង់ឡើង ដើម្បីបម្រើដល់ការគ្រប់គ្រង ប្រមូលទិន្នន័យ រក្សាទុក វិភាគ និងផ្តល់ព័ត៌មានស្តីពីទិន្នន័យទឹកភ្លៀង ជលសាស្ត្រ និងឧតុនិយម។ មជ្ឈមណ្ឌលជាតិនេះនឹងដើរតួយ៉ាងសំខាន់ក្នុងការធានាបាននូវការគ្រប់គ្រង និងផ្តល់ព័ត៌មានយ៉ាងមានប្រសិទ្ធភាព។
ទន្ទឹមនឹងនេះ លោករដ្ឋមន្ត្រី បានគូសបញ្ជាក់ថា ការសាងសង់មជ្ឈមណ្ឌលជាតិនេះ នឹងធ្វើឱ្យប្រទេសកម្ពុជាមានស្វ័យភាពលើការគ្រប់គ្រង ការព្យាករ និងវិភាគទិន្នន័យជលសាស្ត្រ និង ឧតុនិយម សម្រាប់អន្តរវិស័យផងដែរ ហើយជាផ្នែកមួយនៃយុទ្ធសាស្រ្តជាក់លាក់ និងមានលក្ខណៈគ្រប់ជ្រុងជ្រោយ របស់ក្រសួង ក្នុងការធ្វើទំនើបកម្មហេដ្ឋារចនាសម្ព័ន្ធទឹកឱ្យកាន់តែល្អប្រសើរ និងកាន់តែមានភាពធន់នឹងការប្រែប្រួលអាកាសធាតុ។
ឆ្លៀតក្នុងឱកាសនោះដែរ លោករដ្ឋមន្ត្រី បានស្នើដល់អង្គភាពពាក់ព័ន្ធទាំងអស់ ត្រូវអនុវត្តឱ្យបានម៉ឺងម៉ាត់ និងមុតស្រួចនូវបេសកកម្មរបស់ក្រសួង ជាពិសេសការជូនព័ត៌មានអាកាសធាតុ ប្រព័ន្ធព្រមានទុកជាមុន និងការផ្តល់ព័ត៌មានជាសាធារណៈទាន់សភាពការណ៍ ដើម្បីធ្វើការគ្រប់គ្រងទឹក បញ្ជាទឹក និងប្រើប្រាស់ទឹកឱ្យកាន់តែមានសុក្រឹតភាព។ ឯកឧត្តមរដ្ឋមន្ត្រីសង្ឃឹមថា តាមរយៈសិក្ខាសាលានាពេលនេះនឹងមានការពិភាក្សាយ៉ាងល្អិតល្អន់ និងផ្តល់ធាតុចូលយ៉ាងសំខាន់ ដើម្បីឈានទៅរកការកែលម្អប្រព័ន្ធគ្រប់គ្រងធនធានទឹកនៅកម្ពុជាឱ្យបានកាន់តែប្រសើរឡើង។
លោករដ្ឋមន្រ្តីក៏បានថ្លែងអំណរគុណ ដល់គ្រប់ដៃគូអភិវឌ្ឍន៍ទាំងអស់ ជាពិសេស ធនាគារអភិវឌ្ឍន៍អាស៊ី(ADB) ដែលជាដៃគូយុទ្ធសាស្រ្តគ្រប់ជ្រុងជ្រោយ និងជានិច្ចកាលតែងតែសហការផ្តល់ហិរញ្ញប្បទាន ក្នុងការអភិវឌ្ឍវិស័យធនធានទឹក និងឧតុនិយមក្នុងព្រះរាជាណាចក្រកម្ពុជា ឱ្យមានភាពរីកចម្រើន ឆ្លើយតបទៅនឹងបរិការណ៍ នៃការប្រែប្រួលអាកាសធាតុសកល ៕
