ភ្នំពេញ ៖ ក្នុងជំនួបពិភាក្សា ការងារជាមួយ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា នាថ្ងៃទី៤ ខែមិថុនា ឆ្នាំ២០២៤ លោក ខេលវិន ម៉ូ (Kelvin Mo) ប្រធានការិយាល័យតំណាងសភា ពាណិជ្ជកម្មកម្ពុជា ប្រចាំទីក្រុងម៉ុងរ៉េអាល់ ប្រទេសកាណាដា បានលើកឡើងថា កម្ពុជា ធ្វើជាម្ចាស់ផ្ទះកិច្ចប្រជុំកំពូល ហ្វ្រង់កូហ្វូនី ឆ្នាំ២០២៦ ដែលនឹងទាក់ទាញវិនិយោគិន និងទេសចរ បន្ថែមទៀត មកពីបណ្ដាប្រទេស និយាយភាសាបារាំង។
![](https://dap-news.com/wp-content/uploads/2024/06/photo_2024-06-04_15-10-27-681x1024.jpg)
ក្នុងឱកាសនៃជំនួប លោក ខេលវិន ម៉ូ បានវាយតម្លៃខ្ពស់ ចំពោះការអភិវឌ្ឍរីកចម្រើន យ៉ាងឆាប់រហ័ស របស់កម្ពុជា ជាពិសេសការសម្រេច បាននូវកំណើនសេដ្ឋកិច្ចខ្ពស់ និងមានចីរភាព ក្រោមការដឹកនាំប្រកបដោយភាពឈ្លាសវៃ របស់សម្ដេចធិបតី។
![](https://dap-news.com/wp-content/uploads/2024/06/photo_2024-06-04_15-10-13-1024x786.jpg)
ជាមួយគ្នានេះ លោក ខេលវិន ម៉ូ ក៏បានអបអរសាទរ ចំពោះកម្ពុជា ដែលនឹងធ្វើជាម្ចាស់ ផ្ទះកិច្ចប្រជុំកំពូលហ្វ្រង់កូហ្វូនី ឆ្នាំ២០២៦ ដែលតាមរយៈកិច្ច ប្រជុំកំពូលនេះ កម្ពុជានឹងមានលទ្ធភាពកាន់តែច្រើនបន្ថែមទៀត ក្នុងការទាក់ទាញវិនិយោគិន និងទេសចរ មកពីបណ្ដាប្រទេសប្រើប្រាស់ភាសាបារាំង ។ បន្ថែមលើនេះ លោកខេលវិន ម៉ូ បានគោរពជម្រាបជូន សម្ដេចធិបតី ថា គោលបំណង នៃដំណើរទស្សនកិច្ចរបស់រូបលោក និងគណៈប្រតិភូ ដើម្បីស្វែងយល់បន្ថែមទៀតអំពីសក្ដានុពល និងកាលានុវត្តភាពនៃការវិនិយោគរបស់កម្ពុជា គោលនយោបាយ យុទ្ធសាស្ត្រ របស់រាជរដ្ឋាភិបាលកម្ពុជា ក្នុងការទាក់ទាញវិនិយោគ និង គោរពស្នើសុំអនុសាសន៍ណែនាំរបស់សម្ដេចធិបតី ក្នុងការជំរុញ និងផ្សារភ្ជាប់ទំនាក់ទំនងនៃការវិនិយោគរវាងកម្ពុជា និងកាណាដាឱ្យកាន់ តែល្អប្រសើរថែមទៀត។
![](https://dap-news.com/wp-content/uploads/2024/06/photo_2024-06-04_15-10-21-1024x898.jpg)
ជាការឆ្លើយតប សម្តេចធិបតី បានគូសបញ្ជាក់ថា ការិយាល័យតំណាងសភាពាណិជ្ជកម្មកម្ពុជា នៅក្រៅប្រទេស ត្រូវបានបង្កើតឡើង នៅតាមបណ្ដាប្រទេស មួយចំនួនដូចជា សហរដ្ឋអាមេរិក អូស្ត្រាលី ជប៉ុន ហើយបច្ចុប្បន្នកំពុង ត្រូវបានបង្កើតបន្ថែមនៅប្រទេសបារាំង និងបណ្ដាប្រទេសក្នុងសហភាពអឺរ៉ុប ក្នុងគោល បំណងផ្សារភ្ជាប់ទំនាក់ទំនង លើវិស័យពាណិជ្ជកម្ម និងវិនិយោគរវាងកម្ពុជាជាមួយបណ្តាប្រទេសនានា ក៏ដូចជាទំនាក់ទំនងរវាងប្រជាជន និងប្រជាជនផងដែរ។ ជាក់ស្តែង ការិយាល័យតំណាងសភាពាណិជ្ជកម្មកម្ពុជា ប្រចាំទីក្រុងម៉ុងរ៉េអាល់ បានដើរតួនាទីជាស្ពានភ្ជាប់ទំនាក់ទំនងរវាងប្រជាជន និងប្រជាជន នៃប្រទេសទាំងពីរ ក៏ដូចជាវិនិយោគិនផងដែរ។
![](https://dap-news.com/wp-content/uploads/2024/06/photo_2024-06-04_15-10-34-1024x681.jpg)
សម្ដេចធិបតី សង្ឃឹមយ៉ាងមុតមាំថា ការិយាល័យតំណាង សភាពាណិជ្ជកម្មកម្ពុជា ប្រចាំទីក្រុងម៉ុងរ៉េអាល់ នឹងសហការជិតស្និទ្ន ជាមួយសភាពាណិជ្ជកម្មកម្ពុជា ដើម្បីពង្រីកសក្ដានុពល និង កាលានុវត្តភាពនៃការវិនិយោគ និងពាណិជ្ជកម្ម រវាងប្រទេសទាំងពីរ និងបានស្នើដល់ការិយាល័យ តំណាងសភាពាណិជ្ជកម្មកម្ពុជា ប្រចាំទីក្រុងម៉ុងរ៉េអាល់ ជួយបំពេញនូវកិច្ចការជាអាទិភាពចំនួន២ រួមមាន៖ (១) ផ្សព្វផ្សាយពីសក្ដានុពលនៅកម្ពុជា លើវិស័យពាណិជ្ជកម្ម ទេសចរណ៍ និងកាលានុវត្តភាពនៃការវិនិយោគនៅកម្ពុជា និង (២) គាំទ្រគំនិតផ្ដួចផ្ដើមរបស់រាជរដ្ឋាភិបាលកម្ពុជា ក្នុងការជំរុញ ពាណិជ្ជកម្មកម្ពុជា-កាណាដា ក៏ដូចជាការបំពេញតួនាទី ជាអ្នកសម្របសម្រួល ក្នុងកិច្ចចរចាពាណិជ្ជកម្ម និងការនាំចេញផលិតផលរបស់កម្ពុជា ទៅកាន់ប្រទេសកាណាដា។
![](https://dap-news.com/wp-content/uploads/2024/06/photo_2024-06-04_15-10-39-1024x681.jpg)
សម្ដេចធិបតី បានគូសបញ្ជាក់ថា កម្ពុជាកំពុងត្រៀមរៀបចំកិច្ចប្រជុំកំពូលហ្វ្រង់កូហ្វូនី ឆ្នាំ២០២៦ ព្រមទាំងបានគូសរំលេចពីគំនិតផ្ដួចផ្ដើមរបស់សម្ដេចធិបតី ក្នុងការបង្កើតនូវមជ្ឈមណ្ឌលវប្បធម៌ និងភាសាបារាំង ថ្នាក់តំបន់ នៅក្នុងប្រទេសកម្ពុជា សម្រាប់បម្រើឱ្យការផ្សព្វផ្សាយ វប្បធម៌បារាំង និង ការបណ្តុះបណ្តាល ភាសាបារាំង ដល់ប្រជាជន នៃបណ្តាប្រទេសនៅក្នុងតំបន់អាស៊ី ៕
![](https://dap-news.com/wp-content/uploads/2024/06/photo_2024-06-04_15-10-44-1024x681.jpg)
![](https://dap-news.com/wp-content/uploads/2024/06/photo_2024-06-04_15-10-48-1024x681.jpg)
![](https://dap-news.com/wp-content/uploads/2020/08/1-1.png)