ត្រឹមមួយយប់រុស្សី បាញ់ទំលាក់ដ្រូនអ៊ុយក្រែន អស់ជាង១០០គ្រឿង

បរទេស៖ យោងតាមការចេញផ្សាយរបស់ RT ក្រសួងការពារជាតិនៃប្រទេសរុស្សីបាននិយាយថា យោធារុស្ស៊ីបានវាយលុកការវាយឆ្មក់របស់យន្តហោះគ្មានមនុស្សបើករបស់អ៊ុយក្រែនទ្រង់ទ្រាយធំជាច្រើន ដោយបានបាញ់ទម្លាក់ UAV ចំនួន ១១៤ គ្រឿងពេញមួយយប់ និងស្ទាក់ចាប់យន្តហោះគ្មានមនុស្សបើករបស់កងទ័ពជើងទឹកចំនួន ៦ នៅសមុទ្រខ្មៅផងដែរ។

យោធាបាននិយាយនៅក្នុងសេចក្តីថ្លែងការណ៍ខ្លីមួយកាលពីថ្ងៃសុក្រថា អង្គភាពការពារដែនអាកាសរុស្ស៊ីបានរារាំង ការប៉ុនប៉ងរបស់របបក្រុងគៀវ ដើម្បីអនុវត្តការវាយប្រហារភេរវកម្មដោយប្រើទូកគ្មានមនុស្សបើក និងយន្តហោះប្រភេទ UAVs លើហេដ្ឋារចនាសម្ព័ន្ធរុស្ស៊ី។

យ៉ាងហោចណាស់មានយន្តហោះគ្មានមនុស្សបើកចំនួន៧០គ្រឿងត្រូវបានស្ទាក់ចាប់នៅលើទឹកដីនៃគ្រីមៀ ខណៈដែលកងនាវាសមុទ្រខ្មៅបានតាមដាន និងបំផ្លាញយានគ្មានមនុស្សបើកចំនួន៦គ្រឿង។

យោធាបានបន្ថែមថា យន្តហោះគ្មានមនុស្សបើកចំនួន៤៣គ្រឿងផ្សេងទៀតត្រូវបានទម្លាក់នៅតំបន់ Krasnodar ខណៈដែល UAV មួយត្រូវបានស្ទាក់ចាប់នៅក្នុងតំបន់ Volgograd ។

គួរឲ្យដឹងដែរថាយោធាអ៊ុយក្រែនបានចាប់ផ្តើមការវាយប្រហាររុស្សីដោយយន្តហោះគ្មានមនុស្សបើក UAV លើតំបន់ព្រំដែនរុស្ស៊ី ចាប់តាំងពីការចាប់ផ្តើមនៃជម្លោះក្នុងខែកុម្ភៈ ឆ្នាំ២០២២ ជាមួយនឹងការវាយឆ្មក់ជាច្រើនផ្តោតលើហេដ្ឋារចនាសម្ព័ន្ធសំខាន់ៗ និងតំបន់លំនៅដ្ឋាន៕ ប្រែសម្រួល៖ស៊ុនលី