សម្ព័ន្ធសហជីពជាតិ ព្រមានចាត់វិធានការច្បាប់ ប្តឹងអង្គការសង់ត្រាល់ ក្រោយសារភាព ពីការគ្មានវិជ្ជាជីវៈ និងគ្មានវិទ្យាសាស្ត្រ

ភ្នំពេញ ៖ ថ្លែងក្នុង សន្និសីទ សារព័ត៌មាននៅរសៀលថ្ងៃទី ២៨ ខែមិថុនានេះ​ លោក ហ្វា សាលី ប្រធានសម្ព័ន្ធសហជីពជាតិ(NTUC) ថា នឹងចាត់វិធានការ ផ្លូវច្បាប់ ដើម្បីប្តឹង មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បើអង្គការនេះនៅតែ មិនព្រមបង្ហាញភស្តុតាងជាក់លាក់ ដែលចេញក្នុងរបាយការណ៍ កាលពីថ្ងៃទី៤ ខែមិថុនា ដែលចោទថាសិទ្ធិសេរីភាសហជីព កម្មករនិយោជិតនៅកម្ពុជាទាំងមូល ត្រូវបានរឹតត្បិត។

លោកហ្វា សាលី បានលើកបានលើកឡើងថា របាយការណ៍របស់សង់ត្រាល់ ដែលគ្មានមូលដ្ឋានច្បាស់លាស់ គ្មានក្រមសីលធម៌ វិជ្ជាជីវៈ ធ្វើឱ្យប៉ះពាល់ដល់ទីផ្សារ ការងារ របស់និយោជិត និងប៉ះពាល់ដល់ការសម្រេចចិត្ត របស់អ្នកវិនិយោគជាតិ និងអន្តរជាតិ ដោយយល់ច្រឡំថា កម្ពុជាមិនមានច្បាប់ការងារត្រឹមត្រូវ ។ លោកក៏បានសម្តែងការសោកស្តាយ នៅពេលដឹងថាក្នុងរយៈពេលថ្មីៗនេះ មន្ត្រីអង្គការសង់ត្រាល់ បានលើកឡើងថា កម្ពុជាមានសហជីពក្លែងក្លាយ សហជីពរណបរដ្ឋាភិបាល និងសហជីពពណ៌លឿង ដែលការលើកឡើងនេះជាការលាបពណ៌ បែងចែក ញុះញង់ ឱ្យមានជម្លោះសហជីព ។

ប្រភពដដែលបានលើកឡើងទៀតថា មន្ត្រីអង្គការសង់ត្រាល់ ឈ្មោះ ឃុន ថារ៉ូ បាននិយាយថា របាយការណ៍អង្គការសង់ត្រាល់ជារបាយការណ៍ស្រមោល ដែលវាយតម្លៃស្ថានភាពកម្មករនិយោជិតនៅកម្ពុជា តាមរយៈការសម្ភាសន៍តែ សហជីព១០ ក្នុងចំណោមរោងចក្រជាង ១ ០០០ រោងចក្រនៅកម្ពុជា ជារបាយការណ៍គ្មានមូលដ្ឋាន ដែលមិនអាចទទួលយកបានឡើយ។

លោកថ្លែងថា៖«អង្គការមួយទាំងមូលទៅធ្វើរបាយការណ៍ស្រមោល ឱ្យបរទេសគេមើលមកថាកម្ពុជាខ្មៅងងឹត សេរីភាពត្រូវបានបិទបាំង ត្រូវបានរំលោភ អាហ្នឹងគឺយើងទទួលយកអត់បានទេ វាធ្វើឱ្យប៉ះពាល់ទៅដល់សេដ្ឋកិច្ចជាតិ ធ្វើឱ្យបងប្អូនកម្មករនិយោជិតយើង បាត់បង់ការងារធ្វើ»។

លោក ហ្វា សាលី បន្ថែមថា របាយការណ៍សង់ត្រាល់ ធ្វើឱ្យប៉ះពាល់ដល់កិត្តិយស មុខមាត់ប្រទេសជាតិ និងធ្វើឱ្យមានការស្រពិចស្រពិល សម្រាប់អ្នកវិនិយោគ ដែលគ្រោងចូលមកដាក់ទុនវិនិយោគនៅកម្ពុជា ក៏ដូចជាវិនិយោគទុន ដែលកំពុងវិនិយោគនៅកម្ពុជា។ជាមួយគ្នានោះ ក៏ធ្វើឱ្យប៉ះពាល់ដល់ស្ថេរភាព នៅក្នុងប្រទេសកម្ពុជា ជាពិសេប៉ះពាល់ដល់ការងាររបស់កម្មករ និយោជិតរាប់ម៉ឺននាក់។

ផ្ទុយពីការលើកឡើង របស់អង្គការសង់ត្រាល់ ដែលថាសិទ្ធិសេរីភាពកម្មករនិយោជិតនៅកម្ពុជា កំពុងត្រូវបានរឹតត្បឹតធ្ងន់ធ្ងរ លោក ហ្វា សាលី បញ្ជាក់ថា ជាក់ស្តែងការអនុវត្តន៍សេរីភាពកម្មករនិយោជិតនៅកម្ពុជាពេញលេញល្អ ទាំងការនិយាយស្តី ការដង្ហែក្បួន និងការធ្វើបាតុកម្មផ្សេងៗ។ ជាមួយគ្នានោះអត្ថប្រយោជន៍ របស់កម្មករនិយោជិត កាន់តែល្អ ប្រសើរជាមួយលក្ខខណ្ឌការងារ ព្រមទាំងការជួយសម្រួលការតបណ្តាញទឹក បណ្តាញអគ្គិសនី ដល់បងប្អូនកម្មករនិយោជិត តាមបន្ទប់ជួល ការផ្តល់ប្រាក់រង្វាន់ធ្វើការងារទៀតទាត់ សោហុយធ្វើដំណើរ និងជួយបង់បន្ទុក បសស ជាដើម ផងដែរ ។

លោកប្រធានសម្ព័ន្ធសហជីពជាតិ នៅតែទាមទារដ៏ទទួច ឱ្យអង្គការសង់ត្រាល់ បង្ហាញភស្តុតាងជាក់ស្តែង ថាតើសហជីព១៤ ដែលអង្គការនេះ ធ្វើការសិក្សាស្រាវជ្រាវរោងចក្រណាខ្លះ ហើយថាតើការដាក់នៅក្នុងបញ្ជីខ្មៅ ដូចសង់ត្រាល់លើកឡើងនោះ តើដាក់ចូលតាមរបៀបណា ហេតុអ្វីអង្គការមួយនេះ ហ៊ានវាយតម្លៃថា សិទ្ធិសេរីភាពសហជីពនៅកម្ពុជាទាំងមូលកំពុង ត្រូវបានរំលោភបំពាន រឹតត្បិតខ្លាំង ៕