ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានសម្រេចផ្តល់ក្របខ័ណ្ឌរដ្ឋដល់ លោក គង់ បុរាណ ត្រូវជាកូនប្រុសបង្កើត លោកតា គង់ ណៃ ព្រឹទ្ធាចារ្យចាប៉ីដងវែង ដ៏ល្បីល្បាញរបស់កម្ពុជា។
![](https://dap-news.com/wp-content/uploads/2024/07/449602699_807598251493256_6709193431560462890_n.jpg)
ការផ្ដល់ក្របខ័ណ្ឌនេះ បន្ទាប់ពីហ្វេសប៊ុកមួយឈ្មោះ Boran Kong ដែលគេស្គាល់ថា ជាកូនប្រុសបង្កើតរបស់លោកតាគង់ ណៃបានសរសេរថា «ខ្ញុំបាទឈ្មោះ គង់ បុរាណ កូនប្រុសតែម្នាក់គត់ក្នុងចំណោមបងប្អូន ១០នាក់ ដែលបានបន្តវេនចាប៉ីពីលោកឪពុក គង់ ណៃ តែសព្វថ្ងៃខ្ញុំមិនទាន់មានក្របខណ្ឌរដ្ឋនៅឡើយទេ ខ្ញុំចង់បាន ក្របខណ្ឌរដ្ឋមួយកន្លែងដើម្បីជួយបម្រើរដ្ឋ ដូចពុកខ្ញុំ និងជីវភាពសម្រាប់ថ្ងៃខាងមុខ។ ដូច្នេះសូមពុកម៉ែបងប្អូនអ៊ុំយាយតាជួយស៊ែរផង ក្រែងដំណឹងនេះ ជ្រាបដល់ប្រមុខថ្នាក់ដឹកនាំ រាជរដ្ឋាភិបាលលោកជ្រាប សូមអរគុណ និងអរព្រះគុណ»។
![](https://dap-news.com/wp-content/uploads/2024/07/photo_2024-07-11_09-39-25-580x1024.jpg)
ក្រោយឃើញបែបនេះ តាមរយៈបណ្តាញសង្គម នៅថ្ងៃទី១១ កក្កដា សម្ដេចធិបតីបញ្ជាក់ត្រឡប់ទៅវិញថា «ខ្ញុំបានឃើញសាររបស់ប្អូនប្រុស គង់ បុរាណ ដែលត្រូវជាកូនប្រុសបង្កើតរបស់លោកតា គង់ ណៃ ដែលប្អូនបានស្នើសុំចូលបម្រើក្នុងក្របខ័ណ្ឌរដ្ឋ ដើម្បីបានដើរតាមគន្លងរបស់លោកឪពុក ហើយជាពិសេសប្អូនមានជំនាញចាប៉ី ដែលអាចបន្តវេនពីលោកឪពុករបស់ប្អូន ។ ខ្ញុំឯកភាពតាមសំណើរបស់ប្អូនប្រុស គង់ បុរាណ។ ខ្ញុំបានប្រគល់ភារកិច្ចជូនឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងលោកជំទាវ រដ្ឋមន្ត្រីក្រសួងវប្បធម៌ និងវិចិត្រសិល្បៈ ដើម្បីរៀបចំកិច្ចការងារនេះ។ សូមជូនពរប្អូនប្រុស ទទួលបានជោគជ័យក្នុងការបន្តវេនចាប៉ីពីលោកតា គង់ ណៃ»។
![](https://dap-news.com/wp-content/uploads/2024/07/photo_2024-07-11_09-47-11.jpg)
សូមរំលឹកថា ការស្នើរបស់កូនប្រុសលោកតា គង់ ណៃ នេះ ក៏ធ្វើឡើងបន្ទាប់ពីព្រឹទ្ធាចារ្យចាប៉ីដងវែង ដែលត្រូវជាឪពុកជាធនធានសិល្បៈដ៏សំខាន់បំផុត និងជាមរតកមនុស្សរស់ បានទទួលអនិច្ចកម្ម កាលពីថ្ងៃទី២៨ មិថុនា នៅឯស្រុកកំណើត ក្នុងជន្មាយុ ៨០ឆ្នាំ ៕
![](https://dap-news.com/wp-content/uploads/2020/08/1-1.png)