ភ្នំពេះ៖ ការប្រឡងជ្រើសរើសមន្ត្រីជាប់កិច្ចសន្យារយៈពេលខ្លី សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ នៅថ្ងៃទី១៦ ខែកក្កដា ឆ្នាំ២០២៤ ត្រូវបានរៀបចំឡើងដោយ គណៈកម្មាធិការជាតិរៀបចំការបោះឆ្នោត (គ.ជ.ប) តាមរយៈលេខាធិការរដ្ឋានរាជធានី ខេត្តរៀបចំការបោះឆ្នោតចំនួន ១២។
ក្នុងឱកាសអញ្ជើញជាកិត្តិយស កាត់កញ្ចប់វិញ្ញាសាប្រឡងជ្រើសរើសមន្ត្រីជាន់កិច្ចសន្យារយៈពេលខ្លី នៅមណ្ឌលរាជធានីភ្នំពេញ លោក ហ៊ឺ រ៉ុង អគ្គលេខាធិការរង គ.ជ.ប.និងជាប្រធានអនុគណៈកម្មការរៀបចំការប្រឡងជ្រើសរើសមន្ត្រីជាប់កិច្ចសន្យារយៈពេលខ្លី សម្រាប់មណ្ឌលខេត្តកណ្តាល និងរាជធានីភ្នំពេញ បានបញ្ជាក់ថា មន្ត្រីដែលមានសមត្ថភាព និងបទពិសោធន៍គ្រប់គ្រាន់ ត្រូវបានជ្រើសរើសឱ្យបំពេញការងារសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ តាមរយៈការចូលរួមការប្រឡងប្រកួតប្រជែង យកសមត្ថភាពពិតប្រាកដ និងស្មើភាព សំដៅធានាឱ្យដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ ប្រព្រឹត្តទៅដោយរលូនល្អ។
លោក ហ៊ឺ រ៉ុង ក៏បានសង្កត់ធ្ងន់ថា គ.ជ.ប. យកចិត្តទុកដាក់ខ្ពស់លើការជ្រើសរើសមន្ត្រីឱ្យបំពេញការងារនៅតាម
លេខាធិការដ្ឋានរាជធានី ខេត្តរៀបចំការបោះឆ្នោត សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៤ ដើម្បីធានាបាននូវនិរន្តរភាព និងប្រសិទ្ធភាពការងារ។
សូមជម្រាបជូនថា សម្រាប់មណ្ឌលប្រឡងរាជធានីភ្នំពេញ តម្រូវការជ្រើសរើសបេក្ខជនសរុបចំនួន ៣៣ រូប តាមមុខតំណែងដូចខាងក្រោម៖
– គ្រូបង្ហាត់ ចំនួន ២៨រូប
– លេខាធិការ ចំនួន ១រូប
– ការីកុំព្យូទ័រ ចំនួន ១រូប
– អ្នកបើកបររថយន្ត ចំនួន ១រូប
– ជំនួយការគណនេយ្យ ចំនួន ១រូប
– ជំនួយការសេវាកម្មច្បាប់ និងវិវាទកម្ម ចំនួន ១រូប៕
