ភ្នំពេញ ៖ ក្រសួងការងារ និងបណ្តុះបណ្តាល វិជ្ជាជីវៈនៅថ្ងៃទី១៩ ខែកក្កដា ឆ្នាំ២០២៤ បានបើកវគ្គបណ្តុះបណ្តាល ជំនាញទន់ស្តីអំពី «ការទំនាក់ទំនង ការដោះស្រាយបញ្ហា និងការបំពេញការងារ ជាក្រុម» ដល់មន្រ្តីក្រុមការងារឆ្លើយតប និងផ្តល់ព័ត៌មាន ពាក់ព័ន្ធនឹងសេវាសាធារណៈ (Call Centre) នៃក្រសួងការងារ និងបណ្តុះបណ្តាលវិជ្ជាជីវៈ។
![](https://dap-news.com/wp-content/uploads/2024/07/IMG_20240720_073146_970-1024x682.jpg)
ការបណ្តុះបណ្តាលនេះធ្វើឡើងនៅសាលប្រជុំជាន់ទី១៣ នៃអគារទីស្នាក់ការ ប.ស.ស. នៅថ្ងៃទី១៩ ខែកក្កដា ឆ្នាំ២០២៤ (ក្រុមទី១) និងនៅថ្ងៃទី ២៥ ខែកក្កដា ឆ្នាំ២០២៤ (ក្រុមទី២) ពីម៉ោង៨:០0នាទី ដល់ម៉ោង ៥:00 រសៀល ក្រោមអធិបតីភាព លោក កត្តា អ៊ន រដ្ឋលេខាធិការ និងជាប្រធាន ក្រុមការងារ ឆ្លើយតប និងផ្តល់ព័ត៌មានពាក់ព័ន្ធ នឹងសេវាសាធារណៈ នៃក្រសួងការងារ និងបណ្តុះបណ្តាលវិជ្ជាជីវៈ និងលោកបណ្ឌិត ហេង សុផាន់ណារិទ្ធ អគ្គនាយករង ប.ស.ស. និងជាអនុប្រធានក្រុមការងារឆ្លើយតប និងផ្តល់ព័ត៌មានពាក់ព័ន្ធ នឹងសេវាសាធារណៈ។
![](https://dap-news.com/wp-content/uploads/2024/07/IMG_20240720_073105_656-1024x682.jpg)
លោក កត្តា អ៊ន បានលើកឡើងថា ការរៀបចំវគ្គបណ្តុះបណ្តាល ជំនាញទន់ដល់ ក្រុមការងារឆ្លើយតប និងផ្តល់ព័ត៌មាន ពាក់ព័ន្ធនឹងសេវាសាធារណៈ(Call Center) ក្នុងគោលបំណងដើម្បីបង្កើន សមត្ថភាពដល់មន្រ្ដី Call Center ក្នុងការផ្តល់សេវាសាធារណៈ ជូនសាធារណជន។
![](https://dap-news.com/wp-content/uploads/2024/07/IMG_20240720_073056_806-1024x682.jpg)
លោករដ្ឋលេខាបន្តថា ក្រុមការងារឆ្លើយតប និងផ្តល់ព័ត៌មានពាក់ព័ន្ធ នឹង សេវាសាធារណៈ នៃក្រសួងការងារ ត្រូវធ្វើការឱ្យបានសកម្ម និងមានប្រសិទ្ធភាព ក្នុងការឆ្លើយតបមតិយោបល់ សំណួរ និងបញ្ហារបស់សាធារណជន បានទាន់ពេលវេលា និងឆាប់រហ័ស។ លើសពីនេះផងដែរក្រុមការងារត្រូវអនុវត្តភារកិច្ចប្រកបដោយក្រមសីលធម៌ វិជ្ជាជីវៈ និងមានកិច្ចសហការយ៉ាងល្អ ជាមួយអង្គភាពពាក់ព័ន្ធ ដើម្បីឆ្លើយតបបញ្ហា សំណូមពរ និងសំណួររបស់បងប្អូន ប្រជាពលរដ្ឋប្រកបដោយប្រសិទ្ធភាព។
![](https://dap-news.com/wp-content/uploads/2024/07/IMG_20240720_073100_778-1024x682.jpg)
លោករដ្ឋលេខាធិការបញ្ជាក់សារឡើងវិញថា ក្រុមការងារ រង់ចាំទទួលការហៅទូរសព្ទ ចូលរបស់សាធារណជន ២៤ម៉ោងលើ២៤ម៉ោង និង ៧ថ្ងៃក្នុងមួយសប្តាហ៍ តាមរយៈប្រព័ន្ធទូរសព្ទ Hotline ទាំងពីរខ្សែគឺ ១២៨៦ និង១២៩៧ ដែលរួមមាន លើសេវាបញ្ជិកានិងភាគទាន បេឡាជាតិសន្តិសុខសង្គម (ប.ស.ស), សេវាពាក់ព័ន្ធវិស័យការងារ, កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស(TVET 1.5M), វិវាទការងារ, មុខរបរ និងការងារ(NEA), តាវកាលិក ប.ស.ស, សេវាមូលដ្ឋានសុខាភិបាលដៃគូ ប.ស.ស, ប្រាក់ឧត្ថម្ភរាជរដ្ឋាភិបាល រួមនិងសេវាផ្សេងៗទៀតរបស់ក្រសួង។
![](https://dap-news.com/wp-content/uploads/2024/07/IMG_20240720_073119_842-1024x682.jpg)
ទន្ទឹមនឹងនេះ លោក កត្តា អ៊ន ក៏បានអំពាវនាវ ដល់សាធារណជន ក្នុងករណី មានចម្ងល់ ឬតម្រូវការអ្វីមួយ សូមធ្វើការ ទាក់ទង មកកាន់ក្រុមការងារ ដែលនេះជាកិច្ចសហការរវាងក្រុមការងារ និងសាធារណជន ក្នុងកិច្ចការបម្រើសេវា សាធារណៈ។ លើសពីនេះទៀត លោកក៏លើកទឹកចិត្ត ដល់មន្ត្រី បុគ្គលិកនៃក្រុមការងារ បន្តអនុវត្តតួនាទីភារកិច្ច របស់ខ្លួនធ្វើយ៉ាងណា បម្រើសេវាសាធារណៈជូនដល់ប្រជាពលរដ្ឋឱ្យបាន រហ័ស ច្បាស់លាស់ និងពេញចិត្ត៕
![](https://dap-news.com/wp-content/uploads/2024/07/IMG_20240720_073136_470-1024x682.jpg)
![](https://dap-news.com/wp-content/uploads/2020/08/1-1.png)