ភ្នំពេញ៖ ក្នុងឱកាសចូលជួបជម្រាបលា សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្រោយបញ្ចប់បេសកកម្មក្នុងអាណត្តិរបស់ខ្លួន នាថ្ងៃទី២២ ខែកក្កដា ឆ្នាំ២០២៤នេះ លោកស្រី Colonne Appuhamilage Chaminda Inoka Colonne ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គមនិយមប្រជាធិបតេយ្យស្រីលង្កា បានប្តេជ្ញាក្នុងការបន្តជួយផ្សព្វផ្សាយ អំពីសក្ដានុពលកម្ពុជា ដល់ប្រជាជនស្រីលង្កា។
ក្នុងជំនួបជម្រាបលានេះ លោកស្រី ឯកអគ្គរដ្ឋទូតនៃសាធារណរដ្ឋស្រីលង្កា ប្រចាំកម្ពុជា បានជម្រាបជូនសម្ដេចធិបតី អំពីកិច្ចខិតខំប្រឹងប្រែងរបស់លោកស្រី ក្នុងអាណត្តិបេសកកម្មការទូតនៅកម្ពុជា ដែលបានរួមចំណែកពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ លើវិស័យសេដ្ឋកិច្ច ពាណិជ្ជកម្ម ទេសចរណ៍ និងការលើកលែងទិដ្ឋាការសម្រាប់អ្នកកាន់លិខិតឆ្លងដែនការទូត និងផ្លូវការ។
លោកស្រីឯកអគ្គរដ្ឋទូតស្រីលង្កា ក៏បានប្តេជ្ញា ក្នុងការបន្តជួយផ្សព្វផ្សាយ អំពីសក្ដានុពលកម្ពុជាដល់ប្រជាជនស្រីលង្កា។
ជាការឆ្លើយតប សម្ដេចធិបតី បានវាយតម្លៃខ្ពស់ ចំពោះការចូលរួមចំណែកយ៉ាងសកម្មរបស់លោកស្រី ក្នុងការពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការកម្ពុជា-ស្រីលង្កា។
សម្ដេចធិបតីបានបញ្ជាក់ថា ប្រទេសទាំងពីរនៅមានលទ្ធភាពជាច្រើនទៀត ក្នុងការពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗ រួមមាន សេដ្ឋកិច្ចនិងពាណិជ្ជកម្ម វប្បធម៌ ទេសចរណ៍ ជាដើម ។
សម្តេចធិបតីបានបញ្ជាក់បន្ថែមថា ក្រសួង ស្ថាប័នពាក់ព័ន្ធរបស់រាជរដ្ឋាភិបាលកម្ពុជា ត្រៀមខ្លួនរួចជាស្រេច ក្នុងការធ្វើការយ៉ាងជិតស្និទ្ធជាមួយឯកអគ្គរដ្ឋទូតថ្មី ស្រីលង្កាប្រចាំកម្ពុជា៕
