ភ្នំពេញ ៖ ក្រសួងសុខាភិបាល បានណែនាំប្រជាពលរដ្ឋ អនុវត្តនូវវិធានការនានា ដើម្បីបង្ការ បញ្ហាសុខភាព បណ្តាលមកពីការ បរិភោគផ្សិតពុល ព្រោះក្នុងចំណោមផ្សិតរាប់ពាន់ ប្រភេទ មានផ្សិតប្រហែល ១០០ប្រភេទ ដែលភាគច្រើនបណ្តាលឲ្យពុល នៅពេលបរិភោគ ។
![](https://dap-news.com/wp-content/uploads/2024/07/photo_2024-07-24_09-12-28.jpg)
ការណែនាំរបស់ក្រសួងសុខាភិបាល បែបនេះបន្ទាប់ មានករណីពុលផ្សិតចំនួន ១៧នាក់ (ស្រី៤នាក់) ដោយមានរោគសញ្ញា ចុកពោះ រាគ ក្អួត នៅភូមិឡុំ ឃុំប៉ក់ញៃ ស្រុកអូរយ៉ាដាវ ខេត្តរតនគិរី បន្ទាប់ពីបរិភោគផ្សិត ដោយត្រូវបាននិងកំពុង ទទួលការព្យាបាល យ៉ាងយកចិត្តទុកដាក់ពីសំណាក់ក្រុមគ្រូពេទ្យ នៅមណ្ឌលសុខភាព និងមន្ទីរពេទ្យ កាលពីថ្ងៃទី២១ កក្កដា។
តាមសេចក្ដីប្រកាសព័ត៌មានរបស់ ក្រសួងសុខាភិបាល នាថ្ងៃទី២៣ កក្កដា បានឲ្យដឹងថា ក្រុមឆ្លើយតបបន្ទាន់ របស់មន្ទីរសុខាភិបាល នៃរដ្ឋបាលខេត្ត បាននិងកំពុងសហការជាមួយក្រុម ការងារនៃអាជ្ញាធរមូលដ្ឋានគ្រប់លំដាប់ថ្នាក់ និងផ្នែកពាក់ព័ន្ធដោយទទួលការផ្តល់យោបល់បច្ចេកទេសពី នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល ធ្វើការអង្កេតស្រាវជ្រាវយ៉ាង សកម្មលើការកើតឡើង នូវករណីពុលនេះ និងធ្វើយុទ្ធនាការអប់រំសុខភាព ប្រជាពលរដ្ឋនៅក្នុងភូមិ ដែលកើតហេតុខាងលើ។ ក្នុង ចំណោមផ្សិតរាប់ពាន់ប្រភេទ មានផ្សិតប្រហែល ១០០ប្រភេទ ដែលភាគច្រើនបណ្តាលឱ្យពុល នៅពេល បរិភោគ ។
ក្រសួងសុខាភិបាល បញ្ជាក់ថា «សូមអំពាវនាវ ដល់បងប្អូនប្រជាពលរដ្ឋ អនុវត្តនូវវិធានការ ដូចខាងក្រោម ប្រកបដោយស្មារតីទទួលខុសត្រូវ ដើម្បីចៀសវាងបាននូវការពុលផ្សិត ដែលអាចធ្វើឱ្យគ្រោះ ថ្នាក់រហូតបាត់បង់ជីវិត ដោយត្រូវ៖ មុននឹងយកផ្សិតមកចំអិនជាម្ហូបអាហារបរិភោគ ត្រូវស្គាល់ប្រាកដថា ផ្សិតនោះមិនពុល ឬសូម ស្វែងរក សាកសួរចាស់ទុំ ដែលស្គាល់ច្បាស់ថា ផ្សិតនោះធ្លាប់បរិភោគដោយសុវត្ថិភាព។ ចម្អិនផ្សិតដែលមិនពុលឱ្យបានត្រឹមត្រូវ និងឆ្អិនល្អ មុនបរិភោគ។ប្រកាន់អនាម័យ លាងដៃឱ្យបានញឹកញាប់ជាមួយសាប៊ូ និងទឹកស្អាត មុនចាប់កាន់អាហារ និងទទួល ទានចំណីអាហារដែលមានអនាម័យ និងសុវត្ថិភាពល្អ»។
សូមបញ្ជាក់ថា រោគសញ្ញានៃការពុលផ្សិត អាចកើតក្រោយពីបរិភោគរយៈពេល ២ម៉ោង ទៅ ៦ម៉ោង ឬ ច្រើនថ្ងៃ ដែលមានដូចជា ចុកពោះ រាក ក្អួត បែកញើសរីកប្រស្រីភ្នែក ដង្ហើមញាប់ ឬពិបាកដកដង្ហើមឡះឡះ រហូតដល់ អាចស្លាប់ក្នុងរយៈពេលណាមួយ ទៅតាមប្រភេទផ្សិតពុល ដែលមានកម្រិតជាតិពុលខុសៗគ្នា ។ ជាតិពុលខ្លះ ប៉ះពាល់ដល់ប្រព័ន្ធ សរសៃប្រសាទ តម្រងនោម ឬថ្លើម ជួនកាលច្រើនថ្ងៃ ឬច្រើនសប្តាហ៍ បន្ទាប់ពីបរិភោគ ។ អ្នក ពុលត្រូវប្រញាប់ស្វែង រកការជួយសង្គ្រោះបន្ទាន់នៅតាមមូលដ្ឋាន សុខាភិបាលដែលនៅជិតលោកអ្នក បំផុត ដោយស្ថានភាពអ្នកពុលតម្រូវ ឱ្យស្ថិតនៅក្រោមការត្រួត ពិនិត្យតាមដាន ពីគ្រូពេទ្យជាចាំបាច់។
ក្រសួងសុខាភិបាល បានលើកទឹកចិត្ត ដល់ពលរដ្ឋ គ្រប់រូបអនុវត្តតាមការណែនាំខាងលើ និង បន្តផ្សព្វផ្សាយសារអប់រំ នេះដល់ក្រុមគ្រួសារ ញាតិមិត្ត ដើម្បីចៀសផុតពីការឈឺ គ្រោះថ្នាក់ដល់ជីវិតដោយ សារការបរិភោគផ្សិតពុល និងសូមមន្ត្រីសុខាភិបាល អាជ្ញាធរមូលដ្ឋានចូលរួមផ្សព្វផ្សាយ និងធ្វើការណែនាំ អប់រំ ការអនុវត្តវិធានការខាងលើ ដល់ប្រជាពលរដ្ឋ នៅមូលដ្ឋានរបស់ខ្លួន ៕
![](https://dap-news.com/wp-content/uploads/2020/08/1-1.png)