ភ្នំពេញ៖ កូនត្រីប្រមាណ៥មឺុនក្បាល (ត្រីឆ្ពិន ២០ ០០០កូន ត្រីពលូង ៥ ០០០ ត្រីកាហែ ៥ ០០០ ត្រីអណ្ដែងទន់៥ ០០០ ត្រីប្រា១៥ ០០០) ត្រូវបានលែងនៅក្នុងប្រឡាយស្ដារភូមិព្រៃស្នួល ដែលមានទីតាំងស្ថិតនៅភូមិព្រៃស្នួល ឃុំរវៀង ស្រុកសំរោង ខេត្តតាកែវ ក្រោមការដឹកនាំរបស់លោក ពុំ ស៊ីថា ប្រតិភូរាជរដ្ឋាភិបាលទទួលបន្ទុកជា អគ្គនាយករដ្ឋបាលជលផល នៃក្រសួងកសិកម្ម រុក្ខាប្រមាញ់និងនេសាទ អាជ្ញាធរស្រុកសំរោង ព្រមទាំងមន្រ្តីថ្នាក់ឃុំ រួមទាំងប្រជាពលរដ្ឋផងដែរ។
![](https://dap-news.com/wp-content/uploads/2024/07/IMG_8995-1024x683.jpg)
សូមបញ្ជាក់ថា ការលែងកូនត្រីនេះ គឺជាលើកទី២ហើយ សម្រាប់អ្នកភូមិព្រៃស្នួល បន្ទាប់ពីប្រឡាយនេះត្រូវបានស្ដារ ដោយអាជ្ញាធរស្រុកសំរោង ពីមួយឆ្នាំទៅមួយឆ្នាំ ឱ្យកាន់តែធំ បញ្ជៀសការគោករាក់ នារដូវប្រាំង និងរក្សាទឹកទុកសម្រាប់ប្រើប្រាស់បង្ករបង្កើនផលដំណាំស្រូវ ជាពិសេសធ្វើជាកន្លែងអភិរក្សពូជត្រី សម្រាប់ទៅថ្ងៃអនាគតផងដែរ ។
![](https://dap-news.com/wp-content/uploads/2024/07/IMG_9006-683x1024.jpg)
![](https://dap-news.com/wp-content/uploads/2024/07/IMG_8964-1024x683.jpg)
ថ្លែងនៅក្នុងពិធីលែងកូនត្រី នាព្រឹកថ្ងៃទី២៥ ខែកក្កដា ឆ្នាំ២០២៤នេះ លោក ពុំ ស៊ីថា បានលើកឡើងថា ការលែងកូនត្រីនេះ គឺធ្វើឡើងស្របតាមអនុសាសន៍ដ៏ខ្ពង់ខ្អស់ របស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា «ការលែងកូនត្រី មិនមែនធ្វើតែក្នុងទិវាមច្ឆជាតិ១ កក្កដា នោះទេ គឺអាចធ្វើបានរាល់ថ្ងៃ»។
![](https://dap-news.com/wp-content/uploads/2024/07/IMG_8947-1024x683.jpg)
![](https://dap-news.com/wp-content/uploads/2024/07/IMG_8972-1024x683.jpg)
ជាមួយគ្នានេះ លោកអគ្គនាយក ក៏បានសម្ដែងការសប្បាយរីករាយ ពេលសង្កេតឃើញ ប្រឡាយស្ដារព្រៃស្នួលមានសភាពកាន់ធំជាងមុន ជាពិសេសនោះ គឺប្រជាពលរដ្ឋ នៅក្នុងមូលដ្ឋាន លែងនេសាទដោយឧបករណ៍ខុសច្បាប់។
![](https://dap-news.com/wp-content/uploads/2024/07/IMG_8953-1024x683.jpg)
![](https://dap-news.com/wp-content/uploads/2024/07/IMG_8887-1024x683.jpg)
ឆ្លៀតក្នុងឱកាសនេះ លោកក៏បាន អំនាវនាវដល់ប្រជាពលរដ្ឋទាំងអស់ បន្តចូលរួមថែរក្សា ការពារនិងអភិរក្សពូជត្រី ដែលមាននៅក្នុងប្រឡាយស្ដារមួយនេះ ឱ្យបានគង់វង្ស ជៀសវាងការនេសាទដោយឧបករណ៍ ខុសច្បាប់នានា។
![](https://dap-news.com/wp-content/uploads/2024/07/IMG_8910-1024x683.jpg)
![](https://dap-news.com/wp-content/uploads/2024/07/IMG_9011-1024x683.jpg)
![](https://dap-news.com/wp-content/uploads/2024/07/IMG_8936-1024x683.jpg)
ជំនួសមុខឱ្យអ្នកភូមិព្រៃស្នួល លោក សយ សុភាព បានថ្លែងអំណរគុណ ចំពោះថ្នាក់ដឹកនាំរដ្ឋបាលជលផល ដែលបានអញ្ជើញនាំយកកូនត្រីមកលែងជាលើកទី២ ។
![](https://dap-news.com/wp-content/uploads/2024/07/IMG_9036-1024x683.jpg)
![](https://dap-news.com/wp-content/uploads/2024/07/IMG_8933-1024x683.jpg)
ជាមួយគ្នានេះ លោក សយ សុភាព បានប្រាប់ដល់អ្នកនេសាទ ថាចាប់ពីរដូវបិទនេសាទនេះតទៅ សូមបងប្អូនកុំមកនេសាទ ក្នុងប្រឡាយស្ដារព្រៃស្នួល រហូតដល់រដូវបើកនេសាទ នៅចុងឆ្នាំនេះ៕
![](https://dap-news.com/wp-content/uploads/2024/07/IMG_9051-1024x683.jpg)
![](https://dap-news.com/wp-content/uploads/2020/08/1-1.png)