សាស្ត្រាចារ្យ ឈាង រ៉ា ជួបសំណេះសំណាល និងផ្តល់អនុសាសន៍ដល់ថ្នាក់ដឹកនាំ មន្រ្តីរាជការ និងបុគ្គលិកសុខាភិបាល ខេត្តប៉ៃលិន

ភ្នំពេញ៖ សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រតិភូអមដំណើរ នាថ្ងៃ១៨ សីហាបានជួបសំណេះសំណាល សួរសុខទុក្ខ ព្រមទាំងផ្តល់អនុសាសន៍ ដល់ថ្នាក់ដឹកនាំ មន្រ្តីរាជការ និងបុគ្គលិកសុខាភិបាល នៃមន្ទីរសុខាភិបាលនៃរដ្ឋបាលខេត្តប៉ៃលិន។

សាស្ត្រាចារ្យរដ្ឋមន្ត្រី សម្តែងអំណរគុណ និងកោតសរសើរថ្នាក់ដឹកនាំ រួមទាំងបុគ្គលិកសុខាភិបាលទាំងអស់ ទាំងអាជ្ញាធរ សមត្ថកិច្ចមូលដ្ឋាន ដែលបានចូលរួមយ៉ាងសកម្មជាគំរូវីរភាព ប្រយុទ្ធប្រឆាំងនឹងជំងឺកាចសាហាវកូវីដ-១៩ កន្លងមក ។ សាស្ត្រាចារ្យក៏ជំរុញឲ្យរក្សាបាន និងធ្វើឲ្យកាន់តែប្រសើរជាប់ជាប្រចាំនូវអាកប្បកិរិយា-ឥរិយាបទល្អ ស្រលាញ់រាប់អាន-សាមគ្គីភាព ប្រកបដោយវិជ្ជមានភាពខ្ពស់នៃការគិត ទាំងក្នុងពេលបំពេញការងារ ក៏ដូចជាពេលប្រាស្រ័យទាក់ទង ក្នុងសហគមន៍-ក្រុមគ្រួសារ ដែលនេះជាកត្តាឈ្នះ និងជោគជ័យមួយមិនអាចខ្វះបាន និងជាចំណុចចាប់ផ្តើមចាំបាច់បំផុត សម្រាប់គ្រប់អ្នកដឹកនាំ វិស័យសុខាភិបាល ។

នាឱកាសនោះ សាស្ត្រាចារ្យ ឈាង រ៉ា បានផ្តល់អនុសាសន៍ដល់បុគ្គលិកសុខាភិបាលទាំងអស់ បង្កើនការ យកចិត្តទុកដាក់បង្កើនសមត្ថភាពជំនាញ និងបន្តបណ្តុះបណ្តាលជានិរន្តន៍ ក្នុងការពិនិត្យល្អិតល្អន់ មុនការផ្តល់រោគវិនិច្ឆ័យជំងឺ និងជជែករួមគ្នាសម្រេចរោគវិនិច្ឆ័យ និងវិធីសាស្ត្រព្យាបាល ដោយត្រូវតែនាំយកការពន្យល់ច្បាស់លាស់ ជាដំណាក់កាលៗ ជូនដល់អ្នកជំងឺ-ក្រុមគ្រួសារជាចាំបាច់។

សាស្ត្រាចារ្យរដ្ឋមន្ត្រីក៏បានចែករំលែកបទពិសោធន៍សំរាប់ការប្រតិបត្តិប្រចាំថ្ងៃដែលឈរលើទិដ្ឋភាព៥យ៉ាងនៃភាពអ្នកដឹកនាំ ដោយរួមបញ្ចូលគ្នា៖

១- “ដឹកនាំ” ត្រូវចេញពីការស្រលាញ់ដោយពិតប្រាកដចេញពីបេះដូង

២- “ដឹកនាំ” ត្រូវឈរលើគំនិតប្រាជ្ញា “គិត” ល្អ គិតត្រូវ (គិតបែបគតិបណ្ឌិត) សំដៅបម្រើប្រយោជន៏សាធារណៈ ប្រយោជន៍ប្រជាពលរដ្ឋ

៣- “ដឹកនាំ” គឺត្រូវធ្វើដោយ “ដៃ” ខ្លួនឯងផ្ទាល់ បង្ហាញដោយផ្ទាល់ ដឹកដៃអោយធ្វើ បង្ហាញជាគំរូ

៤- “ដឹកនាំ” សំដៅលើកិច្ចការដែលត្រូវធ្វើ គឺធ្វើអោយបានល្អបំផុត រហូតធ្វើបានបានទៅជា”ទម្លាប់” និងបង្កើតជាប្រពៃណីល្អយូរអង្វែង

៥- “ដឹកនាំ” ត្រូវផ្តើមពីខ្លួនម្នាក់ៗជាមួយ ការគិតគូអំពីការថែរក្សា “សុខភាព”៕

Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999