ភ្នំពេញ៖ នៅក្នុងខែកញ្ញា ឆ្នាំ២០២៤នេះ គេសង្កេតឃើញមាននាវាកងទ័ពជើងទឹកអង់គ្លេស និងអូស្រ្តាលី បានបណ្ដាក់គ្នាចូលចតនៅកំពង់ផែស្វយ័តក្រុងព្រះសីហនុ ក្រោមហេតុផល ដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អ។
ការបណ្ដាក់គ្នា ចូលទស្សនកិច្ចនៅកម្ពុជានេះ ក៏ស្របពេលដែលសហរដ្ឋអាមេរិក ដែលជាក្បាលម៉ាស៊ីន នៃសម្ព័ន្ធភាព អូគូស (AUKUS) បានបន្តប្រើវោហាសាស្រ្តវាយប្រហារកម្ពុជា លើការពង្រីកមូលដ្ឋាន កងទ័ពជើងទឹករាម។
ជាក់ស្ដែងកាលពីព្រឹកថ្ងៃចន្ទ នាវាកងទ័ពជើងទឹកអង់គ្លេស ដែលមាន ឈ្មោះHMS SPEY (P234) ដឹកនាំដោយវរនាវីទោ Paul Caddy មេបញ្ជាការនាវា កងទ័ពជើងទឹកអង់គ្លេស បានចូលចត នៅកំពង់ផែស្វយ័តក្រុងព្រះសីហនុ ដើម្បីបំពេញទស្សនកិច្ចរយៈពេល៥ថ្ងៃ។
ក្នុងដំណើរបំពេញទស្សនកិច្ចនៅព្រះរាជាណាចក្រកម្ពុជារយៈពេល៥ថ្ងៃ គិតចាប់ពីថ្ងៃទី២៣ ដល់ថ្ងៃទី២៧ ខែកញ្ញា ឆ្នាំ២០២៤ គឺដើម្បីពង្រឹង កិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់ តែល្អទ្វេឡើងថែមទៀត រវាងប្រទេសទាំងពីរ(កម្ពុជា-អង់គ្លេស) ។
កាលពីថ្ងៃទី២ កញ្ញា កន្លងទៅថ្មីៗនេះ នាវាកងទ័ពជើងទឹកអូស្ត្រាលី ចំនួន០១គ្រឿង ឈ្មោះHMAS Perth-FFH157(Anzac Class FFH) ដឹកនាំដោយវរនាវីទោ Ben Dalton មេបញ្ជាការនាវាកងទ័ពជើងទឹក អូស្រ្តាលី ក៏ទើបតែ បំពេញទស្សនកិច្ចនៅកម្ពុជារយៈពេល៣ថ្ងៃ រួចហើយផងដែរ៕
