ភ្នំពេញ: ប្រតិភូតំណាងអង្គការសប្បុរសធម៌ខ្វនថឹម (Quantum Charity )ដឹកនាំដោយលោក អ៊ុង គង្គា និងសហការី ៩នាក់ នាថ្ងៃទី ២៦ ខែកញ្ញា ឆ្នាំ ២០២៤ បាននាំយកថវិការ ចំនួន១មុឺនដុល្លាអាមេរិក មកបរិច្ចាគជូនអង្គការ ស្នាមញញឹមកម្ពុជា Smiling Cambodia។
ការប្រគល់-ទទួលមូលប្បទានប័ត្រនេះ ធ្វើឡើងនៅក្នុងកម្មវិធីជប់លៀង មួយរៀបចំដោយលោក Chen GuoCai ប្រធានក្រុមប្រឹក្សាភិបាល អង្គការស្នាមញញឹមកម្ពុជា។
នេះជាការបរិច្ចាគដើម្បីគាំទ្រ សកម្មភាពមនុស្សធម៏ របស់អង្គការស្នាមញញឹមកម្ពុជា ក្នុងការវះកាត់បបូរមាត់ឆែប ដោយ ឥតគិតថ្លៃជូនកុមារ ដែលមានបបូរមាត់ឆែបនៅកម្ពុជា ដើម្បីអោយកុមារ ដែលមានបបូរមាត់ឆែប ទទួលបាន នូវស្នាមញញឹម និងអនាគតល្អឡើងវិញ ពេញមួយជៅវិត។
លោក អ៊ុង គង្គា តំណាងអង្គការសប្បុរសធម៌ខ្វនថឹមមានប្រសាសន៍ថា “បបូរមាត់ឆែបមិនគ្រាន់តែជាជំងឺផ្លូវកាយប៉ុណ្ណោះទេ តែប្រសិនបើកុមារដែលមានបបូរមាត់ឆែប មិនបានទទួលបានវះកាត់ទាន់ពេល កុមារនោះនឹងប្រឈមមុខ នឹងបញ្ហាផ្លូវចិត្តនៅពេលពួកគេធំឡើង ដោយសារតែបញ្ហាផ្ទៃមុខ ដែលមិនអាចលាក់បាំងបាន។
ការយកចិត្តទុក ដាក់យ៉ាងសកម្ម ចំពោះកុមារដែលមានបបូរមាត់ឆែប មានសារៈសំខាន់ណាស់ គឺជួយពួកគេឱ្យ ទទួលបានការវះកាត់ ឱ្យបានឆាប់តាមដែលអាចធ្វើទៅបាន នឹងធ្វើអោយពួកគេ មានឱកាសរស់នៅក្នុងជីវភាពធម្មតា គឺផ្តល់នូវក្តីសង្ឃឹម និងស្នាមញញឹមដល់ពួកគេឡើងវិញ ពេញមួយជីវិត។
លោកមានប្រសាសន៍ថា អង្គការសប្បុរសធម៌ខ្វនថឹម នឹងពិនិត្យ លទ្ធភាពបន្តផ្តល់ជំនួយ ដើម្បីគាំទ្រសកម្មភាព មនុស្សធម៌របស់អង្គការ ស្នាមញញឹមកម្ពុជាបន្ថែមទៀត ។
«យើងផ្តល់ជំនួយ ដោយឥតគិតថ្លៃ ដើម្បីគាំទ្រសកម្មភាព សុខុមាលភាពសាធារណៈ រួមមានការបរិច្ចាគ ថវិការ ជួយអ្នកជំងឺកុមារនៅមន្ទីរពេទ្យ ជួយជនរួមជាតិដែលខ្វះខាត -អ្នកជម្ងឺធ្ងន់ធ្ងរ-មណ្ឌលថែទាំមនុស្សចាស់។ល។ និងបរិច្ចាគថវិកាសាងសង់អគារសិក្សានៅតំបន់ជនបទដាច់ស្រយាល ដើម្បីផ្តល់ការគាំទ្រខាងវប្បធម៌ និងការអប់រំ»។
អង្គការស្នាមញញឹមកម្ពុជា (Smile Cambodia) ពីមុនត្រូវបានគេស្គាល់ថាជាOperation Smile Cambodia បង្កើតឡើងក្នុងឆ្នាំ២០០២ ដោយលោកជំទាវវេជ្ជបណ្ឌិត ពេជ្រ ច័ន្ទមុនី ភរិយាសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា ដែលគម្រោងនេះផ្តោតលើការវះកាត់បបូរមាត់ឆែប និងមុខ ជាអង្គការវេជ្ជសាស្ត្រសប្បុរសធម៌ ដែលផ្តល់ការវះកាត់ដោយឥតគិតថ្លៃដល់អ្នកជំងឺ។
នៅខែមិថុនា ឆ្នាំ ២០១៥ប្រតិបត្តិការSmile Cambodia Foundation ត្រូវបានប្តូរទៅជាអង្គការSmile Cambodia ហើយបានក្លាយជាសមាជិកស្ថាបនិកនៃអង្គការស្នាមញញឹមអាសុី（Smile Asia）។
អង្គការSmile Cambodia មានមជ្ឈមណ្ឌលវះកាត់Smile Centerនៅក្នុងមន្ទីរពេទ្យមិត្តភាពកម្ពុជា-សូវៀត រាជធានីភ្នំពេញ ដែលផ្តល់ការព្យាបាលវះកាត់ផ្នែកសុខុមាលភាព សាធារណៈដោយឥតគិតថ្លៃ ជូនដល់អ្នកជំងឺ ដែលមានបបូរមាត់ឆែប និងផ្ទៃមុខពេញមួយឆ្នាំ៕
