ភ្នំពេញ ៖ នៅរសៀលថ្ងៃទី១៦ ខែតុលា ឆ្នាំ២០២៤ ឆ្លៀតឱកាសក្នុងដំណើរបំពេញ បេសកកម្ម មកប្រទេសនូវ៉ែលហ្សេឡង់, លោកបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម បានអញ្ជើញជួបសំណេះសំណាល និងពិភាក្សាការងារ ជាមួយបងប្អូនខ្មែរ ដែលជាពាណិជ្ជករ និងអ្នកវិនិយោគ ដែលកំពុងរស់នៅប្រទេសនូវ៉ែលហ្សេឡង់។
ក្នុងជំនួបនេះ លោកបណ្ឌិត បានស្នើសុំឲ្យបងប្អូនចែករំលែកបទពិសោធន៍អាជីវកម្ម និងបង្ហាញអំពីបញ្ហាប្រឈមផ្សេងៗ ដែលបងប្អូនយើងកំពុងជួបប្រទៈក្នុងការប្រកបអាជីវកម្មរបស់ខ្លួន។
យកឱកាសនោះ លោកបណ្ឌិត បានជម្រាបដល់បងប្អូនខ្មែរដែលជាពាណិជ្ជករ និងអ្នកវិនិយោគ អំពី ភាពរីកចំរើន ,ការរក្សាបានសុខសន្តិភាព ,ស្ថិរភាពនយោបាយ,ស្ថិរភាពម៉ាក្រូសេដ្ឋកិច្ចការរក្សាបាននូវកំណើនសេដ្ឋកិច្ច តាមឆ្នាំជាបន្តបន្ទាប់ និងអំពីសក្តានុពលទីផ្សារ នៅកម្ពុជា ផងដែរ។
ជាមួយគ្នានេះ, លោកបណ្ឌិត បានអញ្ជើញ និងចង់ឃើញ បងប្អូនពាណិជ្ជករខ្មែរ នៅនូវ៉ែលហ្សេឡង់ ទៅធ្វើការវិនិយោគ នៅកម្ពុជា ដើម្បីបង្កើតឱកាសការងារដល់បងប្អូនខ្មែរ និងជំរុញសេដ្ឋកិច្ចកម្ពុជា អោយមានកំណើនបន្ថែមទៀត៕
