ពោធិ៍សាត់: ស្ដ្រីត្រៀមសម្រាល និងទើបសម្រាលកូន ចំនួន៧នាក់ និងចាស់ជរាគ្មានទីពឹង ចំនួន១៣នាក់ផ្សេងទៀត ទទួលអំណោយពីលោកស្រីអាំង សុជាតា ខូយ រីដា ថ្ងៃទី២៥ ខែតុលា ឆ្នាំ២០២៤នេះ នៅមណ្ឌលសុខភាពមេទឹក ឃុំមេទឹក ស្រុកបាកាន ខេត្ដពោធិ៍សាត់ បានទទួលអំណោយមនុស្សធម៌ ពីក្រុមការងារឥស្សរជនឆ្នើមថ្នាក់ជាតិ នៃសាខាកាកបាទក្រហមកម្ពុជា ខេត្ដពោធិ៍សាត់ ដែលដឹកនាំដោយលោកជំទាវ អាំង សុជាតា ខូយរីដា អនុប្រធានកិត្ដិយស និងជាប្រធានក្រុមការងារ ឥស្សរជនឆ្នើមជាតិ សាខាកាកបាទក្រហមកម្ពុជាខេត្ដពោធិ៍សាត់។
អំណោយមនុស្សធម៌ ដែលបានយកមកជូនដល់ស្ដ្រីត្រៀមសម្រាល និងទើបសម្រាលកូនរួច ចំនួន៧នាក់ គឺក្នុងម្នាក់ៗទទួលបាន មុងមួយ, សារ៉ុង១, បំពង់ទឹកក្ដៅ១, ទឹកដោះគោឆៅ១យួរ, ទឹកដោះគោខាប់១កំប៉ុង, ស្កសរ១គីឡូក្រាម, សាប៊ូម្សៅ១ថង់, ម្សៅកូនង៉ា១កំប៉ុង, ខោអាវក្មេង២ឈុត និងថវិកា៥ម៉ឺនរៀល។ ចំពោះជនចាស់ជរាគ្មានទីពឹង ចំនួន១៣នាក់ ក្នុងម្នាក់ៗទទួលបាន អង្ករ២០គូឡូក្រាម, ទឹកត្រី១យួរ, ទឹកស៊ីអ៊ីវ១យួរ និងបំពង់ទឹកក្តៅ១។
ដោយឡែកលោកគ្រូ អ្នកគ្រូពេទ្យ ដែលបម្រើសេវាសុខភាព ជូនប្រជាជននៅក្នុងមណ្ឌលសុខភាពមេទឹក ក៏ទទួលបានការឧបត្ថម្ភ ជាថវិកាចំនួន ២ម៉ឺនរៀល សាប៊ូ១ដប និងសារ៉ុងម្នាក់១។ លើសពីនោះ លោកជំទាវ អាំង សុជាតា ខូយរីដា ក៏បានឧបត្ថម្ភសារុង ចំនួន១០០ ទុកប្រើប្រាស់បន្ថែមផងដែរ៕
