ភ្នំពេញ ៖ លោក Muhammad Abdul Muhith ប្រធានគណៈប្រតិភូក្រុមប្រឹក្សាប្រតិបត្តិ នៃទីភ្នាក់ងារអង្គការសហប្រជាជាតិ (UN) បានអះអាងថា នឹងជំរុញឱ្យទីភ្នាក់ងារអង្គការសហប្រជាជាតិ ចំនួន៦ បន្តរួមចំណែកគាំទ្រ របៀបវារៈអភិវឌ្ឍន៍របស់កម្ពុជា សំដៅសម្រេចឱ្យបាននូវគោលដៅ អភិវឌ្ឍប្រកបដោយចីរភាព (SDGs) ។
ការលើកឡើងរបស់លោក Muhammad Abdul Muhith ធ្វើឡើងក្នុងឱកាសដឹកនាំគណៈប្រតិភូ នៃក្រុមប្រឹក្សាប្រតិបត្តិ នៃទីភ្នាក់ងារអង្គការសហប្រជាជាតិ ចំនួន៦ ចូលជួបសម្ដែងការគួរសម និងពិភាក្សាការងារ ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាថ្ងៃទី៣១ ខែតុលា ឆ្នាំ២០២៤ នៅវិមានសន្តិភាព ។
ក្នុងជំនួបនេះ លោកប្រធានគណៈប្រតិភូ បានវាយតម្លៃខ្ពស់ ចំពោះកិច្ចសហប្រតិបត្តិការ និងភាពជាដៃគូដ៏ល្អប្រសើរ រវាងទីភ្នាក់ងារអង្គការសហប្រជាជាតិ និងរាជរដ្ឋាភិបាលកម្ពុជា ព្រមទាំងបានកោតសរសើរ ចំពោះការរីកចម្រើនដ៏ឆាប់រហ័ស នៅកម្ពុជា។
ក្នុងនោះ លោក Muhammad Abdul Muhith បានកត់សម្គាល់ពីវឌ្ឍនភាព នៃការផ្ដល់សេវាសុខាភិបាល សេវាអប់រំ ព្រមទាំងការចូលរួមរបស់ស្ត្រី និងយុវជន នៅតាមសហគមន៍មូលដ្ឋាន តាមរយៈដំណើរទស្សនកិច្ច នៅតាមបណ្ដាខេត្តមួយចំនួន ។
ជាការឆ្លើយតប សម្ដេចបវរធិបតី បានគូសបញ្ជាក់ថា ដំណើរទស្សនកិច្ចរបស់គណៈប្រតិភូ ក្រុមប្រឹក្សាប្រតិបត្តិ នៃទីភ្នាក់ងារអង្គការសហប្រជាជាតិ នៅកម្ពុជា ឆ្លុះបញ្ចាំងអំពីភាពជាដៃគូដ៏រឹងមាំ រវាងកម្ពុជា និងអង្គការសហប្រជាជាតិ ដែលនឹងបន្តរួមចំណែក ដល់ការអភិវឌ្ឍប្រកបដោយភាពធន់ បរិយាប័ន្ន និងចីរភាព នៅកម្ពុជា។
សម្ដេចបវរធិបតី មានប្រសាសន៍បន្ថែមថា ដំណើរទស្សនកិច្ច របស់គណៈប្រតិភូនាពេលនេះ ក៏បានផ្ដល់នូវទស្សនទាន និង ការយល់ដឹងបន្ថែមទៀត ដល់គណៈប្រតិភូ អំពីគោលដៅអភិវឌ្ឍសង្គម-សេដ្ឋកិច្ចកម្ពុជា ការសម្រេចបានជាសមិទ្ធផលរបស់កម្ពុជា និងវិស័យសក្ដានុពល សម្រាប់កិច្ចសហប្រតិបត្តិការ ដើម្បីជាប្រយោជន៍ដល់ប្រជាជន និងប្រទេសកម្ពុជា។
សម្ដេចបវរធិបតី និងលោកប្រធានគណៈប្រតិភូ បានពិភាក្សាអំពីការពង្រឹង និងពង្រីកភាពជាដៃគូ រវាងរាជរដ្ឋាភិបាលកម្ពុជា និងទីភ្នាក់ងារអង្គការសហប្រជាជាតិ លើវិស័យសំខាន់ៗ រួមមាន៖ វិស័យសុខាភិបាល វិស័យអប់រំ ការបណ្តុះបណ្តាល ប្រព័ន្ធសុវត្ថិភាពសង្គម ការប្រែប្រួលអាកាសធាតុ ថាមពលស្អាត សមភាពយេនឌ័រ ព្រមទាំងតួនាទីរបស់ស្រ្តី និងយុវជន ជាដើម។
ក្នុងនោះដែរលោក Muhammad Abdul Muhith ប្រធានគណៈប្រតិភូក្រុមប្រឹក្សាប្រតិបត្តិ នៃទីភ្នាក់ងារអង្គការសហប្រជាជាតិ បានអះអាងថា នឹងជំរុញឱ្យទីភ្នាក់ងារអង្គការសហប្រជាជាតិ ចំនួន៦ បន្តរួមចំណែកគាំទ្រ របៀបវារៈអភិវឌ្ឍន៍របស់កម្ពុជា សំដៅសម្រេចឱ្យបាននូវគោលដៅ អភិវឌ្ឍប្រកបដោយចីរភាព (SDGs) ដែលនឹងផ្តល់ប្រយោជន៍ ដល់ប្រជាជនទាំងអស់ និងមិនទុកនរណាម្នាក់ចោលឡើយ៕
