ភ្នំពេញ ៖ ក្រសួងការងារ និង បណ្តុះបណ្តាលវិជ្ជាជីវៈ ជូនដំណឹងដល់ម្ចាស់ ឬនាយកសហគ្រាស គ្រឹះស្ថានទាំងអស់ ដែលស្ថិតក្នុងដែនអនុវត្តនៃច្បាប់ ស្ដីពីការងារឱ្យបានជ្រាបថា យោងតាមច្បាប់ ស្តីពីការងារ និងប្រកាសលេខ ០១៤/២៤ ក.ប/ប្រ.ក.អ.ជ.ក ចុះថ្ងៃទី១៦ ខែមករា ឆ្នាំ២០២៤ ស្តីពីការឈប់បុណ្យ ដែលមានប្រាក់ឈ្នួលប្រចាំឆ្នាំ២០២៤ សូមម្ចាស់ ឬនាយកសហគ្រាស គ្រឹះស្ថានអនុញ្ញាតឱ្យកម្មករ និយោជិតទាំងអស់ របស់ខ្លួនឈប់សម្រាក ដោយមានប្រាក់ឈ្នួល នាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកខាងមុខនេះរយៈពេល ៣ (បី) ថ្ងៃ គឺថ្ងៃទី១៤-១៥-១៦ ខែវិច្ឆិកា ឆ្នាំ២០២៤ ។
យោងតាមសេចក្តីជូនដំណឹង ស្តីពីការអនុវត្តការឈប់ សម្រាកក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៤ ក្រសួងការងារ បញ្ជាក់ថា ទន្ទឹមនឹងនេះ ម្ចាស់ ឬនាយកសហគ្រាស គ្រឹះស្ថានត្រូវខិតខំរៀបចំ បើកប្រាក់ឈ្នួល ជូនកម្មករនិយោជិតលើកទី១ ឱ្យបានមុន ថ្ងៃព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ។ ក្នុងករណី មានការព្រមព្រៀងគ្នា រវាងកម្មករនិយោជិតសាមីនិងនិយោជក ឬមានចែងក្នុងបទបញ្ជាផ្ទៃ ក្នុងរបស់សហគ្រាស គ្រឹះស្ថាន ឬអនុសញ្ញារួម ការឈប់សម្រាក របស់កម្មករនិយោជិត អាចអនុវត្តនៅពេលណាមួយ ផ្សេងទៀត ដែលខុសពីថ្ងៃឈប់ សម្រាកបុណ្យ ដូចមានកំណត់ក្នុងប្រកាសលេខ ០១៤/២៤ ក.ប/ប្រ.ក.អ.ធ.ក ខាងលើ ។ ចំពោះសហគ្រាស គ្រឹះស្ថានទាំងឡាយណា ដែលកម្មវត្ថុអាជីវកម្ម មានចរិតលក្ខណៈសកល ត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាព បានហើយការឈប់ សម្រាកបុណ្យ នៃកម្មករនិយោជិត ទាំងអស់ ព្រមគ្នាក្នុងពេល តែមួយនាំឱ្យ ខូចប្រយោជន៍ ដល់សាធារណជន ឬក៏ធ្វើឱ្យខូចដំណើរការ របស់សហគ្រាស គ្រឹះស្ថាន ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបែងចែកឱ្យកម្មករ និយោជិតបានឈប់ សម្រាកទៅតាមថ្ងៃឈប់ សម្រាកបុណ្យ ដោយផ្លាស់ប្តូរវេនគ្នា ។ ប្រសិនបើការ ផ្លាស់ប្តូរវេនគ្នានេះ មិនអាចគាំទ្រដល់ដំណើរការអាជីវកម្ម របស់សហគ្រាស គ្រឹះស្ថាន ម្ចាស់ ឬនាយកសហគ្រាស គ្រឹះស្ថាន និង តំណាងកម្មករនិយោជិត អាចពិភាក្សានិង ព្រមព្រៀងគ្នា ឱ្យកម្មករនិយោជិតទាំងអស់ នៅធ្វើការ នៅថ្ងៃឈប់សម្រាកបុណ្យ នេះ ដោយត្រូវរៀបចំ ឱ្យមានការឈប់ សម្រាកជំនួស នៅពេលណាមួយផ្សេងទៀតបាន ។ ម្ចាស់ ឬនាយកសហគ្រាស គ្រឹះស្ថាន ត្រូវរៀបចំបញ្ជីឈ្មោះកម្មករ និយោជិត ដែលត្រូវផ្លាស់ប្តូរគ្នាឈប់ សម្រាកតាមកាលបរិច្ឆេទនីមួយៗខាងលើ និងរក្សាទុកជា ប្រចាំសម្រាប់ការត្រួតពិនិត្យ របស់អធិការការងារ ។ ក្នុងករណីមិនទទួលបានការឈប់ សម្រាកដោយមានប្រាក់ឈ្នួលត្រឹមត្រូវ សូមផ្ដល់ព័ត៌មានមក ក្រសួងតាមរយៈប្រព័ន្ធ ទាន់ហេតុការណ៍លេខ ១២៩៧ ឬ ១២៨៦ ដើម្បីក្រសួងចាត់វិធានការតាមច្បាប់ ។
ក្រសួងការងារ និងបណ្តុះបណ្តាលវិជ្ជាជីវៈ សង្ឃឹមយ៉ាងមុតមាំថា ម្ចាស់ ឬនាយកសហគ្រាស គ្រឹះស្ថាន និងកម្មករ និយោជិតទាំងអស់ចូលរួមអនុវត្ត តាមខ្លឹមសារសេចក្ដីជូនដំណឹងនេះ ប្រកបដោយប្រសិទ្ធភាព៕
