កំពង់ធំ: នៅរសៀលថ្ងៃទី១៨ ខែវិច្ឆិកា ឆ្នាំ២០២៤ វេលាម៉ោង១៤ និង២០នាទី ស្ថិតនៅចំណុចស្រះរណ្តៅអាអិច ភូមិ សែនសេរី ឃុំក្រយា ស្រុកសន្ទុក ខេត្តកំពង់ធំ មានករណីលង់ទឹកកើតឡើង ០១លើក បណ្តាលឲ្យស្លាប់មនុស្ស០៣ នាក់។
យោងតាមរបាយការណ៍ របស់លោកវរសេនីយ៍ឯក ម៉ៅ ចាន់ធី អធិការនគរបាលស្រុកសន្ទុក បានឱ្យដឹងថា សពកុមារទាំង ០៣នាក់ ស្លាប់ដោយសារលង់ទឹកស្រះមានឈ្មោះ÷ ១.ឈ្មោះ ផល្លី ឌីណែត ភេទស្រី អាយុ១២ឆ្នាំ មុខរបរ សិស្ស។ ២.ឈ្មោះ សុវណ្ណ កណ្ណិកា ភេទស្រី អាយុ១២ ឆ្នាំ មុខរបរសិស្ស ។ ៣.ឈ្មោះ ធន់ ធារ៉ា ភេទស្រី អាយុ១២ ឆ្នាំ មុខរបរសិស្ស។ ជនរងគ្រោះទាំង០៣ នាក់ រស់នៅភូមិសែនសេរី ឃុំក្រយា ស្រុក សន្ទុក ខេត្តកំពង់ធំ មូលហេតុចេញមកពីសាលារៀនវិញ នាំគ្នាចុះលេងទឹកស្រះបណ្ដាលឱ្យលង់ស្លាប់ទាំង០៣នាក់តែម្ដង។
ក្រោយពីការពិនិត្យ របស់សមត្ថកិច្ចជំនាញ បានធ្វើកោសល្យវិច័យរួចមក លើសពកុមារទាំង០៣នាក់ ពិតជាលង់ទឹកស្លាប់ ពិតប្រាកដមែន ហើយសមត្ថកិច្ច ក៏បានប្រគល់សពកុមារទាំង០៣នាក់ ប្រគល់ជូនសាច់ញាតិយកទៅធ្វើបុណ្យ តាមប្រពៃណីព្រះពុទ្ធសាសនា ៕ ដោយសំនៀង
