ភ្នំពេញ ៖ តបតាមអំពីសំណើ របស់សហរដ្ឋអាមេរិក ក្រសួងការពារជាតិបានឯកភាព ចំពោះសំណើរដែលសំចតនាវាចម្បាំង កងទ័ពជើងទឹក សហរដ្ឋអាមេរិក ឈ្មោះ USS SAVANNAH (LCS 28) នៅកំពង់ផែ ស្វ័យតក្រុងព្រះសីហនុ ខេត្តព្រះសីហនុ ចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤។
ចំពោះការចូលចតក្នុងដំណើរទស្សនកិច្ចខាងលើនេះ ត្រូវបានក្រសួងការពារជាតិ តាមរយៈសេចក្តីប្រកាសព័ត៌មានខ្លួននាថ្ងៃ ១៣ ធ្នូថា “គឺជាព្រឹត្តិការណ៍សំខាន់មួយទៀត នៃភាពជាដៃគូកាន់តែប្រសើរឡើងរវាងកម្ពុជា និងសហរដ្ឋអាមេរិក”។
ប្រភពបន្តថា នាវាចម្បាំងកងទ័ពជើងទឹក អាមេរិកនេះមាននាវិក សរុបចំនួន១០៣នាក់។ ការចូលសំចតនាវា របស់សហរដ្ឋអាមេរិកនេះ ក្នុងគោលបំណងពង្រឹង និងពង្រីកចំណងមិត្តភាព ក៏ដូចជាការលើកកម្ពស់នៃកិច្ចសហប្រតិបត្តិការ ទ្វេភាគីរវាងកម្ពុជា និងអាមេរិក។
សេចក្តីប្រកាសបន្ថែមថា ចាប់តាំងពីឆ្នាំ២០០៧ ការចូលសំចតនាវាចម្បាំង កងទ័ពជើងទឹក សហរដ្ឋអាមេរិក មានចំនួន២៧គ្រឿង ដែលការចូលសំចតលើកនេះ ជាលើកដំបូងបន្ទាប់ពីខកខានអស់រយៈពេល៨ឆ្នាំ (ចាប់ពីឆ្នាំ២០១៧)។ ក្នុងអំឡុង ពេលចូលសំចត នាវានៅកម្ពុជារយៈពេល៥ថ្ងៃនេះ គណៈប្រតិភូនាវាបានរៀបចំផែនការ សកម្មភាពជាបន្តបន្ទាប់ ផងដែរ ដើម្បីជំរុញការផ្លាស់ប្តូរវប្បធម៌ និងកិច្ចសហប្រតិបត្តិការ។
ក្នុងផែនការ សកម្មភាពដែលបានគ្រោងទុករួមមាន ជំនួបពិភាក្សាការងារជាមួយមេបញ្ជាការ មូលដ្ឋានសមុទ្ររាម ជំនួប ពិភាក្សាការងារជាមួយថ្នាក់ ដឹកនាំរដ្ឋបាល ខេត្តព្រះសីហនុ កម្មវិធីប្រកួតកីឡា មិត្តភាពរវាងក្រុមនាវិក របស់នាវាចម្បាំង សហរដ្ឋអាមេរិក និងកងទ័ពជើងទឹកកម្ពុជា ក្នុងន័យលើកកម្ពស់ភាពស្និទ្ធស្នាល និងការ សាមគ្គីគ្នាជាក្រុម និងរួមមានកម្មវិធីជា លក្ខណៈមិត្តភាពមួយចំនួនទៀតផងដែរ ៕
