ភ្នំពេញ ៖ ដោយទទួលបានគោលការណ៍អនុញ្ញាតពី នាយឧត្តមសេនីយ៍ ស ថេត អគ្គស្នងការនគរបាលជាតិ នៅថ្ងៃទី៩ ខែកមរា ឆ្នាំ២០២៥ លោកឧត្តមសេនីយ៍ត្រី យូ បូរិន នាយការិយាល័យ នគរបាលអន្តរជាតិកម្ពុជា បានទទួលជួបសម្តែង ការគួរសម និងពិភាក្សាការងារជាមួយ លោកស្រី Samantha Hanes អ្នកគ្រប់គ្រងជាន់ខ្ពស់ផ្នែកគម្រោង នាយកដ្ឋានភាពជាដៃគូ និងគោលនយោបាយអន្តរជាតិ នៃទីភ្នាក់ងារសេវាកិច្ចការព្រំដែន ប្រទេសកាណាដា(CBSA) នៅទីស្តីការក្រសួងមហាផ្ទៃ ។
គោលបំណងនៃជំនួបខាងលើ គឺដើម្បីសិក្សាស្វែងយល់អំពីតួនាទី ភារកិច្ចរបស់អង្គភាព INTERPOL កម្ពុជា នៅច្រកទ្វារអន្តរជាតិ តាមព្រំដែន និងអាកាសយានដ្ឋានអន្តរជាតិ និងការបង្កើនទំនាក់ទំនងអន្តរជាតិ និងទំនាក់ទំនងទ្វេភាគី ជាមួយភាគីកម្ពុជា ដើម្បីរួមគ្នាទប់ស្កាត់ និងប្រយុទ្ធប្រឆាំងបទល្មើស ឆ្លងដែនគ្រប់ប្រភេទ។
ជាមួយគ្នានេះ តាមរយៈជំនួបពិភាក្សាគ្នានេះ ភាគីកាណាដា អាចនឹងរកឃើញវិស័យជាអាទិភាពដែល CBSA អាចជួយគាំទ្រដល់នគរបាលជាតិកម្ពុជា មានដូចជា៖ ការបណ្តុះបណ្តាលកសាងសមត្ថភាព ឬជំនួយជាមធ្យោបាយឧបករណ៍សម្ភារផ្សេងៗ។
ក្រៅពីការធ្វើបទបង្ហាញស្តីអំពីតួនាទី និងភារកិច្ចរបស់ INTERPOL កម្ពុជា ភាគីទាំងពីរ បានផ្លាស់ប្តូរយោបល់ និងបទពិសោធន៍ជូនគ្នាទៅវិញទៅមក ពាក់ព័ន្ធនឹងវិស័យផ្លាស់ប្តូរព័ត៌មាន និងកិច្ចសហប្រតិបត្តិការអន្តរជាតិ ជាពិសេសគឺបញ្ហា បទល្មើសគ្រឿងញៀន បទល្មើសឆ្លងដែនដែលប្រើប្រាស់ប្រព័ន្ធបច្ចេកវិទ្យាជាមធ្យោបាយ មានដូចជា៖ អំពើជួញដូរ និងរត់ពន្ធមនុស្ស អំពើឆបោកឆ្លងដែន។
ភាគីកាណាដា បានទទួលយកនូវព័ត៌មាន ដែលផ្តល់ជូនដោយភាគីកម្ពុជា និងបានសន្យាយកសំណូមពរ របស់ភាគីកម្ពុជា ពាក់ព័ន្ធនឹងការបណ្តុះបណ្តាល កសាងសមត្ថភាពមន្រ្តីក្នុងវិស័យប្រយុទ្ធប្រឆាំងគ្រឿងញៀនខុសច្បាប់ និងបទល្មើសបច្ចេកវិទ្យា ទៅសិក្សានៅក្នុងគម្រោងយុទ្ធសាស្រ្តឥណ្ឌូប៉ាស៊ីហ្វិករបស់រដ្ឋាភិបាលកាណាដា៕
