ភ្នំពេញ៖ លោកបណ្ឌិត អ៊ុម រម្យណី រដ្ឋលេខាធិការក្រសួងអប់រំ យុវជន និងកីឡា កាលពីថ្ងៃទី១០ ខែមករា ឆ្នាំ២០២៥ បានអញ្ជើញចូលរួម ក្នុងពិធីបើកកិច្ចប្រជុំកំពូលអតីតសមាជិក នៃគំនិតផ្ដួចផ្ដើម មេដឹកនាំយុវជនអាស៊ីអាគ្នេយ៍ (YSEALI) នៅរាជធានីភ្នំពេញ ដោយបានសម្ដែងការអបអរសាទរ ចំពោះការរីកចម្រើននៃគំនិតផ្ដួចផ្ដើម មេដឹកនាំយុវជនអាស៊ីអាគ្នេយ៍ (YSEALI) និងថ្លែងអំណរគុណយ៉ាងជ្រាលជ្រៅ ដល់រាជរដ្ឋាភិបាលសហរដ្ឋអាមេរិក ជាពិសេសស្ថានទូតអាមេរិក ប្រចាំព្រះរាជាណាចក្រកម្ពុជា ក្នុងការជួយគាំទ្រ ដល់យុវជនកម្ពុជាលើការអភិវឌ្ឍវិស័យអប់រំ តាមរយៈការផ្ដល់អាហារូបករណ៍ និងគំនិតផ្តួចផ្តើមនានា ក្នុងការកសាងសមត្ថភាព យុវជនសម្រាប់អភិវឌ្ឍអនាគតប្រទេសជាតិ។
លោកបណ្ឌិត អ៊ុម រម្យណី បានលើកឡើងថា ដូចបណ្តាប្រទេសអាស៊ីអាគ្នេយ៍ជាច្រើនដែរ ប្រទេសកម្ពុជា កំពុងស្ថិតក្នុងដំណើរអភិវឌ្ឍន៍ឆ្ពោះទៅជាប្រទេស មានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និង ក្លាយជាប្រទេសមានប្រាក់ចំណូលខ្ពស់ នៅឆ្នាំ២០៥០ ដោយសង្កត់ធ្ងន់លើកំណើនសេដ្ឋកិច្ច ការអភិវឌ្ឍសង្គម និងការលើកកម្ពស់វិស័យអប់រំ។ ទន្ទឹមនឹងនេះ យើងទាំងអស់គ្នាត្រូវសហការគ្នា និងប្រើប្រាស់សក្តានុពលនៃមេដឹកនាំយុវជនរបស់យើង ដោយបានគូសបញ្ជាក់ថា បទពិសោធន៍ ចំណេះដឹង និងជំនាញរបស់យុវជនអតីតសមាជិក YSEALI ដែលទទួលបានតាមរយៈការសិក្សា នៅសហរដ្ឋអាមេរិក គឺជាទុនមួយ ក្នុងការសម្រេចគោលដៅ ប្រកបដោយមហិច្ឆតារបស់កម្ពុជា។
យុវជនបានបង្ហាញសមត្ថភាព ក្នុងការរៀន ការសម្របខ្លួន និងភាពប៉ិនប្រសប់រួចហើយ ក្នុងបរិបទដ៏ចម្រុះនៅខាងក្រៅប្រទេស។ ស្របគ្នានេះដែរ យុវជនត្រឡប់មកប្រទេសកម្ពុជាវិញនឹងនាំមកនូវជំនាញបច្ចេកទេស និងតម្លៃនៃភាពច្នៃប្រឌិត ភាពធន់ និងការទទួលខុសត្រូវខ្ពស់ ដែលគុណសម្បត្ដិទាំងនេះនឹងបន្តជំរុញឱ្យប្រទេសកម្ពុជា មានការអភិវឌ្ឍ និងវិបុលភាពនាពេលអនាគត។
សូមជម្រាបជូនថា កិច្ចប្រជុំកំពូលអតីតសមាជិកនៃគំនិតផ្ដួចផ្ដើមមេដឹកនាំយុវជនអាស៊ីអាគ្នេយ៍ (YSEALI) នេះធ្វើឡើងក្នុងគោលបំណងផ្សារភ្ជាប់ និងបង្រួបបង្រួមទំនាក់ទំនង រវាងយុវជនកម្ពុជា ចំនួន៣៥០នាក់ ដែលបានចូលរួមក្នុងកម្មវិធីផ្លាស់ប្ដូរការសិក្សា YSEALI នៅសហរដ្ឋអាមេរិក និងនៅក្នុងតំបន់ ព្រមទាំងអតីតសមាជិក YSEALI ប្រមាណជាង១០០នាក់ ដែលមកពីបណ្ដាប្រទេសក្នុងតំបន់អាស៊ីអាគ្នេយ៍ និងទីម័រឡេសេ្ត។
គំនិតផ្ដួចផ្ដើមមេដឹកនាំយុវជនអាស៊ីអាគ្នេយ៍ (YSEALI) ត្រូវបានបង្កើតឡើងដោយរដ្ឋាភិបាលសហរដ្ឋអាមេរិកនៅឆ្នាំ២០១៣ និងផ្ដោតលើយុទ្ធសាស្រ្តចំនួន៤គឺ ការចូលរួមរបស់ពលរដ្ឋ សហគ្រិនភាព និងកំណើនសេដ្ឋកិច្ច ការអប់រំ និងការអភិវឌ្ឍន៍ភាពជាអ្នកដឹកនាំ។ YSEALI ក៏បានរៀបចំកម្មវិធីផ្សេងទៀតផងដែរ ដើម្បីជំរុញការអភិវឌ្ឍតាមរយៈការផ្ដល់នូវជំនាញសំខាន់ៗដល់យុវជន៕
