ភ្នំពេញ ៖ លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ និងជាប្រធានក្រុមប្រឹក្សាកីឡាក្រសួងមហាផ្ទៃ បានថ្លែងថា វិស័យកីឡា បានដើរតួនាទីយ៉ាងសំខាន់ ក្នុងការពង្រឹងទំនាក់ទំនង និងការបង្កើតសាមគ្គីភាព និងការលើកកម្ពស់សុខុមាលភាពសង្គម ហើយទាំងនេះ គឺជាចលករដ៏មានសារៈសំខាន់ ក្នុងការជំរុញ និងអភិវឌ្ឍន៍ធនធានមនុស្ស ប្រកបដោយប្រសិទ្ធភាព។
នាឱកាសអញ្ជើញជាអធិបតី ពិធីបើកព្រឹត្តិការណ៍ប្រកួត «ពានរង្វាន់កីឡាបាល់ទាត់ក្រសួងមហាផ្ទៃ» លើកទី២ ឆ្នាំ២០២៥ នៅទីលានបាល់ទាត់ ពហុកីឡដ្ឋានជាតិអូឡាំពិក រាជធានីភ្នំពេញ នៅល្ងាចថ្ងៃទី១៦ ខែមករា ឆ្នាំ២០២៥ លោកឧបនាយករដ្ឋមន្ត្រី ស សុខា «យើងបានដឹកហើយថា វិស័យកីឡា បានដើរតួនាទីយ៉ាងសំខាន់ ក្នុងការពង្រឹងទំនាក់ទំនង និងការបង្កើតសាមគ្គីភាព និងការលើកកម្ពស់សុខុមាលភាពសង្គម ដែលទាំងនេះ គឺជាចលករដ៏មានសារៈសំខាន់ ក្នុងការជំរុញ និងអភិវឌ្ឍន៍ធនធានមនុស្សប្រកបដោយប្រសិទ្ធភាព។ មិនតែប៉ុណ្ណោះ ការចូលរួមប្រកួតកីឡា បានបង្កើតនូវចំណងមិត្តភាព និងកិច្ចសហប្រតិបត្តិការល្អ ឱ្យកាន់តែស្និទ្ធស្នាល រវាងកីឡាករ កីឡាការិនី ក៏ដូចជារវាងអង្គភាពនានា ចំណុះឱ្យក្រសួងមហាផ្ទៃ» ។
លោកឧបនាយករដ្ឋមន្ត្រី បន្ដថា លើសពីនេះ កីឡា ក៏បានចូលរួមចំណែកកាត់បន្ថយនូវភាពតានតឹងតឹងផ្លូវចិត្ដ បញ្ជៀសនូវការប្រព្រឹត្តអំពើអបាយមុខ និងអំពើខុសច្បាប់នានាក្នុងសង្គម រួមមានជាអាទិ៍៖ ការប្រើប្រាស់គ្រឿងញៀន ល្បែងស៊ីសងខុសច្បាប់ អំពើហិង្សាក្នុងគ្រួសារជាដើម។ ផ្ទុយទៅវិញ កីឡាបាននាំមកនូវកាយសម្បទារឹងមាំ សុខភាពល្អ ទាំងផ្លូវកាយ និងផ្លូវចិត្ដ ដែលប្រជាពលរដ្ឋចង់បាន និងចង់ឃើញនៅក្នុងសង្គមជាតិរបស់ខ្លួន ស្របតាមការយកចិត្តទុកដាក់ និងខិតខំប្រឹងប្រែងលើកស្ទួយពីប្រមុខរាជរដ្ឋាភិបាលកម្ពុជា។
ឆ្លៀតក្នុងឱកាសនោះដែរ លោកលោកឧបនាយករដ្ឋមន្ត្រី ក៏បានផ្ដាំផ្ញើដល់កីឡាករទាំងអស់ ដែលបានចូលរួមក្នុងការប្រកួត «ពានរង្វាន់កីឡាបាល់ទាត់ក្រសួងមហាផ្ទៃ» លើកទី២ ឆ្នាំ២០២៥នេះ ត្រូវបន្ដរក្សាឱ្យបាននូវការប្រកួតប្របដោយស្មារតីយោគយល់អធ្យាស្រ័យគ្នា ដោយឈរលើគោលការណ៍ Fair-Play សាមគ្គីភាព គោរពវិន័យ និងការអនុវត្តតាមបទបញ្ជាការប្រកួតផងដែរ៕
