ភ្នំពេញ៖ នារសៀលថ្ងៃអាទិត្យ ទី២៦ ខែមករា ឆ្នាំ២០២៥ គណៈកម្មាធិការជាតិ រៀបចំការបោះឆ្នោត (គ.ជ.ប)មានកិច្ចប្រជុំជាមួយភាគីពាក់ព័ន្ធ នឹងការបោះឆ្នោតក្រោមអធិបតីភាពដ៏ខ្ពង់ខ្ពស់របស់ លោក ប្រាជ្ញ ចន្ទ ប្រធាន គ.ជ.ប ដើម្បីផ្សព្វផ្សាយ អំពីការសរុបព្រឹត្តិការណ៍ ទូទៅនៃថ្ងៃបោះឆ្នោត និងការប្រកាសលទ្ធផលបឋម សម្រាប់ការបោះឆ្នោ តជ្រើសរើសក្រុមប្រឹក្សាក្រុងកំពង់សោម នៃខេត្តព្រះសីហនុ ឆ្នាំ២០២៥។
លោក ប្រាជ្ញ ចន្ទ ប្រធាន គ.ជ.ប បានឱ្យដឹងថា ការបោះឆ្នោតជ្រើសរើស ក្រុមប្រឹក្សាក្រុងកំពង់សោម នៃខេត្តព្រះសីហនុ ដែលបានប្រព្រឹត្តទៅ មានដូចខាងក្រោម៖
•នៅវេលាម៉ោង ៧:០០ព្រឹក ថ្ងៃអាទិត្យ ទី២៦ ខែមករា ឆ្នាំ២០២៥ការិយាល័យបោះឆ្នោត លេខ ០០០៦ ដែលមានទីតាំងនៅសាលាបឋមសិក្សាស្មាច់ដែង ក្នុងឃុំរាម នៃខេត្តព្រះសីហនុ បានបើកដំណើរការ ដើម្បីឱ្យអ្នកបោះឆ្នោតជាសមាជិកក្រុមប្រឹក្សាឃុំ ក្នុងមុខតំណែងនៃឃុំទាំងប្រាំ ( រួមមាន សង្កាត់រាម សង្កា ត់បិតត្រាំង សង្កាត់អូរឧកញ៉ាហេង សង្កាត់បឹងតាព្រហ្ម និងសង្កាត់អូរជ្រៅ) ចំណុះឱ្យក្រុងកំពង់សោម ធ្វើការបោះឆ្នោត តាមការកំណត់នៃច្បាប់។ អ្នកបោះឆ្នោត ដែលបានអញ្ជើញទៅបោះឆ្នោត មានចំនួន៣១ នាក់ ស្មើនឹង ១០០% នៃអ្នកមានឈ្មោះ ក្នុងបញ្ជីបោះឆ្នោតសរុប ៣១ នាក់។
•ការបោះឆ្នោតត្រូវបានបិទបញ្ចប់នៅវេលាម៉ោង ៨:០៦នាទីព្រឹក បន្ទាប់ពីអ្នកបោះឆ្នោតដែលមានឈ្មោះក្នុងបញ្ជីបោះឆ្នោតបានបោះគ្រប់ចំនួន។
• បន្ទាប់ពីបិទការបោះឆ្នោត ដំណើរការរាប់សន្លឹកឆ្នោត ក៏ចាប់ផ្តើមភ្លាមៗនៅនឹងកន្លែង តាមនីតិវិធី និងសេចក្ដីណែនាំរបស់ គ.ជ.ប ក្រោមការឃ្លាំមើលពីភ្នាក់ងារ គណបក្សនយោបាយ និងអ្នកសង្កេតការណ៍បោះឆ្នោត។
លោក ប្រាជ្ញ ចន្ទ ប្រធាន គ.ជ.ប ក៏វាយតម្លៃថា ដំណើរការនៃការបោះឆ្នោតឡើងវិញនេះ បានប្រព្រឹត្តទៅដោយសេរីត្រឹមត្រូវ យុត្តិធម៌ ស្របតាមច្បាប់ បទបញ្ជា និងនីតិវិធី ប្រកបដោយសន្តិសុខសុវត្ថិភាព មានសណ្តាប់ធ្នាប់ល្អ និងត្រូវបានគណបក្សនយោបាយ ឈរឈ្មោះបោះឆ្នោត អ្នកសង្កេតការណ៍បោះឆ្នោត អ្នកសារព័ត៌មាន ចូលរួមតាមដាន សង្កេតការណ៍យ៉ាងយកចិត្តទុកដាក់។
ក្នុងកិច្ចប្រជុំផ្សព្វផ្សាយជាមួយ ភាគីពាក់ព័ន្ធនាពេលនោះ លោក ប្រាជ្ញ ចន្ទ ប្រធាន គ .ជ.ប បានបញ្ជាក់ជូនតាមដំណាក់កាលនីមួយៗ មានតាំងពីដំណាក់កាលការត្រៀមលក្ខណៈរៀបចំការបោះឆ្នោត ដំណើរការរៀបចំការបោះឆ្នោត ដំណើរការឃោសនាបោះឆ្នោត ការបោះឆ្នោត រាប់សន្លឹកឆ្នោត និងការប្រកាសលទ្ធផល នៃការបោះឆ្នោត។
ក្នុងដំណើរការត្រៀមលក្ខណៈ រៀបចំការបោះឆ្នោត លោក ប្រាជ្ញ ចន្ទ មានប្រសាសន៍បន្ថែមថា យោងអនុក្រឹត្យលេខ ២០១ អនក្រ.បក ចុះថ្ងៃទី២៨ ខែសីហា ឆ្នាំ២០២៤ និងសេចក្តីសម្រេចរបស់រាជរដ្ឋាភិបាលស្តីពី សមាជិកក្រុមប្រឹក្សាក្រុងកំពង់សោម សម្រាប់អាណត្តិទី១ នេះមាន ១៣រូប និ ង បានកំណត់យកថ្ងៃអាទិត្យ ទី២៦ ខែមករា ឆ្នាំ២០២៥ ជាថ្ងៃបោះឆ្នោតលើកទី១ (ការបោះឆ្នោតឡើងវិញ) ដើម្បីជ្រើសរើសក្រុមប្រឹក្សាក្រុងកំពង់សោម នៃខេត្តព្រះសីហនុ គ.ជ.ប ក៏បានចេញសេចក្ដីសម្រេចលេខ ៤៦៨ គ.ជ.បស.ស.រ ចុះថ្ងៃទី៩ ខែតុលា ឆ្នាំ២០២៤ ស្ដីពីការអនុវត្តការបោះឆ្នោតលើកទី១(ការបោះឆ្នោតឡើងវិញ) ដើម្បីជ្រើសរើសក្រុមប្រឹក្សាក្រុងកំព ង់សោម នៃខេត្តព្រះសីហនុ ឆ្នាំ២០ ២ ៥ ស្របតាមមាត្រា២៥ នៃច្បាប់ស្ដីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដែលចែងថា គណៈកម្មាធិការជាតិរៀបចំការបោះឆ្នោត (គ.ជ.ប) ត្រូវរៀបចំការបោះឆ្នោតឡើងវិញ ដើម្បីជ្រើសរើ សក្រុមប្រឹក្សាក្នុងករណីរាជធានី ខេត្ត ក្រុង ស្រុក ខណ្ឌ ដែលបង្កើតថ្មី ត្រូវធ្វើឡើងក្នុងរយៈពេលយ៉ាងយូរ ២៤០ថ្ងៃ។
លោក ប្រាជ្ញ ចន្ទ បន្តថា ដើម្បីធានាឱ្យដំណើរការ នៃការអនុ វត្តការងារនេះ បានប្រព្រឹត្តទៅដោយរលូន ស្របតាមច្បាប់ និងស្របតាមដំណាក់កាលនីមួយៗ អគ្គលេខាធិការដ្ឋាន គ.ជ.ប បានកសាងផែនការមេ ប្រតិទិន ព្រមទាំងឯកសារគតិយុត្តមួយចំនួនទៀត ដាក់ជូន គ.ជ.ប ពិនិត្យ និងសម្រេច សម្រាប់បម្រើឱ្យការបោះឆ្នោតឡើងវិញនេះ ដោយបានតា ក់តែ ងឡើងឱ្យស្របតាមស្ថានភាព នៃការអនុវត្តការងារជាក់ស្តែង។
ទន្ទឹមនឹងនេះ គ.ជ.ប បានធ្វើការជ្រើសរើស និងតែងតាំងគណៈកម្មការរៀបចំការបោះឆ្នោ ត ខេត្តព្រះសីហនុ រួមនឹងមន្រ្តីបោះឆ្នោតមួយចំនួន និង បានធ្វើការបណ្តុះបណ្តាល ដើម្បីបំពេញការងារ។
គ.ជ.ប បានធ្វើការប្រជុំជាមួយភាគីពាក់ព័ន្ធ និងបានផលិតសម្ភារ ឯកសារ និងបានធ្វើការផ្សព្វ ផ្សាយយ៉ាងទូលំទូលាយ ដែលមានជាអាទិ៍ ប្រតិទិន សេចក្ដីសម្រេច សេចក្ដីណែនាំ សៀវភៅណែនាំ សៀវភៅបត់ សៀវភៅសម្រាប់អ្នកបោះឆ្នោត ស្ទិកគ័រ ខិត្តបណ្ណ សេចក្ដីជូនដំណឹង សេចក្ដីប្រកាសព័ត៌មាន ព័ត៌មានស្ដីពីសកម្មភាពសំខាន់ៗរបស់ គ.ជ.ប បទយកការណ៍ កម្មវិធីស្វែងយល់ កិច្ចសម្ភាសន៍តាមប្រព័ន្ធអនឡាញ និងឯកសារផ្លូវការមួយចំនួនទៀត។
ក្នុងដំណាក់កាលរៀបចំការបោះឆ្នោត លោក ប្រាជ្ញ ចន្ទ បានជម្រាបជូនអំពីដំណើរការ នៃការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ ដែលមានគណបក្សនយោបាយចំនួន៤ ត្រូវបានទទួលស្គាល់ជាផ្លូវការក្នុងការចូលរួមការបោះឆ្នោត គឺគណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សឆន្ទៈខ្មែរ និងគណបក្ស
កម្លាំងជាតិ។
ជាមួយគ្នានេះ លោក ក៏បានជម្រាបជូន អំពីការរៀបចំបញ្ជីបោះឆ្នោត ដែលមានឈ្មោះអ្នកបោះឆ្នោត សរុបចំនួន ៣១ នាក់ ការចុះភ្នាក់ងារគណបក្សនយោបាយមាន ៤គណបក្ស អ្នកសង្កេតការណ៍ បោះឆ្នោតជាតិសរុប ៦នាក់ ភ្ញៀវពិសេស ១ នាក់ មកពីសាកលវិទ្យាល័យតូក្យូ នៃ ប្រទេសជប៉ុន ព្រមទាំ ងអ្នកសារព័ត៌មានជាតិសរុបចំនួន ១៧ នាក់។
ក្នុងដំណាក់កាលឃោសនាបោះឆ្នោត លោក ប្រាជ្ញ ចន្ទ បានមានប្រសាសន៍ថា ការឃោសនាបោះឆ្នោតមានរយៈពេល ៨ថ្ងៃ ចាប់ពីថ្ងៃទី១៧ ដល់ថ្ងៃទី២៤ ខែមករា ឆ្នាំ២០២៥។ គណបក្សនយោបាយឈរឈ្មោះបោះឆ្នោត មានសិទ្ធិស្មើគ្នាក្នុងការឃោសនាបោះឆ្នោត។
សភាពការណ៍ទូទៅ នៃដំណើរការឃោសនាបោះឆ្នោត របស់គណបក្សនយោបាយ បានប្រព្រឹត្តទៅក្នុងបរិយាកាសមានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងពុំមានបាតុភាពណាមួយ កើតឡើងគួរឱ្យកត់សម្គាល់ឡើយ។
អំពីការប្រកាសលទ្ធផល នៃការបោះឆ្នោតជ្រើសរើសក្រុមប្រឹក្សាក្រុងកំពង់សោម លោក ប្រាជ្ញ ចន្ទ បានមានប្រសាសន៍ថា លទ្ធផលបឋមនៃការបោះឆ្នោតត្រូវបានត្រួតពិនិត្យ និងផ្ទៀងផ្ទាត់យ៉ាងយកចិត្តទុកដាក់ ទាំងនៅថ្នាក់គណៈកម្មការរៀបចំការបោះឆ្នោតខេត្តព្រះសីហនុ និងនៅថ្នា ក់ គ.ជ.ប។
ដោយមានកិច្ចសហការជាមួយ អគ្គនាយកដ្ឋានទូរទស្សន៍ និងវិទ្យុជាតិកម្ពុជា លទ្ធផ ល ប ឋ មនៃការបោះឆ្នោត ត្រូវបានប្រកាសផ្សា យតាមរយៈទូរទស្សន៍ជាតិកម្ពុជា (ទទក) ផ្សាយតាមវិទ្យុជាតិកម្ពុជា ទីភ្នាក់ងារសារព័ត៌មានកម្ពុជា (AKP) និងតាមប្រព័ន្ធអ៊ីនធឺណិតតាមរយៈ អាសយដ្ឋានវេបwww.nec.gov.kh, App “CamNEC News”, Channel YouTube និងតាម Facebook Page របស់ គ.ជ.ប ផងដែរ។
លោក ប្រាជ្ញ ចន្ទ បានមានប្រសាសន៍បន្តទៀតថា តាមនីតិវិធីនៃការបោះឆ្នោត ក្រោយពីទទួលបានឯកសារពីការិយាល័យបោះឆ្នោត គណៈកម្មការរៀបចំការបោះឆ្នោត ខេត្តព្រះសីហនុ ត្រូវបង្កើតមជ្ឈមណ្ឌលមួយ សម្រាប់ត្រួតពិនិត្យបញ្ជាក់ និងបូកសរុបលទ្ធផលបណ្តោះអាសន្ន នៃការបោះឆ្នោត ដើម្បីផ្ញើជូន គ.ជ.ប ពិនិត្យ សម្រេចជាលទ្ធផលបោះឆ្នោតផ្លូវការ។ លទ្ធផលបណ្តោះអាសន្ននៃការបោះឆ្នោតនឹងត្រូវបិទផ្សាយនៅលេខាធិការដ្ឋាន នៃគណៈកម្មការរៀបចំការបោះឆ្នោត ខេត្តព្រះសីហនុ ដើម្បីឱ្យគណបក្សនយោបាយ ធ្វើការប្តឹងតវ៉ាមក គ.ជ.ប អំពីលទ្ធផល នៃការបោះឆ្នោតក្នុងរយៈពេលយ៉ាងយូរ ៣ថ្ងៃ បន្ទាប់ពីថ្ងៃបិទផ្សាយ។
បន្ទាប់ពីបញ្ចប់ដំណាក់កាលបិទផ្សាយលទ្ធផលបណ្តោះអាសន្ននៃការបោះឆ្នោត និងការដោះស្រាយ ពាក្យបណ្ដឹង (ប្រសិនបើមាន) គ.ជ.ប ត្រូវប្រកាសផ្សាយលទ្ធផលផ្លូវការនៃការបោះឆ្នោត ។
មុននឹងបញ្ចប់កិច្ចប្រជុំ លោក ប្រាជ្ញ ចន្ទ ប្រធាន គ.ជ.ប បានថ្លែងអំណរគុណយ៉ាងជ្រាល ជ្រៅចំពោះសមាជិកនៃក្រុមប្រឹ ក្សាឃុំក្នុងមុខតំណែងទាំងអស់ ដែលបានចូលរួមបោះឆ្នោត ដើម្បីជ្រើសរើសក្រុមប្រឹក្សាក្រុងកំពង់សោម នៃខេត្តព្រះសីហនុ ដែលជាតំណាងរបស់ប្រជាពលរដ្ឋ ក្នុងការដឹកនាំការអភិវឌ្ឍ និងលើកកម្ពស់លទ្ធិប្រជាធិបតេយ្យ និងគោលនយោបាយវិមជ្ឈការ និងវិសហមជ្ឈការ។ ឯកឧត្ដម ក៏បានថ្លែងអំណរគុណ ចំពោះគណៈបញ្ជាការសន្តិសុខអចិន្រ្តៃយ៍ សម្រា ប់ការបោះឆ្នោត អាជ្ញាធរមានសមត្ថកិច្ច មន្រ្តីបោះឆ្នោតគ្រប់លំដាប់ថ្នាក់ គណបក្សនយោបាយអ្នកសង្កេ
តការណ៍បោះឆ្នោតជាតិ ភ្ញៀវពិសេសអ្នកសារព័ត៌មានជាតិ និងភាគីពាក់ព័ន្ធទាំងអស់ ដែលបានចូលរួម និងសហការអនុវត្តតាមភារកិច្ចរៀងៗខ្លួនប្រកបដោ យស្មារតីទទួលខុសត្រូវខ្ពស់ ដែលជាការរួមចំ ណែក ដ៏សំខាន់ធ្វើឱ្យការបោះឆ្នោតជ្រើសរើសក្រុមប្រឹក្សាក្រុងកំពង់សោម នៃខេត្តព្រះសីហនុ ឆ្នាំ២០២ ៥ នេះ ប្រព្រឹត្តទៅដោយជោគជ័យ និងប្រកបដោយសន្តិសុខ សុវត្ថិភាព គ្មានអំពើហិង្សា គ្មានការគំរាមកំហែង និងមានសណ្តាប់ធ្នាប់ល្អ៕
