នាវាកងទ័ពជើងទឹកឥណ្ឌា ២គ្រឿង ចូលចតនៅកំពង់ផែ ស្វយ័តក្រុងព្រះសីហនុ

ភ្នំពេញ៖ នាវាកងទ័ពជើងទឹកឥណ្ឌា ចំនួន២គ្រឿង ឈ្មោះ INS SUJATA និងនាវា ICGS VEERA ដឹកនាំដោយវរនាវីទោ ARJUN SEKHAR មេបញ្ជាការនាវា INS SUJATA និងវរនាវីទោ RAMESH V.TALKE មេបញ្ជាការនាវា ICGS VEERA កងទ័ពជើងទឹកឥណ្ឌា នាព្រឹកថ្ងៃទី១៤ ខែកុម្ភៈនេះ បានចូលចតនៅកំពង់ផែស្វយ័តក្រុងព្រះសីហនុ ដើម្បីបំពេញទស្សនកិច្ច ៤ថ្ងៃ ។

ការចូលចតនេះត្រូវបានទទួលស្វាគមន៍ ដោយលោកវរនាវីឯក មាន សាវឿន មេបញ្ជាការរងមូលដ្ឋានសមុទ្ររាម និងនាយនាវីជាច្រើនរូបទៀត ។

ក្នុងដំណើរបំពេញទស្សនកិច្ច នៅព្រះរាជាណាចក្រកម្ពុជារយៈពេល៤ថ្ងៃ គិតចាប់ពីថ្ងៃទី១៤ ដល់ថ្ងៃទី១៧ ខែកុម្ភៈ ឆ្នាំ២០២៥ គឺដើម្បីពង្រឹង កិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព សាមគ្គីភាពឱ្យកាន់តែល្អ ទ្វេឡើងថែមទៀត រវាងប្រទេសទាំងពីរ(កម្ពុជា-ឥណ្ឌា) ។

សូមបញ្ជាក់ថា សម្រាប់លក្ខណៈបច្ចេកទេស នាវា INS SUJATA លេខP56 គឺមានទម្ងន់ផ្ទុក ២២៦០តោន , បណ្ដោយ ១០២ ម៉ែត្រ , ទទឹង ១១,៥ ម៉ែត្រ , ជម្រៅទឹក ៥ ម៉ែត្រ , ល្បឿន ១៥ knots ។ រីឯលក្ខណៈបច្ចេកទេស នាវា ICG VEERA លេខ35 ប្រភេទ OPV មានទម្ងន់ផ្ទុក ៣០០០ តោន , បណ្ដោយ ៩៩ ម៉ែត្រ , ទទឹង ១៤,៩ ម៉ែត្រ , ជម្រៅទឹក ៤,៧ ម៉ែត្រ , ល្បឿន ២៦knots ៕