ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានលើកទឹកចិត្តឱ្យប្រជាពលរដ្ឋហ៊ានរាយការណ៍ ចំពោះករណីគ្រូពេទ្យរូបណាមិនយកចិត្តទុកដាក់ ឬរើសអើង នៅពេលប្រើបណ្ណសមធម៌, បណ្ណងាយរងហានិភ័យ និងបណ្ណបេឡាជាតិសន្តិសុខសង្គម (បសស) ។
ការក្រើនរំលឹករបស់ សម្តេចមហាបវរធិបតី ហ៊ុន ម៉ាណែត នាឱកាសអញ្ជើញជាអធិបតីពិធីបើកសប្តាហ៍គាំពារសង្គមកម្ពុជា ឆ្នាំ២០២៥ និងប្រកាសដាក់ឱ្យអនុវត្តជាផ្លូវការ ក្របខណ្ឌគោលនយោបាយជាតិ គាំពារសង្គម ឆ្នាំ២០២៤-២០៣៥ នៅព្រឹកថ្ងៃទី២០ ខែកុម្ភៈ ឆ្នាំ២០២៥។
សម្តេចបវរធិបតី ណែនាំដល់ក្រសួងសុខាភិបាល ត្រូវធានាថាពលរដ្ឋគ្រប់រូប រួមទាំងពលរដ្ឋដែលប្រើប្រាស់បណ្ណសមធម៌, បណ្ណងាយរងហានិភ័យ និង បណ្ណ ប.ស.ស. ទទួលបានទាន់ពេល នូវសេវាសុខាភិបាលសារវន្ត ដើម្បីចៀសវាងនូវការ ថ្នាំងថ្នាក់ ដែលអាចផ្តល់ កម្មវិបាកអវិជ្ជមាន លើការអនុវត្តគោលនយោបាយ អាទិភាពរបស់រាជរដ្ឋភិបាល ក្នុងដំណើរឆ្ពោះទៅការគ្រប ដណ្តប់សុខភាព ជាសកលនៅកម្ពុជា។
ពាក់ព័ន្ធនឹងចំណុចនេះ សម្តេចបវរធិបតី មានប្រសាសន៍ថា «ខ្ញុំ សូមលើកទឹកចិត្តឱ្យប្រជាពលរដ្ឋហ៊ានរាយការណ៍ ចំពោះករណីដែលគ្រូពេទ្យរូបណាដែល មិនយកចិត្តទុកដាក់ នៅពេលប្រើប្រាស់បណ្ណណាមួយខាងលើ ដើម្បីទទួលបានសេវាពិនិត្យ និងព្យាបាល»។
លើសពីនេះ សម្តេចមហាបវរធិបតី ហ៊ុន ម៉ាណែត បានក្រើនរំលឹក ដល់ក្រុមគ្រូពេទ្យទាំងអស់ ត្រូវតែយកចិត្តទុកដាក់ ខ្ពស់បន្ថែមទៀត ក្នុងការផ្តល់សេវាព្យាបាលជូនប្រជាពលរដ្ឋ ដោយគ្មានការរើសអើង ជាពិសេសប្រជាពលរដ្ឋណា មានបណ្ណបេឡាជាតិសន្តិសុខសង្គម (បសស) ឬបណ្ណសមធម៌។
សម្ដេច នាយករដ្ឋមន្ដ្រី មានប្រសាសន៍ទៀតថា «កុំឱ្យមានរឿងថា អ្នកកាត់ ប ស ស ទៅគេអត់យកចិត្តទុកដាក់ ត្រូវធ្វើយ៉ាងម៉េចកុំឱ្យមានការរើសអើងឱ្យសោះ ពេទ្យរដ្ឋយើងដាច់ខាតត្រូវធានា ហើយដៃគូរក៏ត្រូវអនុតាមអភិក្រម។ តែមិនត្រូវរើសអើងអ្នកទៅបង់លុយ អ្នកកាន់ ប ស ស ឬបណ្ណសមធម៌ ត្រូវគិតគូរប្រជាពលរដ្ឋម្នាក់ៗជាមនុស្សមួយរូប ត្រូវការព្យាបាលដូចគ្នា»៕
