ភ្នំពេញ៖ តាសមរយៈសំណេរនៅលើបណ្ដាញសង្គមហ្វេសប៊ុក លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា ហៅកាត់ថា CMAC បានពោលពាក្យថា «ឈាមកូនចៅខ្មែរ នៅតែបន្តហូរ ដោយសារសំណល់គ្រាប់មីន និងគ្រាប់យុទ្ធភណ្ឌសង្គ្រាម»។
ការពោលពាក្យបែបនេះ ធ្វើឡើងបន្ទាប់ពីរូបលោកទទូលបានដំណឹង អំពីករណីផ្ទុះគ្រាប់៦៦មម(ប្រភេទB-៦៣) ដែលជាសំណល់គ្រាប់យុទ្ធភណ្ឌមិនទាន់ផ្ទុះពីសង្គ្រាម បណ្តាលឱ្យកូនក្មេងតូចៗ អាយុ២ឆ្នាំ ចំនួន២នាក់ បានស្លាប់ នៅថ្ងៃទី២២ ខែកុម្ភៈ ឆ្នាំ២០២៥ ។
បើតាមលោកអគ្គនាយកបានឱ្យដឹងថា ក្នុងចំណោមក្មេងទាំងពីរ ម្នាក់ស្លាប់នៅនឹងកន្លែងកើតហេតុ និងម្នាក់ទៀតស្លាប់នៅមន្ទីរពេទ្យ។ ករណីគ្រោះថ្នាក់បានកើតឡើង នៅភូមិក្រញូងឃុំតាសៀម ស្រុកស្វាយលើ ខេត្តសៀមរាប។ ផ្អែកតាមសាក្សីជាឪពុកក្មេងរងគ្រោះថា រូបគាត់កំពុងដេកសម្រាកនិងឃើញកូនៗ កាយដីលេងស្ថិតនៅចម្ងាយប្រមាណ៥ម៉ែត្រពីគាត់ក៏មានការផ្ទុះកើតឡើង។
លោក ហេង រតនា បានផ្ញើរសាររំលែកទុក្ខ និងបួងសួង ឱ្យវិញ្ញាណខន្តចៅៗ បានទៅកាន់ទីឋានបរមសុខកុំឃ្លៀងឃ្លាតឡើយ។
លោក ហេង រតនា បញ្ជាក់ថា «នេះជាសោកវិនាសកម្មបានកើតមានឡើង ដោយសារសំណល់យុទ្ធភណ្ឌសង្គ្រាម! សង្គ្រាមត្រូវបានបញ្ចប់ទាំងស្រុង និងសន្តិភាពពេញលេញ មានជាង២៥ឆ្នាំមកហើយ ប៉ុន្តែឈាមកូនចៅខ្មែរ នៅតែបន្តហូរ ដោយសារសំណល់គ្រាប់មីន និងគ្រាប់យុទ្ធភណ្ឌសង្គ្រាម!! »។
គួសបញ្ជាក់ថាផងដែរថា សម្ដេចមហាបវធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានអំពាវនាវប្រទេសម្ចាស់ជំនួយ និងដៃគូអភិវឌ្ឍន៍ បន្តគាំទ្រដល់សកម្មភាពបោសសម្អាតមីន គ្រាប់បែកចង្កោម និងសំណល់ជាតិផ្ទុះពីសង្គ្រាម សកម្មភាពអប់រំកាត់បន្ថយគ្រោះថ្នាក់ និងកិច្ចសង្គ្រោះជនពិការ ដោយសារគ្រឿងផ្ទុះទាំងនេះ។ជាមួយគ្នានេះ សម្ដេចធិបតី នាយករដ្ឋមន្រ្តី ក៏បានជំរុញវិស័យឯកជននិងសប្បុរសជន ឱ្យចូលរួមបន្ថែមទៀត ក្នុងដំណើរឆ្ពោះទៅរកការសម្រេចបាននូវគោលដៅថ្មី «ឆ្ពោះទៅរកកម្ពុជាមួយ គ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម»៕
