ភ្នំពេញ៖ ក្នុងឱកាសអនុញ្ញាតឱ្យ លោក Laurent Ferreira ប្រធាន និងនាយកប្រតិបត្តិធនាគារជាតិកាណាដា និងជាភាគហ៊ុននិករបស់ធនាគារ ABA និងគណៈប្រតិភូ ចូលជួបសម្តែងការគួរសម និងពិភាក្សាការងារ នៅវិមានសន្ដិភាព នារសៀលថ្ងៃទី២០ ខែមីនា ឆ្នាំ២០២៥ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្តឱ្យធនាគារ ABA ពិនិត្យលទ្ធភាព ក្នុងការគាំទ្រហិរញ្ញវត្ថុ ទៅដល់ការអភិវឌ្ឍវិស័យកសិ-ឧស្សាហកម្ម ដែលជាការយកចិត្តទុកដាក់ របស់រាជរដ្ឋាភិបាលកម្ពុជា ។
នៅក្នុងជំនួបនេះ លោក Laurent Ferreira ប្រធានធនាគារ បានគោរពជម្រាប ជូនសម្ដេចធិបតី អំពីវឌ្ឍនភាពអាជីវកម្ម របស់ធនាគារ ABA ដែលបានក្លាយជាធនាគារលំដាប់ទី១ នៅកម្ពុជា និងបានគូសបញ្ជាក់ថា ធនាគារ ABA ពិតជាមានសេចក្តីសោមនស្សរីករាយ ដែលបានធ្វើប្រតិបត្តិការអាជីវកម្ម នៅកម្ពុជា និងដែលបានចូលរួមចំណែក ដល់ការធ្វើទំនើបកម្មប្រព័ន្ធធនាគារនៅកម្ពុជា។
លោកប្រធានធនាគារ ជឿជាក់ថា ធនាគារ ABA នឹងបន្តបំពេញតួនាទីសំខាន់ និងបន្តចូលរួមចំណែកដល់ការរីកចម្រើន នៃវិស័យធនាគារនៅកម្ពុជា។
ជាការឆ្លើយតប សម្ដេចធិបតី បានអបអរសាទរ ចំពោះវឌ្ឍនភាព និងការរីកចម្រើនរបស់ធនាគារ ABA, ជាពិសេស ការទទួលបានចំណាត់ថ្នាក់ ជាធនាគារលំដាប់ទី១ នៅកម្ពុជា និងវាយតម្លៃខ្ពស់ ចំពោះតួនាទី និងការចូលរួមចំណែក របស់ធនាគារ ABA នៅក្នុងការធ្វើទំនើបកម្មប្រព័ន្ធធនាគារកម្ពុជា តាមរយៈការធ្វើប្រតិបត្តិការ តាមប្រព័ន្ធអនឡាញ ប្រកបដោយភាពងាយស្រួល និងសុវត្ថិភាព។
ទន្ទឹមនឹងនោះ សម្ដេចធិបតី បានគូសបញ្ជាក់អំពីការដាក់ចេញ នូវគោលនយោបាយគន្លឹះនានា របស់រាជរដ្ឋាភិបាល ក្នុងការគាំទ្រ និង ធានានូវភាពធន់នៃប្រព័ន្ធធនាគារកម្ពុជា។
ជាមួយគ្នានេះ សម្តេចធិបតី ក៏បានលើកទឹកចិត្តឱ្យធនាគារ ABA ពិនិត្យលទ្ធភាព ក្នុងការគាំទ្រហិរញ្ញវត្ថុ ទៅដល់ការអភិវឌ្ឍវិស័យកសិ-ឧស្សាហកម្ម ដែលជាការយកចិត្តទុកដាក់ របស់រាជរដ្ឋាភិបាលកម្ពុជា ដើម្បីជំរុញការបង្កើនតម្លៃបន្ថែម របស់វិស័យនេះផងដែរ៕
