ភ្នំពេញ៖ លោក ហួត ហាក់ រដ្ឋមន្ត្រីក្រសួងទេសចរណ៍ បានធ្វើការណែនាំ ដល់បេក្ខជន និងបេក្ខនារីជ័យលាភីអាហារូបករណ៍ចំនួន ១៧រូប ដែលនឹងទៅសិក្សា នៅប្រទេសអូស្ត្រាលី ត្រូវដឹងថា ក្រៅពីការសិក្សា និស្សិតម្នាក់ គឺជាទូតសុឆន្ទៈតំណាងកម្ពុជា ក្នុងការបង្ហាញពីវប្បធម៌ ទេសចរណ៍ ការអភិវឌ្ឍ និងស្ថានភាពពិត របស់ប្រទេសកម្ពុជា ឱ្យពិភពលោកបានស្គាល់ ។
ការណែនាំរបស់លោករដ្ឋមន្ត្រីខាងលើនេះ ធ្វើឡើងក្នុងឱកាស អញ្ជើញសំណេះសំណាលជាមួយបេក្ខជន និងបេក្ខនារីជ័យលាភីអាហារូបករណ៍ចំនួន ១៧រូប ទៅសិក្សានៅប្រទេសអូស្ត្រាលី មកពីក្រសួង ស្ថាប័ន និងផ្នែកឯកជនផ្សេងៗ ទៅសិក្សាថ្នាក់បរិញ្ញាបត្រជាន់ខ្ពស់ និងបណ្ឌិត សិក្សាផ្នែកគ្រប់គ្រងគ្រោះមហន្តរាយនិងភាពធន, យុទ្ធសាស្រ្តទំនាក់ទំនង, សិក្សាអភិវឌ្ឍន៍, យេនឌ័រ និងការសិក្សាអភិឌ្ឍន៍, សហគ្រិនភាព និងនវានុវត្តន៍, គីមីចំនីអាហារ និងបច្ចេកវិទ្យា, បរិស្ថាន និងនិរន្តភាព, ធុរកិច្ចកសិកម្ម, ច្បាប់ក្នុងការដោះស្រាយវិវាទ, ការអភិវឌ្ឍន៍សកល, បញ្ញាសិប្បនិមិ្មត (AI), សុខភាពបរិស្ថាន, សេដ្ឋកិច្ច, និងអប់រំ កាលពីថ្ងៃទី២៧ ខែមីនា ឆ្នាំ២០២៥ ។
នៅក្នុងពិធីខាងលើនេះ លោករដ្ឋមន្រ្តី បានសម្តែងការស្វាគមន៍យ៉ាងកក់ក្តៅ ចំពោះប្អូនៗជ័យលាភីអាហារូបករណ៍ ទៅប្រទេសអូស្ត្រាលី មកកាន់ក្រសួងទេសចរណ៍ និងបានកោតសរសើរ អបអរសារទរ និងវាយតម្លៃខ្ពស់ចំពោះសមត្ថភាព និងការខិតខំប្រឹងប្រែងរបស់បេក្ខជន និងបេក្ខនារីជ័យលាភី ព្រមទាំងអរគុណចំពោះចំណាប់អារម្មណ៍ចង់ដឹង និងចង់ស្គាល់ក្រសួងទេសចរណ៍។
ជាមួយគ្នានេះ លោករដ្ឋមន្រ្តី បានបញ្ជាក់ជូន និស្សិតជ័យលាភី អំពីតួនាទី និងកាតព្វកិច្ចរបស់យុវជន ចំពោះប្រទេសជាតិ ពេលបំពញការសិក្សា នៅក្រៅប្រទេស ក្រៅពីការសិក្សា ប្រជាជនកម្ពុជាម្នាក់ ឬនិស្សិតម្នាក់ ជាទូតសុឆន្ទៈតំណាងកម្ពុជា ក្នុងការបង្ហាញពីវប្បធម៌ ទេសចរណ៍ ការអភិវឌ្ឍ និងស្ថានភាពពិត របស់ប្រទេសកម្ពុជា ឱ្យពិភពលោកបានស្គាល់ និងពេលបញ្ចប់ការសិក្សា ត្រូវត្រឡប់មកវិញ ប្រកបដោយសុវត្ថិភាព មានសមត្ថភាព ក្នុងការរួមចំណែកចូលរួម ជាមួយរាជរដ្ឋាភិបាល ក្នុងការអភិវឌ្ឍប្រទេស ទៅតាមជំនាញរៀងៗខ្លួន ។
ដោយឡែក លោករដ្ឋមន្ត្រី ក៏បានណែនាំ ក្នុងករណីមានបញ្ហា ឬសំណូមពរអ្វីមួយនៅក្រៅប្រទេស ឱ្យទំនាក់ទំនងទៅស្ថានឯកអគ្គរាជទូត ព្រះរាជាណាចក្រកម្ពុជា ប្រចាំនៅប្រទេសដែលកំពុងរស់នៅ។
បន្ថែមលើនេះ លោករដ្ឋមន្រ្តី បានជំរុញលើកទឹកចិត្តដល់ប្អូនៗ ឱ្យចូលរួមក្នុងកម្មវិធីដែលស្ថានឯកអគ្គរាជទូត ព្រះរាជាណាចក្រកម្ពុជា ប្រចាំនៅប្រទេសដែលប្អូនៗរស់នៅ និងក្រុមការងារយុវជននៅទីនោះផងដែរ និងបានផ្តល់ជូនប្រតិទិនឆ្នាំ២០២៥ របស់ក្រសួងទេសចរណ៍ Eco Bag ក្រសួងទេសចរណ៍ Pin របស់ក្រសួងទេសចរណ៍ និងសៀវភៅជាកាដូអនុស្សាវរីយ៍ ចំនួន ៣ក្បាលក្នុងម្នាក់ៗ ដែលជាចំណងដៃរបស់លោករដ្ឋមន្ត្រី រួមមាន៖ (១)អ្នកយុទ្ធសាស្ត្រវ័យក្មេងនៅអាស៊ី (សម្តេចតេជោ) (២)ទឹកចិត្តអ្នកជួយសង្គ្រោះ (សម្តេចកិត្តិព្រឹទ្ធបណ្ឌិត) (៣)កូនប្រុសច្បងដ៏មានឥទ្ធិពល (សម្តេចធិបតី) ដែលសៀវភៅទាំងបីនេះ នឹងជាត្រីវិស័យដ៏សំខាន់ ដែលប្អូនៗអាចដកស្រង់ សម្រាប់ជាបទពិសោធជីវិត និងជាមូលដ្ឋាន ដើម្បីតម្រង់អនាគតរបស់ខ្លួន លើវិថីការងារដែលប្អូនជ្រើសរើស ព្រមទាំងជូនពរថ្នាក់ដឹកនាំ និងប្អូនៗទាំងអស់ ព្រមទាំងក្រុមគ្រួសារ ពិសេសក្នុងឱកាសបុណ្យចូលឆ្នាំថ្មី ប្រពៃណីខ្មែរខាងមុខនេះ សូមមានសុខភាពល្អ សុភមង្គល និងជោគជ័យគ្រប់ភារកិច្ច និងការរៀនសូត្រ៕
