ភ្នំពេញ ៖ ក្រុមហ៊ុន Smart Eden របស់ប្រទេសបារាំង បានបង្ហាញពីបំណងពង្រីក ការនាំចេញផលិតផលកម្ពុជា បន្ថែមទៀតដូចជា អង្ករ ម្រេច ស្ករត្នោត និងធ្យូងអនាម័យ ទៅកាន់ទីផ្សាររបស់ខ្លួន ក្នុងឆ្នាំ២០២៥នេះ ។
ការអះអាងរបស់ក្រុមហ៊ុនបារាំងនេះ ក្នុងឱកាសលោក Laurent Strauch នាយកប្រតិបត្តិក្រុមហ៊ុន Smart Eden និងអ្នកឧកញ៉ា ហ៊ុន ឡាក់បានចូលជួបពិភាក្សា ជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីពិភាក្សា អំពីកិច្ចសហប្រតិបត្តិការក្នុងការផលិត និងការនាំចេញផលិតផលកម្ពុជា ទៅកាន់ទីផ្សារបារាំង នាថ្ងៃ១ មេសា ។
ក្នុងជំនួប លោក Laurent Strauch បានលើកឡើងថា ក្រុមហ៊ុន Smart Eden បាននាំចេញគ្រាប់ស្វាយចន្ទី និងដំណាប់ស្វាយពីកម្ពុជា តាំងពីឆ្នាំ២០២៤ ហើយទទួលបានការគាំទ្រ ច្រើនពីអតិថិជនក្នុងប្រទេសបារាំង។
លោកក៏បានជម្រាប ជូនអំពីដំណើរការរបស់ Smart Eden ដែលជាក្រុមហ៊ុនចែកចាយ ផលិតផលដ៏ធំ បច្ចុប្បន្នមានបណ្តាញ លក់ជាង ៦.០០០ ទីតាំងនៅទូទាំងប្រទេសបារាំង ។
លោក Strauch បានបញ្ជាក់ថា “យើងមានបំណងពង្រីក ការនាំចេញផលិតផលកម្ពុជា ពី១០ ទៅ១៥មុខ ក្នុងឆ្នាំ២០២៥នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ។ យើងក៏គ្រោងផលិតប័រពីគ្រាប់ស្វាយចន្ទី ដើម្បីនាំចេញទៅបារាំងផងដែរ”៕
