ភ្នំពេញ ៖ ក្រោយមានការចែកចាយ ពាសពេញបណ្តាញសង្គម នាព្រឹកថ្ងៃ២ មេសា អំពីករណីផ្សាយថា មានក្រុមនគរបាលចរាចរណ៍ បានប្តូរទីតាំងរើសប៉ារាស់ ដោយមិនទាន់ចប់ម៉ោង ដោយសារមានបញ្ហា ពេលកំពុងអនុវត្តច្បាប់ចរាចរណ៍ ស្នងការខេត្តបានចេញ បទបញ្ជាស្រាវជ្រាវករណីនេះភ្លាមៗផងដែរ ។
បើតាមសេចក្តីបំភ្លឺព័ត៌មាន ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល លោកឧត្តមសេនីយ៍ទោ ឈឿន សុចិត្ត ស្នងការនគរបាល ខេត្តកណ្តាល បានបញ្ជាកម្លាំងជំនាញ ចុះស្រាវជ្រាវ ស៊ើបអង្កេត អំពីតួនាទី ភារកិច្ច ទៅលើកម្លាំងនគរបាលចរាចរណ៍ ពាក់ព័ន្ធក្នុងការ អនុវត្តរឹតបន្តឹងច្បាប់ចរាចរណ៍ផ្លូវគោក នៅគោលដៅនេះដែលបានកើតឡើងនៅព្រឹកថ្ងៃទី២ ខែមេសា ឆ្នាំ២០២៥ ចំណុចផ្លូវជាតិលេខ៣ ចន្លោះគីឡូម៉ែត្រលេខ២៨-២៩ ឋិតក្នុងភូមិព្រៃទទឹង ឃុំត្រពាំងវែង ស្រុកកណ្តាលស្ទឹង ខេត្តកណ្តាល។
ការចុះឲ្យស្រាវជ្រាវករណីនេះ បន្ទាប់ពីឃើញគណនី ហ្វេសប៊ុកឈ្មោះ Lay Kongkea បានបង្ហោះវីដេអូ សកម្មភាពមន្រ្តីនគរបាល ចរាចរណ៍ដាក់គោលដៅអនុវត្តរឹតបន្តឹងច្បាប់ចរាចរណ៍ ផ្លូវគោកដោយបាននិយាយថា “នៅពេលស្ទាក់រថយន្ត គាត់មានបញ្ហាចាប់ផ្តើម រើប៉ារាស់ដោយមិនទាន់ចប់ម៉ោង”៕
