ម៉ូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានអំពាវនាវឱ្យរុស្ស៊ី និងចិន បង្កើនកិច្ចសហប្រតិបត្តិការ ជាយុទ្ធសាស្ត្ររបស់ពួកគេជាប់លាប់ ចំពេលមានភាពចលាចលជាសកល។ លោក ពូទីន បានធ្វើការកត់សម្គាល់នេះ នៅពេលជួបជាមួយរដ្ឋមន្ត្រីការបរទេសចិន លោក វ៉ាង យី នៅវិមានក្រឹមឡាំង។
ក្នុងជំនួបនោះ លោក ពូទីន បានពាំនាំនូវការសួរសុខទុក្ខយ៉ាងស្មោះស្ម័គ្រ ចំពោះប្រធានាធិបតីចិន លោក ស៊ី ជីនពីង និងបានសម្តែងការពេញចិត្ត ចំពោះការអនុវត្តប្រកបដោយប្រសិទ្ធភាពនៃមតិឯកភាព ដែលសម្រេចបានរវាងប្រមុខរដ្ឋនៃប្រទេសទាំងពីរ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានចិនស៊ិនហួ។
លោកបានកត់សម្គាល់ថា ទំនាក់ទំនងរុស្ស៊ី-ចិន បន្តអភិវឌ្ឍក្នុងកម្រិតខ្ពស់ ដោយកិច្ចសហប្រតិបត្តិការជាក់ស្តែង កាន់តែស៊ីជម្រៅលើវិស័យផ្សេងៗ និង “ឆ្នាំនៃវប្បធម៌រុស្ស៊ី-ចិន” ដែលកំពុងបន្តបង្កើតការគាំទ្រ ជាសាធារណៈយ៉ាងស្វាហាប់ ពង្រឹងបន្ថែមទៀតនូវមូលដ្ឋានគ្រឹះ នៃមិត្តភាពទ្វេភាគី។
ដើម្បីរំលឹកខួបលើកទី ៨០ នៃជ័យជំនះរបស់សហភាពសូវៀតក្នុងសង្គ្រាមស្នេហាជាតិដ៏អស្ចារ្យនៅឆ្នាំនេះ លោក ពូទីន បានបន្តការអញ្ជើញតំណាងចិន ឱ្យចូលរួមក្នុងព្រឹត្តិការណ៍រំលឹកខួបនៅក្នុងប្រទេសរុស្ស៊ី។ លោកបានសង្កត់ធ្ងន់លើសារៈសំខាន់ជាប្រវត្តិសាស្ត្រនៃការប្រារព្ធពិធី ជ័យជំនះលើរបបហ្វាស៊ីសនិយមណាស៊ី និងយោធានិយមជប៉ុន ដោយបញ្ជាក់ថា រុស្ស៊ីកំពុងរៀបចំយ៉ាងពេញលេញសម្រាប់ឱកាសនេះ។
លោកបានបន្ថែមថា ព្រឹត្តិការណ៍ដ៏សំខាន់នេះគួរតែជំរុញភាពជាដៃគូយុទ្ធសាស្ត្រ លើគ្រប់ជ្រុងជ្រោយរុស្ស៊ី-ចិនទៅកាន់កម្ពស់ថ្មី និងពង្រឹងកិច្ចសហប្រតិបត្តិការពហុភាគី ក្នុងក្របខ័ណ្ឌដូចជាអង្គការសហប្រជាជាតិ អង្គការសហប្រតិបត្តិការសៀងហៃ និង BRICS ។ ចំពេលមានភាពចលាចលជាសកល លោក ពូទីន បានសង្កត់ធ្ងន់លើតម្រូវការសម្រាប់ប្រទេសទាំងពីរក្នុងការបញ្ជូនសញ្ញាដ៏រឹងមាំ នៃការពង្រឹងការសម្របសម្រួលយុទ្ធសាស្ត្រទៅកាន់ពិភពលោក។
លោក វ៉ាង យី ដែលជាសមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តចិន ក៏បានពាំនាំនូវការគោរពដ៏កក់ក្តៅ ពីប្រធានាធិបតីចិនលោក ស៊ី ជីនពីង កាន់លោកប្រធានាធិបតី ពូទីន ផងដែរ។ លោកបានគូសបញ្ជាក់ថា ក្រោមការណែនាំ ជាយុទ្ធសាស្ត្ររបស់ប្រមុខរដ្ឋទាំងពីរ ទំនាក់ទំនងចិន-រុស្ស៊ី បានរីកចម្រើនទៅជាភាពជាដៃគូដែលមានភាពធន់ និងស្ថិរភាព ដែលត្រូវបានកំណត់ដោយការពង្រឹងទំនុកចិត្តផ្នែកនយោបាយ ការតម្រឹមយុទ្ធសាស្ត្រកាន់តែជិតស្និទ្ធ និងកិច្ចសហប្រតិបត្តិការ ជាក់ស្តែងប្រកបដោយនិរន្តរភាព៕
ប្រែសម្រួល ឈូក បូរ៉ា
