ភ្នំពេញ ៖ ក្រសួងបរិស្ថាន ឱ្យអង្គការថែរក្សា បរិស្ថាន និងកសិកម្ម បញ្ឈប់ជាបន្ទាន់នូវ សកម្មភាពផ្តល់បណ្ណ សរសើរ មេត្រីភាពបរិស្ថាន ជូនដល់រូបវន្តបុគ្គល ឬនីតិបុគ្គលទាំងឡាយណា ដែលប្រាសចាកនឹងច្បាប់ នាំឱ្យមានការភ័ន្តច្រឡំ ដល់សាធារណជន។
ថ្មីៗនេះ ក្រសួងបរិស្ថាន បានជូនដំណឹងដល់អង្គការថែរក្សាបរិស្ថាន និងកសិកម្ម ឱ្យបានជ្រាបថា ក្រសួងបរិស្ថាន ដែលមានអគ្គនាយកដ្ឋាន ចំណេះដឹង និងព័ត៌មានបរិស្ថានជាសេនាធិការបាននិងកំពុង ដំណើរការអនុវត្តការ វាយតម្លៃគុណវុឌ្ឍដល់រូបវន្តបុគ្គល និងនីតិបុគ្គល ដែលបានចូលរួម ប្រតិបត្តិមេត្រីបរិស្ថាន ដើម្បីផ្តល់ បណ្ណសរសើរ មេត្រីបរិស្ថាន ។ ការផ្តល់បណ្ណសរសើរមេត្រីបរិស្ថាន ជូនដល់រូបវន្តបុគ្គល និងនីតិបុគ្គល ជាសមត្ថកិច្ចរបស់ក្រសួងបរិស្ថាន ដូចមានចែងក្នុងមាត្រាលេខ ៧៤៨ នៃក្រមបរិស្ថាន និង ធនធានធម្មជាតិ។
ក្នុងន័យនេះ ក្រសួង បញ្ជាក់ថា «សូមអង្គការថែរក្សាបរិស្ថាន និងកសិកម្ម បញ្ឈប់ជាបន្ទាន់នូវសកម្មភាពផ្តល់ បណ្ណសរសើរមេត្រីភាពបរិស្ថានជូនដល់រូបវន្តបុគ្គល ឬនីតិបុគ្គលទាំងឡាយណា ដែលប្រាសចាកនឹងច្បាប់ ដែលនាំឱ្យមានការភ័ន្តច្រឡំដល់សាធារណជនអំពីស្តង់ដា និងនីតិវិធីវាយតម្លៃគុណវុឌ្ឍប្រតិបត្តិមេត្រីបរិស្ថាន ដល់រូបវន្តបុគ្គល និងនីតិបុគ្គល ដើម្បីផ្តល់បណ្ណសរសើរមេត្រីបរិស្ថាន»។
