ភ្នំពេញ ៖ ដោយមើលឃើញ ពីសកម្មភាព របស់អ្នកបង្កើតមាតិកាមួយចំនួនដើរហួតបន្ទាត់ព្រំដែន លោក ប៉ែន បូណា ប្រធានអង្គភាព អ្នកនាំពាក្យរាជរដ្ឋាភិបាលកម្ពុជាថ្លែងថា អ្នកបង្កើតមាតិកា ទាំងនោះមានមោទកភាពជ្រុលពេក ទើបបានជាដើរធ្លាក់ចូលអន្ទាក់ នយោបាយរបស់ក្រុមប្រឆាំង ដែលកើតចេញពីការគាំទ្រ ចំពោះការបញ្ចេញមតិរបស់ខ្លួនអំពីបញ្ហាសង្គម ។
ការលើកឡើងរបស់អ្នកនាំពាក្យនេះ បន្ទាប់ពីអ្នកបង្កើតមាតិមួយចំនួន ក្នុងបណ្តាញសង្គម បានបញ្ចេញមតិរបស់ខ្លួន ពាក់ព័ន្ធបញ្ហាជាតិ នាពេលបច្ចុប្បន្នបានដើរហួសបន្ទាត់ព្រំដែន នៃការកំណត់ តាមច្បាប់ ហើយមានសាធារណជន ជាពិសេសក្រុមប្រឆាំង នៅក្រៅប្រទេសបានសម្តែងការគាំទ្រ ចំពោះសំណេររបស់ខ្លួន ក៏ត្រូវបានអាជ្ញាធរមាន សមត្ថកិច្ចកោះហៅទៅអប់រំណែនាំ។
លោក ប៉ែន បូណា បានលើកឡើងថា ការបញ្ចេញមតិនៅលើបណ្តាញសង្គម គឺមានស្ទើរតែគ្រប់គ្នាទៅហើយ នាពេលបច្ចុប្បន្ននេះ ប៉ុន្តែក្នុងចំណោមអ្នកបញ្ចេញមតិ ក៏មានមួយចំនួនតូចបានសម្តែងការបញ្ចេញមតិ របស់ខ្លួនហួសពីព្រំដែន កំណត់ក៏ត្រូវបានសមត្ថកិច្ចហៅមកអប់រំណែនាំ ។
លោកថា ប៉ុន្តែដោយសារតែមានមោទកភាព ចំពោះការបញ្ចេញមតិហួសពីព្រំដែននេះហើយទទួលបានការគាំទ្រយ៉ាងខ្លាំងក្លាពីសាធារណជន និងក្រុមប្រឆាំង ទើបធ្វើឲ្យពួកគេមិនព្រមបញ្ឈប់សកម្មភាព ដែលប្រាកចាក់ពីសង្គមទេ បែរជារឹតតែបញ្ចេញបន្ថែមទៀត ទោះមានការហៅទៅអប់រំណែនាំក៏ដោយ ។
លោកអ្នកនាំពាក្យបញ្ជាក់ថា “ជាក់ស្តែងយើងបានឃើញករណីហ្នឹងមួយចំនួនដែរ មិនច្រើនទេ មនុស្សមួយចំនួនគាត់អ្នកលេងហ្វេសប៊ុក អ្នកបង្កើតមាតិកាតាមបណ្តាញ សង្គមមួយចំនួនគាត់ធ្លាក់ទៅក្នុងអន្លួង អន្ទាក់របស់ក្រុមប្រឆាំង។ សូមជម្រាបថា ក្រុមប្រឆាំងគាត់នៅក្រៅស្រុក មានបណ្តាញរបស់គេ គេរៀបចំត្រឹមត្រូវ ។ កាលណាមានអ្នកណាម្នាក់ដែលនិយាយអ្វីមួយប៉ះពាល់ទៅរដ្ឋាភិបាល គេចាប់ផ្តើមទាញយកហើយ គេចាប់ផ្តើមចូលទៅខំមិន អូ …កោតសរសើរ សុទ្ធតែអ្នកហ៊ាននិយាយការពិត ជាវីរៈបុរសអីណាជួយសង្គម ជួយប្រទេសជាតិ រហូតទៅដល់យករូបថតម្នាក់ ហ្នឹងទៅផ្សព្វផ្សាយបន្ត លើកតម្កើងអីចឹងទៅ ស្រាប់តែម្នាក់នុងគាត់ដូចជាជោរ ។ ដល់ឃើញមានការគាំទ្រពីក្រុមប្រឆាំងហ្នឹងបាន views like ច្រើនអីហ្នឹង ក៏ចេះតែទៅហើយ ដោយពុលទឹកមាត់បន្ថែមទៀត” ។
ជាមួយគ្នានេះ លោក ប៉ែន បូណា ក៏បានទទួលស្គាល់ដែរ អ្នកខ្លះដែលបញ្ចេញមតិត្រឹមត្រូវ តាមច្បាប់គឺពួកគេគ្មានទោសអ្វីនោះទេ តែមនុស្សខ្លះនៅតែរឹងទទឹងមិនស្តាប់ តាមការណែនាំរបស់អាជ្ញាធរ ទើបត្រូវមានទោសទណ្ឌតាមផ្លូវច្បាប់ ៕
