ភ្នំពេញ ៖ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម របស់កម្ពុជា បានពន្យល់ថា ជាធម្មតាការដំឡើងពន្ធ ធ្វើឱ្យទំនិញឡើងថ្លៃ ដូច្នេះអ្នកប៉ះពាល់ គឺអ្នកបញ្ជាទិញ ដែលជាប្រជាជនអាមេរិករងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗ ដូចជា៖ វាយណភណ្ឌ និងសំលៀកបំពាក់ ជាដើម។
ការលើកឡើងរបស់ លោកស្រី ចន និម្មល បន្ទាប់ពីលោក ដូណាល់ ត្រាំ នៅថ្ងៃទី៣ ខែមេសា ឆ្នាំ២០២៥ ត្រូវនឹងថ្ងៃទី២ ខែមេសា នៅអាមេរិក បានសម្រេចកំណត់ពន្ធគយលើទំនិញនាំចូលពីកម្ពុជាប្រមាណ៤៩% ដែលកម្រិតខ្ពស់មួយ ដើម្បីជាការសងសឹក ខណៈកម្ពុជាយកពន្ធនាំចូលទំនិញពីសហរដ្ឋអាមេរិកវិញ ក្នុងកម្រិត៩៧%។
បើតាម ដូណាល់ ត្រាំ ការដំឡើងពន្ធនេះ នឹងចូលជាធរមាន នៅថ្ងៃទី៩ ខែមេសា ឆ្នាំ២០២៥ ខាងមុខនេះ។
តាមរយៈកិច្ចសម្ភាសន៍ពិសេសជាមួយ ទូរទស្សន៍ជាតិកម្ពុជា ស្ដីពីការដំឡើងពន្ធគយ របស់សហរដ្ឋអាម៉េរិក លើទំនិញនាំចូលពីកម្ពុជា នៅថ្ងៃទី៣ ខែមេសា ឆ្នាំ២០២៥ ថា តើការដំឡើងពន្ធ៤៩% របស់អាមេរិកលើប្រទេសកម្ពុជា តើប៉ះពាល់កម្ពុជាដែរទេ? ច្បាស់ណាស់ការដំឡើងពន្ធនេះធ្វើឱ្យប៉ះពាល់ដល់ប្រទេសកម្ពុជា។ ប៉ុន្ដែអ្នកប៉ះពាល់ដំបូងគេ គឺអ្នកបញ្ជាទិញ (អាមេរិក) និងអ្នកផលិត (កម្ពុជា) ។
លោករដ្ឋមន្ដ្រី ថា «ដូច្នេះការដំឡើងពន្ធបន្ថែម គឺមានន័យថា គឺប្រជាជនៅសហរដ្ឋអាមេរិក ដែលលោកជាអ្នកបញ្ជាទិញ នូវផលិតផលពីកម្ពុជានោះ គឺលោកជាអ្នកផលប៉ះពាល់ដំបូងនៅទីនោះ ហើយផលប៉ះពាល់បន្ទាប់ពិតណាស់នៅលើកម្ពុជា»។
ទោះបីជាយ៉ាងណាក៏ដោយ លោកស្រី រដ្ឋមន្ដ្រី ក៏បានអំពាវនាវដល់ប្រជាពលរដ្ឋកុំមានការព្រួយបារម្ភ ហើយការងារនេះ រាជរដ្ឋាភិបាលបានយកចិត្តទុកដាក់ខ្ពស់ដើម្បីដោះស្រាយ? បញ្ហាទាំងនេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានដាក់ចេញនូវវិធានការជាបន្ទាន់ ឱ្យលោក អូន ព័ន្ធមុនីរ័ត្ន ដែលជាប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ដើម្បីប្រមូលធាតុចូលដាក់ជូនសម្ដេច ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជា៕
